වහා ඉවත් වෙන්න! - ජනාධිපති කාර්යාලය

 අස්වෙන්නේ නැහැ! ආණ්ඩුකාරවරු ආණ්ඩුවට අභියෝග කරති 

l දේශපාලන වාර්තාකරු

ඉල්ලා අස්වන ලෙස ජනාධිපති කාර්යාලය විසින් දැනුම්දුන් පළාත් ආණ්ඩුකාරවරුන් 4 දෙනා තනතුරුවලින් ඉවත් නොවී රජයට නීතිමය වශයෙන් අභියෝග කිරීමට තීන්දු කර ඇතැයි දේශයට වාර්තා වෙයි.

මෙම ආණ්ඩුකාරවරුන්ට තනතුරුවලින් ඉවත් වන ලෙස ජනාධිපති කාර්යාලයේ අතිරේක ලේකම්වරියක දැනුම්දුන් අවස්ථාවේ එක් ආණ්ඩුකාරවරයකු තමන් තනතුරින් ඉවත් නොවන බව තරයේම ප්‍රකාශ කර ඇතැයිද සඳහන්ය. එනිසා ආණ්ඩුකාරවරුන්ට තනතුරුවලින් ඉවත් වන ලෙස ලිඛිතවම දැනුම් දීමට සිකුරාදා රජය තීන්දු කර තිබිණි.

මෙලෙස ආණ්ඩුකාරවරුන් කවර තීන්දුවක් ගත්තද පත්වීම් බලධරයා ලෙස ජනාධිපතිවරයාට හිමි විධායක බලතල අනුව මෙකී ආණ්ඩුකාරවරුන් වෙනුවට නව ආණ්ඩුකාරවරුන් ඉදිරි සතියේදී පත්කෙරෙනු ඇතැයි ජනාධිපති කාර්යාල ආරංචි මාර්ග කියයි.

ජනාධිපතිවරයාගේ පත්වීමක් වුවද තමන් තනතුරුවලින් ඉවත් කළ හැක්කේ දූෂණය, විෂමාචාරය, බලතල අයුතු ලෙස භාවිතය, අල්ලස, චරිත දූෂණය වැනි වරදක් සිදුකර ඇත්නම් ඒ ගැන පළාත් සභාව විසින් සම්මත කරන යෝජනාවකින් පමණක් බව ආණ්ඩුක්‍රම ව්‍යවස්ථාවේ 154(ආ) වගන්තියේ සඳහන්ය. එබැවින් එම ක්‍රමවේදය අනුගමනය නොකර ආණ්ඩුකාරවරයකු ඉවත් කළ නොහැකි බව ඉවත් නොවන ආණ්ඩුකාරවරුන්ගේ මතය වී ඇතැයි වාර්තා වෙයි.

මේ සම්බන්ධයෙන් ඔවුන් හිටපු අගවිනිසුරුවරයකු වන සරත් එන්. සිල්වා මහතා ප්‍රමුඛ නීති විශාරදයන්ගෙන් නීති උපදෙස් ලබා ඇත. දේශය මේ ගැන සරත් එන්. සිල්වා මහතාගෙන් කරුණු විමසූ විට ඔහු එම තොරතුර සනාථ කළේය. ඒ අතර ජනාධිපති කාර්යාලයද මෙම සිද්ධිය සම්බන්ධයෙන් නීතිපති උපදෙස් ලබා ඇති බව දේශයට වාර්තා වෙයි.

තවදුරටත් මේ ගැන ජනාධිපති කාර්යාලය නීති විශාරදයන්ගෙන් කරන ලද විමසුම්වලදී අනාවරණය වී ඇත්තේ ආණ්ඩුක්‍රම ව්‍යවස්ථාවේ 154ඊ(2) වගන්තිය ප්‍රකාරව ආණ්ඩුකාරවරුන් සිය අභිමතය ක්‍රියාත්මක කළ යුත්තේ ජනාධිපතිගේ විධානය අනුව බවය. ඒ අනුවද ආණ්ඩුකාරවරුන්ට තමන්ගේ කැමැත්ත පරිදි ක්‍රියා කළ නොහැකි බව රජයේ මතය බව දැනගන්නට ඇත.

මෙයට පෙර අවස්ථාවක උතුරේ ආණ්ඩුකාර ධූරය දැරූ පී.එස්.එම්. චාල්ස් මහත්මිය තනතුරින් ඉවත් නොවී සිටියදී හිටපු ජනාධිපති ගෝඨාභය රාජපක්ෂ මහතා විසින් ජීවන් ත්‍යාගරාජා මහතා උතුරේ ආණ්ඩුකාර පදවියට පත්කර ඇති අතර එය නීතිමය පූර්වාදර්ශයක් ලෙස රජය සලකන බව වැඩිදුරටත් සඳහන්ය.

පළාත් ආණ්ඩුකාර ධූර ජනාධිපතිවරයාගේ පත්වීමක් බැවින් ජනාධිපතිවරයාගේ ප්‍රසාදය ඇතිතාක් කල් එම තනතුර දරන බව ව්‍යවස්ථාවේ දැක්වෙයි. එහෙත් පසුව ගෙන ආ සංශෝධනයකින් එම වගන්තිය වෙනස් කර ඇති බැවින් ඉන් බලපෑමක් සිදුනොවන එම ආණ්ඩුකාරවරුන්ගේ මතය බව දැනගන්නට තිබේ. 

පසුගියදා රජය තමන් දරන තනතුරුවලින් ඉවත් වන ලෙස දැක්වූ ආණ්ඩුකාරවරුන් වන්නේ වසන්ත කරන්නාගොඩ, අනුරාධා යහම්පත්, ටිකිරි කොබ්බෑකඩුව හා ජීවන් ත්‍යාගරාජා යන අයයි. කවර හේතුවක් නිසා හෝ මේ අය ධූරවලින් ඉවත් කිරීමට රජය ගත් තීන්දුව වෙනස් නොකෙරෙන බව ජනාධිපති කාර්යාලය පවසයි. එලෙස ඉවත් කෙරෙන පළාත් ආණ්ඩුකාරවරුන් වෙනුවට වයඹ පළාත සඳහා ලක්ෂ්මන් යාපා අබේවර්ධන සබරගමුව පළාත සඳහා රංගේ බණ්ඩාර හෝ නවීන් දිසානායක, නැ‍ෙඟනහිර පළාත සඳහා සෙන්දිල් තොණ්ඩමන් සහ උතුරු පළාත සඳහා පී.එස්.එම්. චාල්ස් යන මහත්ම මහත්මීන් පත්කෙරෙන බව විශ්වාස කටයුතු ආරංචි මාර්ග වැඩිදුරටත් පවසයි.