ඩෙංගු මරණ 9යි
ප්‍රියන්ජන් සුරේෂ් ද සිල්වා I
මේ වසරේ ජනවාරි මාසයේ සිට මැයි දක්වා කාලය තුළ දිවයිනේ විවිධ ප්‍රදේශවලින් ඩෙංගු රෝගීන් 24,333ක් වාර්තා වී ඇති අතර ඉන් 9 දෙනෙක් මරණයට පත්වූහ. එය වෙනත් වසරවලට සාපේක්ෂව අවම මට්ටමක පැවැතියද පාලනයක් නොකළහොත් මරණ සංඛ්‍යාව වැඩිවිය හැකි බවද, මේ වන විට අධි අවදානම් කලාප ලෙස සෞඛ්‍ය වෛද්‍ය නිලධාරි කොට්ඨාස 9ක් හඳුනාගෙන ඇති බවද දේශයට වාර්තා වෙයි.
පවතින අධික වැසි සහිත තත්ත්වය යටතේ දිවයින පුරා ඩෙංගු රෝගය පැතිර යාමේ දැඩි අවදානමක් ඇතැයි ජාතික ඩෙංගු මර්දන ඒකකයේ අධ්‍යක්ෂ විශේෂඥ වෛද්‍ය සුදත් සමරවීර මහතා සඳහන් කරයි.
සමස්ත ඩෙංගු රෝගීන්ගෙන් 35% ක්ම වාර්තා වන්නේ බස්නාහිර පළාතෙනි. කොළඹ කළුතර සහ ගම්පහ දිස්ත්‍රික්කවල රෝගීන් විශාල වශයෙන් වාර්තා වන බවද ජාතික ඩෙංගු මර්දන ඒකකය ප්‍රකාශ කරයි. මහනුවර, කුරුණෑගල සහ යාපනය යන දිස්ත්‍රික්කවලද ඩෙංගු රෝගීන් වාර්තා වීම ඉහළ අගයක පවතී. පෙර පැවැති අත්දැකීම් මත මෝසම් වර්ෂාවත් සමඟ අධි අවදානම් ප්‍රදේශ බවට පත් විය හැකි යැයි සැක කළ හැකි සෞඛ්‍ය වෛද්‍ය නිලධාරි කොට්ඨාස 71ක් ජාතික ඩෙංගු මර්දන ඒකකය මගින් හඳුනාගෙන ඇති අතර එම ප්‍රදේශයන්හි ඩෙංගු රෝගය පැතිර යාම වැළැක්වීම සඳහා දිස්ත්‍රික්ක 15ක වෛද්‍ය නිලධාරි කාර්යාල 71ක් සම්බන්ධ කර ගනිමින් මැයි 26 දා සිට ජූනි 1 දා දක්වා ඩෙංගු මර්දන සතියක් ක්‍රියාත්මක කිරීමට පියවර ගෙන තිබේ.
