ආර්ථික අර්බුදයෙන් ලක්ෂ 05කට රස්සා නැතිවෙලා
I ප්‍රියන්ජන් සුරේෂ් ද සිල්වා
පසුගිය කාලයේ ශ්‍රී ලංකාවේ හටගත් ආර්ථික අර්බුදය හේතුවෙන් ලක්ෂ 5කට අධික පිරිසකගේ රැකියා අහිමි වී ඇති අතර ලක්ෂ 27ක පිරිසක් අන්ත දුගීභාවයට පත්ව ඇතැයි ලෝක බැංකුව මගින් අප්‍රේල් 5 වැනිදා නිකුත් කළ ''ශ්‍රී ලංකාවේ සංවර්ධන යාවත්කාලීන කිරීම'' නමැති වාර්තාව මගින් පෙන්වා දී තිබේ. එම වාර්තාවට අනුව ඉල්ලුම පහත වැටීම, රැකියා සහ ආදායම් අහිමිවීම සහ නිෂ්පාදනයට අවශ්‍ය සැපයුම් හීනවීම යන කරැණු මත 2023 වසරේ ශ්‍රී ලංකාවේ ආර්ථිකය සියයට 4.3 කින් හැකිලෙනු ඇතැයි ද සඳහන් කර ඇත.
නේපාලයේ සහ මාලදිවයිනේ ලෝක බැංකු අධ්‍යක්ෂ ෆාරිස් එච් හඩාඩ් සෙර්වෝස් සඳහන් කර ඇති පරිදි ණය ප්‍රතිව්‍යුහගත කිරීමේ මන්දගාමී ක්‍රියාවලිය, අර්බුදයෙන් ගොඩඒමට දීර්ඝ කාලයක් ගතවීම, බාහිර මූල්‍ය ආධාර සීමාසහිත වීම සහ ගෝලීය වාතාවරණයේ අවිනිශ්චිතභාවය රටේ ආර්ථික වර්ධනයට සැලකිය යුතු අවදානමක් ඇති කර තිබේ.
