ඇඟලුම් කම්හල්වලට වැලේ වැල් නැහැ
වෙළඳ කලාප ආයෝජක සම්මේලන ලේකම් - ධම්මික ප්‍රනාන්දු
ප්‍රියන්ජන් සුරේෂ් ද සිල්වා I
අපනයනකරුවන් ලබන ලාභය මත පනවා ඇති 30% බද්ද හා විදුලිය සඳහා යන වියදම 100% කින් ඉහළ යාම නිසා මහා පරිමාණ ඇඟලුම් කම්හල් වැසී යමින් පවතින අතර ඇඟලුම් කර්මාන්තකරුවන් විශාල අර්බුදයකට මුහුණපා සිටින්නේ යැයි නිදහස් වෙළෙඳ කලාප ආයෝජකයන්ගේ සම්මේලනයේ ප්‍රධාන ලේකම් ධම්මික ප්‍රනාන්දු මහතා සඳහන් කරයි.
මේ වන විට මහ පරිමාණ කම්හලක් වන බ්‍රුන්ඩික්ස් කම්හලේ ශාඛාවක්ද වසා දමා ඇති අතර ටී.ජේ නමැති ජර්සි කර්මාන්ත ශාලාවේ නිෂ්පාදන කටයුතු සිදුවන්නේ දින හතරක් පමණි. සේවකයන් 8000ක් පමණ සේවය කළ කම්හල් හතකින් සමන්විත ස්මාර්ට් ෂර්ට් කර්මාන්ත ශාලාවේද නිෂ්පාදන අඩාල වී තිබේ.
තවත් මෙවැනි මහා පරිමාණ කම්හල් වැසෙන තත්ත්වයට පත්වෙමින් තිබෙන අතර සුළු හා මධ්‍යම පරිමාණ කම්හල් හිමියන්ට වැලේ වැල් නොමැති තත්ත්වයක් උදා වී ඇතැයි සඳහන් කළ ප්‍රනාන්දු මහතා පසුගිය ඔක්තෝබරයේ සිට දෙසැම්බර් දක්වා වන කාර්තුවේ අපනයන පහත වැටීමක් අපේක්ෂා කරන බවද සඳහන් කළේය. විදුලි බිල වැඩි කිරීමෙන් විදුලිය සඳහා වියදම 100%කින් ඉහළ ගොස් ඇති අතර සමස්ත වියදම 20%කින් වැඩි වී තිබේ. යළි විදුලි බිල වැඩි කළහොත් සමස්ත වියදම තවත් 30%කින් පමණ වැඩි විය හැකි බවත් එවිට ඇඟලුම් කර්මාන්තය සම්පූර්ණයෙන්ම බිඳවැටෙන බවත් ඔහු සඳහන් කළේය.
අපනයනකරුවන්ගේ ලාභාංශය මත මෙතෙක් පනවා තිබුණේ 14%ක සහන බද්දකි. දැන් එය ලාභයෙන් 30%ක් ලෙස වැඩි කර ඇත. අමුද්‍රව්‍ය ආනයනයේදී දැනට පවතින වරාය හා ගුවන් සේවා බද්දට අමතරව තවත් 2.5ක බද්දක් පැනවෙන අතර ලංකාවෙන් මිලදී ගන්නා සෑම භාණ්ඩයකටම එම බද්ද බදු පිට බදු වශයෙන් එකතු වේ. ඉන්දියාව බංග්ලාදේශය, මියන්මාරය, පාකිස්තානය වැනි රටවල අපනයනකරුවන් සඳහා සහන බදු ක්‍රමයක් පවතින අතර විවිධ සහනාධාරද හිමිය. අපේ රටින් ගිලිහෙමින් පවතින ඇඟලුම් කර්මාන්තය රැකගැනීමට නම් අපේ තරගකාරි රටවලින් ලැබෙන සහන පිළිබඳව අවධානය යොමු කරමින් එම සහන මෙරට අපනයනකරුවන්ටද ලබා දිය යුතු යැයි ධම්මික ප්‍රනාන්දු මහතා ප්‍රකාශ කළේය.
