බදු ක්‍රමය අසාධාරණයි - ඩිව් ගුණසේකර
ඍජු බදු සොච්චමයි!
වක්‍ර බදු තොගයයි!
දේශපාලන වාර්තාකරු I
රජය දැන් මෙරට ජනතාවගෙන් 85%ත් 90%ත් අතර වක්‍ර බදු අයකරන අතර ඍජු බදු අය කරන්නේ 10%ත් 15%ත් අතර ගණනකින් බව ශ්‍රී ලංකා කොමියුනිස්ට් පක්ෂයේ සභාපති හා හිටපු අමාත්‍ය ඩිව් ගුණසේකර මහතා දේශයට කීය.
මේ නිසා රටේ බදු ප්‍රතිපත්තිය ඉතාම අසාධාරණ ලෙස ජනතාව පීඩාවට පත් කර තිබේ. ළඟදී නිකුත් වූ එක්සත් ජාතින්ගේ සංවර්ධන වැඩසටහනේ නවතම වාර්තාව අනුව දැනට රටේ ආදායම් බෙදී යාමේ විෂමතාව ද බෙහෙවින් පුළුල් වී තිබේ. ඒ අනුව රටේ සමස්ත වත්කම්වලින් 31% ක්ම භුක්ති විඳින්නේ සමස්ත ජනගහනයෙන් 1% ක ධනවතුන් පිරිසකි. සමස්ත වත්කම්වලින් 64% ක් භුක්ති විඳින්නේ 10% ක පිරිසකි. 5% ක් තරම් ඉතිරි සොච්චම් වත්කම් ප්‍රමාණය සෙසු ජනතාව භුක්ති විඳිති.
මේ තරම් ආදායම් විෂමතාවක් හා දරිද්‍රතාවක් ඇතත් ඒ ගැන අවබෝධ කර ගැනීමට අප රටේ ජනතාවට දේශපාලන සාක්ෂරතාවක් නොමැති බැවින් වැට් ආදී නොයෙක් බදු පනවා තවදුරටත් ජනතාව පීඩාවට පත් කරමින් සිටින බවද ඩිව් ගුණසේකර මහතා වැඩිදුරටත් පැවසීය. කෙසේ වෙතත් වැඩ කරන ජනතාවගේ පීඩනය වැඩි වී ඉදිරියේ විශාල වර්ජන රැල්ලක් නිර්මාණය වෙමින් තිබෙන බවද හෙතෙම සඳහන් කළේය.
