ගුවනේදී වලි දාගත් නියමුවා අස්වෙයි!
ව්‍යාපාරික වාර්තාකරු I
මගීන් සහ කාර්ය මණ්ඩලය ඇතුළුව 301 දෙනකු රැගෙන ඔස්ට්‍රේලියාවේ සිඩ්නි නුවර සිට කටුනායක බලා පියාසර කරමින් තිබූ A 330-300 එයාර් බස් ගුවන් යානයේ ප්‍රධාන ගුවන් නියමුවා ලෙස කටයුතු කළ කපිතාන් වජිර වනසිංහ සේවයෙන් ඉල්ලා අස්වී ඇතැයි දේශයට වාර්තා වෙයි.
පසුගිය 21 මෙම ගුවන් ගමනට අදාළ බරපතළ සිදුවීම වාර්තා විය. UL-607 ගුවන් යානයේ ප්‍රධාන නියමු වජිර වනසිංහ විසින් ඔහුගේ සහයක නියමුවරිය ලෙස කටයුතු කළ අංජලී ෆොන්සේකා ශරීර කෘත්‍යය සඳහා නියමු කුටියෙන් ඉවත්ව ගිය පසු ගුවන් යානාවලට අදාළ බරපතළ නීති රීති නොතකා සහයක නියමුවරියට නියමු කුටියට ඇතුළු විය නොහැකි වන ලෙස ප්‍රධාන දොර වසා දමා ලොක් කර ඇත.
සාමාන්‍ය ගුවන් සේවා නීතිය අනුව නියමුවරයකුට තනිවම නියමු කුටියේ රැඳී සිටිමින් ගුවන් යානය පැදවීම තහනම්ය. මෙම යානයේ සිටි තෙවැනි නියමුවා හෝ ගුවන් යානා කාර්ය මණ්ඩලයේ ජ්‍යෙෂ්ඨ නිලධාරියකු හෝ සහයක නියමුවරිය පැමිණෙන තෙක් නියමු කුටියේ රැඳී සිටිය යුතුය. එහෙත් මෙහිදී එම නියමය උල්ලංඝනය වූ බව මීට අදාළ පැමිණිල්ලේ සඳහන්ය.
ප්‍රධාන නියමු වනසිංහ, නියමු කුටියට වී තනිව යානය පදවන විට බියට පත් වූ සෙසු ගුවන් සේවකයන් අභ්‍යන්තර දුරකතනයෙන් කතා කොට ඇවිටිලි කිරීමෙන් අනතුරුව සෑහෙන වේලාවකට පසු නියමුවරයා අදාළ දොර විවෘත කර ඇත.
ගුවන් ගමන් ක්ෂේත්‍රයේ බරපතළ වරදක් වන මෙම තත්ත්වය ගැන සහයක නියමුවරිය ශ්‍රී ලන්කන් ප්‍රධානීන්ට පැමිණිලි කොට සිය ලොග් සටහන් පොතේද සටහනක් තබා ඇත.
අනතුරුව මේ ගැන ශ්‍රී ලන්කන් ගුවන් සේවය, සිවිල් ගුවන් සේවා අධිකාරිය හා සිවිල් ගුවන් සේවා අමාත්‍යංශය විසින් පරීක්ෂණ තුනක් ආරම්භ කර තිබේ. ඒ සමඟ ප්‍රධාන ගුවන් නියමුවා සේවයෙන් ඉල්ලා අස්වී ඇත. සහයක නියමුවරියගේ සේවාව පරීක්ෂණ හමාර වන තෙක් නතර කොට තිබේ. ශ්‍රී ලන්කන් ගුවන් සේවය ස්ථාපිත කොට දැනට වසර 45 ක් ගත වී ඇතත් මෙවන් බරපතළ වරදක් සිදුවූ ප්‍රථම අවස්ථාව මෙය බව වාර්තා වෙයි.
