අයි.එම්.එෆ්. ගිවිසුම සම්මතයි

I ගයාන් ගාල්ලගේ

ජාත්‍යන්තර මුල්‍ය අරමුදල (IMF) සහ ශ්‍රී ලංකාව ඇතිකරගත් විස්තීරණ ණය මුදල සම්බන්ධව පැවති පාර්ලිමේන්තු විවාදයේදී එම ගිවිසුමට පක්ෂව ඡන්ද 120කුත් ඊට විපක්ෂව ඡන්ද 25කුත් හිමිවිය.

ඒ අනුව පසුගිය සිකුරාදා (28) පැවති එම ඡන්ද විමසීමේදී වැඩි ඡන්ද 95කින් එය සම්මත විය. මෙහි විශේෂත්වය වන්නේ පාර්ලිමේන්තු ප්‍රධාන විපක්ෂය වන සමගි ජනබලවේගය සහ දෙමළ ජාතික සන්ධානය ඇතුළු මන්ත්‍රීවරු 79ක් සභාවේ නොසිටීමයි.

යෝජනාවට පක්ෂව ශ්‍රී ලංකා පොදුජන පෙරමුණ, එක්සත් ජාතික පක්ෂය, ලංකා කම්කරු කොංග්‍රසය සහ ශ්‍රී ලංකා නිදහස් පක්ෂය පක්ෂව ඡන්දය ප්‍රකාශය කළේය. එසේම සමගි ජන බලවේගයේ පාර්ලිමේන්තු මන්ත්‍රී ඒ.එච්.එම් ෆවුසි, එසේම විපක්ෂයේ අසුන් ගෙන සිටින ජෝන් සෙනවිරත්න, අනුර ප්‍රියදර්ශන යාපා, ප්‍රියංකර ජයරත්න, දුමින්ද දිසානායක, සුදර්ශනී ප්‍රනාන්දුපුල්ලේ, නිමල් ලංසා යන මන්ත්‍රීවරු මෙහිදී පක්ෂව ඡන්දය ලබාදීම විශේෂයෙන් කැපී පෙනෙන සිදුවීමක් විය.

ඩලස් අලහප්පෙරුම මහතා නියෝජනය කරන නිදහස් ජනතා සභාව, උත්තර ලංකා සභාගය, ජාතික ජන බලවේගය ඇතුළු කණ්ඩායම ගිවිසුමට විරැද්ධව ඡන්දය ප්‍රකාශ කළේය.