කැබිනට් මාරුව දැන්ම නෑ
I දේශපාලන වාර්තාකරු
පසුගිය දිනවල දැඩි කතාබහට ලක්වූ අමාත්‍ය මණ්ඩල සංශෝධනය දැන්ම සිදු නොවනු ඇතැයි ඉහළ පෙළේ විශ්වාස කටයුතු ආරංචි මාර්ග පවසයි.
මෙයට පෙර වාර ගණනාවක්ම පොහොට්ටුව පාර්ශ්වයෙන් මේ සම්බන්ධ ඉල්ලීම් ජනාධිපතිවරයා වෙත ඉදිරිපත්ව තිබිණ. ව්‍යවස්ථා සංශෝධනය, 75 වැනි නිදහස් දිනය හා ජාත්‍යන්තර මූල්‍ය අරමුදලේ ණය සැපයීම වැනි සිදුවීම්වලින් පසුව අමාත්‍ය මණ්ඩල සංශෝධනයක් සිදුකර නව අමාත්‍යවරුන් කිහිප දෙනකු පත් කරනු ඇති බවට මෙයට පෙර ආරංචි පැතිර ගියද කිසිවක් සිදු නොවීය. අප්‍රේල් මස මුල් සතියේ අමාත්‍ය මණ්ඩල වෙනසක් සිදුවන බවට ගිය සතියේ තොරතුරක් වාර්තා වූ නමුත් එම ආරංචියද පදනම් විරහිත බව රජයේ ජ්‍යෙෂ්ඨ ප්‍රකාශකයෙක් දේශයට කීය. මේ සම්බන්ධයෙන් පසුගියදා බැසිල් රාජපක්ෂ මහතා ජනාධිපතිවරයා මුණගැසී සාකච්ඡා කළ බව වාර්තා විය. එහෙත් එම සාකච්ඡාවට අදාළ තොරතුරු කිසිවක් මාධ්‍යයට දැනගන්නට ලැබුණේ නැත.