මේ වසරේත් ආර්ථිකය පසුබෑමක - බ්ලූම්බර්ග් වෙබ් අඩවිය
I ප්‍රියන්ජන් සුරේෂ් ද සිල්වා
ජාත්‍යන්තර මූල්‍ය අරමුදලේ ණය සහනය හිමිවුවද ණය ප්‍රතිව්‍යුහගත කිරීම, ආනයන සීමා සහ පවතින සීමිත සංචිත ප්‍රමාණය හේතුවෙන් 2023 වසරේද ශ්‍රී ලංකාවේ ආර්ථික වර්ධන වේගය පසුබැසීමකට ලක්වන බව බ්ලූම්බර්ග් වෙබ් අඩවිය සඳහන් කර තිබේ.
කලින් ඇස්තමේන්තු කළ 4.4%ට වඩා පළමු මාස 4 තුළ 9.9%කින් ආර්ථිකය හැකිලී (සංකෝචනය වී) ඇති අතර එය පෙර පැවැති තත්ත්වය මෙන් දෙගුණයකටත් වඩා වැඩි යැයි සඳහන් කරන බ්ලූම්බර්ග් ආර්ථික විද්‍යාඥයන් දෙවැනි මාස හතරේදී 1%ක මන්දගාමී වේගයකින් ආර්ථිකය යළි වර්ධනය විය හැකි බවද පෙන්වා දී තිබේ. කලින් ඇස්තමේන්තු කර තිබුණේ 2.9% කින් පමණ ආර්ථික වර්ධනයක් ඇතිවිය හැකි බවටය. 2023 වසරේ ශ්‍රී ලංකාවේ දළ දේශීය නිෂ්පාදිතය 2.7% ලෙස ඇස්තමේන්තු ගතකර තිබුණද එය 0.7% දක්වා පහත වැටෙනු ඇතැයිද එම වාර්තාව පෙන්වා දෙයි.
ජාත්‍යන්තර මූල්‍ය අරමුදල ශ්‍රී ලංකාවට ඩොලර් බිලියන 3ක ණයක් අනුමත කිරීමත් සමඟ කිසියම් ස්ථාවරත්වයක් පෙන්නුම් කරන අතර ඇතැම් ආර්ථික විද්‍යාඥයන් පවසන්නේ වත්මන් ආර්ථික තත්ත්වය කොවිඩ් වසංගතය පැවැති කාලයට පෙර පැවැති තත්ත්වයට ළඟාවෙමින් පවතින බවටය.
ආසියාවේ වේගවත්ම ආර්ථික උද්ධමනයක් සහිත ශ්‍රී ලංකාවේ ඉලක්කම් දෙකේ උද්ධමන තත්ත්වය මේ වසර පුරාවටම පවතින අතර දෙවැනි කාර්තුවේ පාරිභෝගික භාණ්ඩවල මිල ප්‍රතිශතය 28.8%ක් දක්වා ඉහළ යා හැකි බවත් වසරේ සාමාන්‍ය මිල ප්‍රතිශතය 25%ක් පමණ වනු ඇති බවත් එම වාර්තාව සඳහන් කරයි.