බිත්තර බරට විකිණීම අවුලක

I යසවර්ධන රුද්රිගු

බිත්තර කිලෝවක් සඳහා දැනට නියම කර ඇති සිල්ලර මිල කිලෝව රුපියල් 20 බැගින් වැඩි නොකළහොත් තමන්ට ව්‍යාපාර කටයුතුවලින් ඉවත්වීමට සිදුවන බව සමස්ත ලංකා බිත්තර නිෂ්පාදකයන්ගේ සංගමයේ සභාපති සරත් රත්නායක මහතා දේශයට පැවසීය.

පාරිභෝගික කටයුතු පිළිබඳ අධිකාරිය පසුගිය අප්‍රේල් මස 20 දින නිකුත් කළ ගැසට් නිවේදනය අනුව සුදු බිත්තර කිලෝවක් රුපියල් 880 හා දුඹුරු බිත්තර කිලෝවක් රුපියල් 920ක් ලෙස උපරිම සිල්ලර මිල සඳහන් කර ඇත.

ගොවිපළවලින් බිත්තර මිලට ගත හැකි තොග මිල වන්නේ සුදු බිත්තර කිලෝව රුපියල් 870ක් හා දුඹුරු බිත්තර කිලෝව රුපියල් 910ක් වන අතර රුපියල් 10ක් වන මිල පරතරය කිහිප දෙනකු අතර බෙදී යන නිසා ව්‍යාපාර කටයුතුවල නිතර විය නොහැකි බව සභාපතිවරයා පවසයි. බිත්තර ව්‍යාපාරිකයන් සමග සාකච්ඡා නොකර පාරිභෝගික කටයුතු අධිකාරිය හිතූමතයට කටයුතු කිරීම මෙම අවුලට හේතු වූ බව ඔහු කියයි.

මේ පිළිබඳ විමසූ විට පාරිභෝගික කටයුතු අධිකාරියේ පාරිභෝගික කටයුතු පිළිබඳ උසස් නිලධාරියකු පැවසුවේ ගැසට් නිවේදනයේ සඳහන් උපරිම සිල්ලර මිල කිසිවිටෙකත් සංශෝධනය නොකරන අතර, එහි බර පමණක් නොව බිත්තරයක උපරිම සිල්ලර මිල සුදු බිත්තර රුපියල් 44 හා දුඹුරු බිත්තර රුපියල් 46ක් ලෙස සඳහන් කර ඇති බවය.