රිළවුන් රට පටවනවාට මන්ත්‍රී වීරසිංහගේ විරෝධය
I දේශපාලන වාර්තාකරු
පාර්ලිමේන්තු මන්ත්‍රී ජනාධිපති නීතිඥ ජයන්ත වීරසිංහ මහතා රිළවුන් චීනයට යැවීමේ යෝජනාවට සිය විරෝධය පළ කර තිබේ. පසුගියදා පැවති ආණ්ඩු පක්ෂ මන්ත්‍රී කණ්ඩායම් රැස්වීමේදී මේ ගැන කරුණු දක්වා ඇති මන්ත්‍රීවරයා රිළවුන් රට යවන්නේ ඔවුන්ගේ ශරීරයේ එක්තරා අවයවයක් ආහාරයට ගැනීමට බවද සඳහන් කළේය.
සුරතලයට තමන්ද රිළවකු ඇතිකළ නිසා ඔවුන් ගැන බොහෝ දේ දන්නා බව මන්ත්‍රීවරයා ප්‍රකාශ කරද්දී මහනුවර දිස්ත්‍රික් මන්ත්‍රී ගුණතිලක රාජපක්ෂ ප්‍රකාශ කර ඇත්තේ පළාතේ වගාවන්ට විශාල හානියක් කරන නිසා මහනුවර උඩවත්ත කැලයේ සිටින විශාල රිළව් රංචුවද රට යවන ලෙසය.
කෙසේ වෙතත් මෙහිදී මන්ත්‍රීන් ගණනාවක්ම ඊට පක්ෂ විපක්ෂ මත දක්වා තිබිණි. රිළවුන් රට යවන්නේ ඔවුන්ගේ ශරීර කොටස් අනුභවයටය යන චෝදනාව අසත්‍යයක් බවත් අනුභවයට රිළවුන් ඇතිකරන රටවල ඔවුන් විශේෂ ගොවිපොළවල ඇතිදැඩි කරන බවත් මෙහිදී අවධාරණය කර ඇත.