පක්ෂ මාරු කතා පැතිරේ
I දේශපාලන වාර්තාකරු
නැවතත් මැතිසබයේ පක්ෂ මාරු සම්බන්ධව කතා පැතිරෙන්නට පටන්ගෙන තිබේ. ඒ අනුව අප වෙත ලැබෙන විශ්වාස කටයුතු ආරංචි මාර්ග පවසන්නේ පොහොට්ටුව නියෝජනය කරන මන්ත්‍රීන් පිරිසක් සන්ධානගත වීමක් සම්බන්ධව ආණ්ඩුවේ ප්‍රධානීන් පිරිසක් සමඟ සාකච්ඡා කර ඇති බවය.
ඒ අතර තවත් ආරංචියකින් කියැවෙන්නේ සමගි ජන බලවේගයේ මන්ත්‍රීන් පිරිසක් වෙතද රජයට සහාය දෙන මෙන් ආරාධනාවක් ලැබී ඇති බවය. ඒ සම්බන්ධ යෝජනාවේදී මුලින් රජයේ නියෝජිතයන් සජබට දන්වා ඇත්තේ නැවතත් එජාපය සහ සමගි ජන බලවේගය එක්ව ඉදිරි ජනාධිපතිවරණය සඳහා තරග කළ යුතු බවටයි. එහෙත් සජබ ප්‍රධානීන්ගෙන් ඊට යහපත් ප්‍රතිචාරයක් ලැබී නැත. එසේ වුවද සජබ මන්ත්‍රීන් පිරිසක් ඊට සහාය දක්වන බව ප්‍රකාශ කර ඇතැයි දැනගන්නට තිබේ.
ඒ අතර දැනට රජයට සහාය දක්වන පොහොට්ටු මන්ත්‍රීන් පිරිසක් රජයේ කැබිනට් තනතුරු අපේක්ෂාවෙන් සිටිති. එම තනතුරු ලැබීම දිගින් දිගටම ප්‍රමාද වන්නේ නම් තවදුරටත් රජයට සහාය දීම ගැන තීන්දුවක් ගත යුතු බව මේ සම්බන්ධයෙන් පොහොට්ටු මූලස්ථානයේ පැවති සාකච්ඡාවකදී මේ අය අවධාරණය කර ඇත.