අපේ දරුවන් වික්ක භානු කල්ලිය මාට්ටු
ප්‍රියන්ජන් සුරේෂ් ද සිල්වා l
මැලේසියානු විදේශ ගමන් බලපත්‍ර භාවිත කරමින් ශ්‍රී ලාංකික දරුවන් යුරෝපයට ප්‍රවාහනය කරන භානු ඉන්ටර්නැෂනල්ස් නමින් හැඳින්වෙන කල්ලියක් අත්අඩංගුවට ගැනීමට මැලේසියානු අගමන දෙපාර්තමේන්තුව සමත්ව තිබේ.
මෙම කල්ලිය වයස අවුරුදු 12ට අඩු දරුවන් සිටින දිළිඳු මැලේසියානු දෙමවුපියන් රවටා ඔවුන්ගේ දරුවන්ට විදේශ ගමන් බලපත්‍ර ලබා දෙන බව පවසමින් එම දරුවන්ගේ උප්පැන්න සහතික ලබා ගෙන ඔවුන්ගේ නමින් ශ්‍රී ලාංකික දරුවන් සඳහා විදේශ ගමන් බලපත්‍ර ලබාගෙන ඔවුන් යුරෝපා රටවලට අලෙවි කර තිබේ. දරුවන්ගේ ලියැකියවිලි ලබා දීම වෙනුවෙන් මැලේසියානු දෙමවුපියන්ට රින්ගිට් 500ක් ලබා දී ඇති අතර මැලේසියානු විදේශ ගමන් බලපත්‍රය සකස් කර යුරෝපයට ගෙන යන ලද සෑම ශ්‍රී ලාංකික දරුවකුටම යුරෝ 30,000 (රුපියල් 10,59,000) සිට 50,000 (රුපියල් 17,65,00) දක්වා මුදලක් භානු ඉන්ටර්නැෂනල්ස් නමැති කල්ලියට ලැබී තිබේ.
ශ්‍රී ලාංකික දරුවකු සඳහා මැලේසියානු විදේශ ගමන් බලපත්‍රයක් ලබා ගැනීමට පසුගිය අප්‍රේල් 12 ක්වාලාලම්පූර් ආගමන මූලස්ථානයට පැමිණි එරට විවාහක යුවළක් අත්අඩංගුවට ගැනීමෙන් පසු ඔවුන්ගෙන් ලබාගත් තොරතුරු අනුව මෙම කල්ලිය අත්අඩංගුවට ගත් බව ආගමන දෙපාර්තමේන්තුවේ අධ්‍යක්ෂ ජනරාල් රැස්ලන් ජුසෝ සඳහන් කර ඇතැයි මැලේසියානු ජාතික ප්‍රවෘත්ති ඒජන්සිය උපුටා දක්වමින් නිව්ස් වයර් වෙබ් අඩවිය වාර්තා කර තිබේ. මෙම කල්ලිය කොපමණ දරුවන් පිරිසක් අලෙවිකර තිබේද හා කොපමණ කාලයක් ක්‍රියාත්මකව සිටියේද යන්න පිළිබඳව ආගමන දෙපාර්තමේන්තුව විමර්ශන සිදු කරමින් සිටී.