බඩු මිල ගැන හතරබීරි කතාවක්: ආනයනකරුවන් බඩු මිල නංවලා නැතිලු! - ආනයනකරුවන්ගේ මාධ්‍ය ප්‍රකාශක
I යසවර්ධන රුද්රිගූ
තමන් ආනයනය කරන කිසිදු අත්‍යවශ්‍ය ආහාර ද්‍රව්‍යයක මිල ඉහළ දමා නොමැති බව අත්‍යවශ්‍ය ආහාර ද්‍රව්‍ය ආනයනකරුවන්ගේ සංගමයේ මාධ්‍ය ප්‍රකාශක නිහාල් සෙනෙවිරත්න දේශයට ප්‍රකාශ කළේය. අත්‍යවශ්‍ය ආහාර ද්‍රව්‍යවල මිල ඉහළ ගොස් ඇති බවට ප්‍රචාරය වුවද එම තත්ත්වයට තම වෙළෙඳුන් සම්බන්ධ නැති බවද ඔහු කීවේය.
රජය මගින් ආනයනික තිරිඟු පිටි සඳහා කිලෝවකට රුපියල් තුනක බද්දක් පැනවුවද ලෝක වෙළෙඳපොළේ තිරිඟු පිටි මිල පහළ වැටී ඇති නිසා එම බද්ද මිලට බලනොපාන බව ඔහු වැඩිදුරටත් පැවසීය. එසේම ඇමෙරිකානු ඩොලරයට සාපේක්ෂව ගෙවිය යුතු රුපියල් ප්‍රමාණය අඩුව ඇති නිසා මිල පහළ යනු මිස ඉහළ යාමට කිසිදු හේතුවක් නැති බව ඔහු පෙන්වා දුන්නේය.
මෙම තත්ත්වය පිළිබඳ පාරිභෝගික සේවා අධිකාරියෙන් විමසූ විට එහි උසස් නිලධාරියකු පැවසුවේ බොහෝ ආහාර ද්‍රව්‍යවලට උපරිම මිලක් නියම කර නැති නිසා නීත්‍යානුකූලව කටයුතු කළ නොහැකි බවය. එසේ වුවද අධිකාරිය මෙම තත්ත්වය මර්දනය කිරීමට කටයුතු කරන බවද හෙතෙම පැවසීය.
