ගිනිගත් නැවේ පරිසර හානිය බස්නාහිර මුහුදේ දිගටම
I කුසුම්සිරි විජයවර්ධන
පසුගිය 2021 ජූනි මාසයේ ශ්‍රී ලංකා මුහුදු සීමාවේ කොළඹ වරායට ඈතින් ස්ථානයකදී ගිනිගත් එක්ස්ප්‍රස් පර්ල් නෞකාවෙන් සිදුවන පරිසර හානිය තවමත් බස්නාහිර මුහුදේ වත්තලට ඉහළින් මීගමුව දක්වා සිදුවන බව පරිසර යුක්ති කේන්ද්‍රයේ සභාපති නීතිඥ ආචාර්ය රවීන්ද්‍රනාත් දාබරේ දේශයට පැවසීය. එම හානිය වඩාත් බරපතළ ලෙස සිදුවන්නේ නැව ගිනිගත් සාගර ප්‍ර දේශයට නාවික සැතපුම් 9ක් පමණ දුරකින් පිහිටි සරක්කුව, කැපුන්ගොඩ ආශ්‍රිත වෙරළට බවත් නැවෙන් මුහුදබත් වූ කන්ටේනර් 700කට අධික ප්‍රමාණයෙන් පිටවූ ප්ලාස්ටික් කොටස් මෙසේ වෙරළට ගොඩ ගසන බවත් ඔහු සඳහන් කළේය.
ප්ලාස්ටික්වලට අමතරව පිළිස්සී වෙරළට ආසන්න තැන්වලට පැමිණ නුදුරින් තැන්පත්වූ කොටස්ද රළවලට නැවත වෙරළ තීරයට පැමිණීම දකින්න ලැබෙන බවත් මේ නිසා පරිසරයට විශාල හානියක් සිදුවන බවත් එය වැළැක්වීම රාජ්‍ය බලධාරී ආයතන හිතාමතාම වළක්වා ඇති බවත් ඔහු වැඩිදුරටත් පැවසුවේය. මුල් කාලයේ රාජ්‍ය ආයතන මැදිහත්වී අපද්‍රව්‍ය එකතුකර ගබඩාකළ අතර පෞද්ගලික ව්‍යාපාරිකයෙක්ද යන්ත්‍රයක් තනා ප්ලාස්ටික් අපද්‍රව්‍ය වෙන්කර එකතු කිරීමට පියවර ගත්තත් පසුව එය රජයේ බලධාරීන්ගේ ඉල්ලීම මත නවත්වා ඇති බවත් ඔහු කීවේය.
