මිල අඩු නොකරන හෝටල්වලින් කෑම කන්න එපා
I චමිඳු නිසල් ද සිල්වා
මිල අඩුවීමේ සහනය පාරිභෝගික ජනතාවට ලබා නොදෙන ආපනශාලා වෙතොත් එම ආපනශාලා වර්ජනය කළ යුතු බව පාරිභෝගික අයිතීන් සුරුකීමේ ජාතික ව්‍යාපාරයේ ජාතික සංවිධායක අසේල සම්පත් මහතා දේශයට පැවසීය. පාරිභෝගික කටයුතු අධිකාරිය මේ සම්බන්ධව පියවර ගැනීමට තවදුරටත් අසමත් වේ නම්, එම අධිකාරිය වසා දැමීම වඩාත් සුදුසු යැයි ඒ මහතා ප්‍රකාශ කළේය.
බිත්තර ගෙන්වීමට ගැසට් ගැසූ වෙළෙඳ ඇමැතිවරයා, මිල පාලනය කිරීමට අවශ්‍ය ගැසට්ටුව නිකුත් නොකරන්නේ ඇයිදැයි ඔහු තවදුරටත් ප්‍රශ්න කර සිටියේය.
අත්‍යවශ්‍ය භාණ්ඩ රැසක මිල ගණන් අඩු වී ඇති අතර මිල වැඩි වී ඇත්තේ මස් මාංශවල පමණක් බවද අසේල සම්පත් මහතා කීය. ඉදිරියේදී කොපි පොතේ සිට සබන් කැටය දක්වා සියලු භාණ්ඩවල මිල අනිවාර්යෙන්ම අඩුවිය යුතු යැයි ඔහු අවධාරණය කළේය. ජනතාවට සහන ලබා නොදෙන වෙළෙඳුන් සිදු කරමින් සිටින්නේ ආණ්ඩු විරෝධී දේශපාලන පක්ෂවල ඕනෑ එපාකම් පිරිමැසීම යැයිද අසේල සම්පත් මහතා චෝදනා කළේය. ඒ අනුව වෙළෙඳුන්ට දේශපාලනය කිරීමට අවශ්‍ය නම්, වෙළෙඳසලෙන් පිටතට පැමිණ එය සිදු කළ යුතු යැයි ඔහු වැඩිදුරටත් සඳහන් කළේය.