2023 නොවැම්බර් 18 වන සෙනසුරාදා
ඇඟලුම් ආදායම හතරෙන් එකක් බසී
2023 නොවැම්බර් 18 වන සෙනසුරාදා, ප.ව. 02:02 79
ප්‍රියන්ජන් සුරේෂ් ද සිල්වාI
ශ්‍රී ලංකාවට ලැබෙන ඇණවුම් අවම වීම සහ පිරිවැය ඉහළ යාම හේතුවෙන් ඇඟලුම් ක්ෂේත්‍රයේ ආයෝජකයන්ගේ ආදායම මේ වන විට 25%කින් පමණ පහත වැටී ඇතැයිද, ඇතැම් දේශීය ආයෝජකයන් වෙනත් රටවල ආයෝජනය කිරීමට ඇති හැකියාව පිළිබඳව සොයා බලමින් සිටින්නේ යැයිද නිදහස් වෙළෙඳ කලාප ආයෝජකයන්ගේ සම්මේලනයේ ප්‍රධාන ලේකම් ධම්මික ප්‍රනාන්දු මහතා දේශයට ප්‍රකාශ කළේය.
ඇතැම් ආයෝජකයන් සේවකයන්ට වන්දි ලබා දී සේවයෙන් ඉවත් කිරීමට කටයුතු කර ඇත. මේ වන විට මහා පරිමාණ ආයතන 10ක පමණ එලෙස වන්දි ගෙවා සේවකයන් ඉවත් කර තිබේ. නිෂ්පාදනයක් සිදු නොවූවද සමහර ආයතන හිමිකරුවන් තම තැන්පතුවලින් සේවකයන්ට පූර්ණ හෝ අර්ධ වැටුපක් ලබා දී ඔවුන් නිවෙස්වල රඳවා තිබේ. ඇතැම් කම්හල් සතියකට දින 4ක් පමණක් නිෂ්පාදන කටයුතු සිදු කරන අතර, ඇතැම් ආයතන සතියක් හැර සතියක් පමණක් විවෘතව තබන බවද ඔහු වැඩිදුරටත් සඳහන් කළේය. මේ වන විට සුළු හා මධ්‍ය පරිමාණ කම්හල්වලින් 50%ක් පමණ වසා දමා ඇති අතර දෙසැම්බර් නිවාඩුවෙන් පසු ඇතැම් මහා පරිමාණ කම්හල්වලින් 20%ක් පමණ සංඛ්‍යාවක් මාසයක සිට තුන් මාසයක කාලයක් දක්වා වසා තැබීමට තීරණය කර ඇතැයිද ඔහු සඳහන් කරයි.
ඇණවුම් අවම වීමට අමතරව විදුලි බිල ඇතුළු වෙනත් පිරිවැය විශාල ලෙස ඉහළ ගියද එයට සරිලන මිලක් නොලැබීම ආයෝජකයන්ගේ ආදායම පහත වැටීමට බලපා තිබේ. බොහෝ රටවල් ඉතා අඩු මිලට සේවා සැපයීම හේතුවෙන් ශ්‍රී ලංකාවේ ඇඟලුම් අපනයනකරුවන්ට වෙනත් රටවල් සමඟ තරග කිරීමට නොහැකි තත්ත්වයක් උදා වී ඇතැයිද ප්‍රනාන්දු මහතා සඳහන් කළේය.