නව අල්ලස් කොමිසම දැන්ම නෑ
I දේශපාලන වාර්තාකරු
නව අල්ලස් දූෂණ කොමිෂන් සභාවක් පත්කිරීම දින නියමයක් නොමැතිව කල් දමා තිබේ. පසුගියදා රැස්වූ ආණ්ඩුක්‍රම ව්‍යවස්ථා සභාව ජාතික පොලිස් කොමිසම සඳහා සාමාජිකයන් පත් කළද අල්ලස් දූෂණ කොමිසම සඳහා සාමාජිකයන් පත්කිරීම තවදුරටත් කල් දැමීමට තීන්දු කළේ විශේෂ හේතුවක් මත බව වාර්තා වෙයි.
මේ වනවිට පාර්ලිමේන්තුවට ඉදිරිපත් කොට ඇති දූෂණ විරෝධී පනත මගින් අල්ලස් දූෂණ කොමිසම ස්ථාපිත කිරීමට අවශ්‍ය නව විධිවිධාන සලස්වා තිබේ. එබැවින් එම පනත සම්මත වීමට පෙර අලුතෙන් අල්ලස් දූෂණ කොමිසමක් පත්කිරීම නිෂ්ඵල ක්‍රියාවක් බව ව්‍යවස්ථා සභාවේ ජ්‍යෙෂ්ඨයන්ගේ මතය විය. ඒ අනුව දූෂණ විරෝධී පනත සම්මත වී නීතිගත වනතුරු පවත්නා අල්ලස් කොමිසම තවදුරටත් ක්‍රියාත්මක වනු ඇති වග දේශයට වාර්තා වෙයි.
එසේ වුවද ජාතික පොලිස් කොමිසම සඳහා හිටපු මහාධිකරණ විනිසුරු ලලිත් ඒකනායක මහතාගේ ප්‍රධානත්වයෙන් සාමාජිකයන් පත් කෙරිණි. එහෙත් මේ සතියේ පත්කිරීමට යෝජිතව තිබූ නව මැතිවරණ කොමිසම පත්කිරීමද සිදු නොවීය.