ලොකු ලූනු මිල නගී!

ප්‍රියන්ජන් සුරේෂ් ද සිල්වා I

පසුගියදා පාකිස්තානු රජය ලොකු ලූනු අපනයනය තහනම් කිරීමත් සමඟ මේ වන විට මෙරට වෙළෙඳපොළේ ලොකු ලූනු කිලෝවක මිල රුපියල් 750 ඉක්මවා තිබේ.

ලූනු ආනයනකරුවන් ප්‍රකාශ කරන්නේ මෙවැනි තත්ත්වයක් පැවතියද ඉදිරි කාලයේ ලූනු මිල අඩුවිය හැකි බවටය.

ශ්‍රී ලංකාවේ පරිභෝජනය සඳහා වසරකට ලොකු ලූනු මෙට්‍රික් ටොන් 2,80000ක් අවශ්‍ය වේ. රටේ පවතින පොහොර අර්බුදය හා අනෙකුත් හේතු මත මෙවර මෙරට ලොකු ලූනු නිෂ්පාදනය මෙට්‍රික් ටොන් 7000 දක්වා පහත වැටී ඇත. මෙරට ලොකු ලූනු අවශ්‍යතාව සපුරාලීම සඳහා ඉන්දියාවෙන් සහ පාකිස්ථානයෙන් ලොකු ලූනු ආනයනය කෙරුණු අතර පසුගිය වසරේ ඉන්දියාව ලොකු ලූනු අපනයනය නවතා දැමීය. එහෙයින් පසුගිය කාලයේ මෙරටට වැඩි වශයෙන් ලොකු ලූනු ආනයනය කළේ පාකිස්ථානයෙනි. 

පසුගිය සතියේ සිට පාකිස්ථානයද ලූනු අපනයනය නවතා දමා තිබේ. මේ වන විට චීනය, තුර්කිය හා ඕලන්දය වැනි රටවලින් ලොකු ලූනු ආනයනය කිරීමට ලොකු ලූනු ආනයනකරුවෝ පියවර ගනිමින් සිටිති. දැනට ඉන්දියාව පනවා ඇති ලොකු ලූනු අපනයන තහනම 2024 මාර්තු 31 වැනි දිනෙන් අවසන් වුවහොත් දැනට පවතින මිලට වඩා අඩු මිලට ලොකු ලූනු වෙළෙඳපොළට නිකුත් කළ හැකි බවද ඔවුහු සඳහන් කරති. 

පිටකොටුවේ ලූනු වෙළෙඳුන් සඳහන් කරන්නේ ජනතාව මිල අධික ලොකු ලූනු මිලදී ගැනීමෙන් බැහැර වී ඇති අතර රතු ලූනු සඳහා ඇති ඉල්ලුම ඉහළ ගොස් ඇති බවටය.

වෙළෙඳ අමාත්‍ය නලීන් ප්‍රනාන්දු සඳහන් කරන්නේ ලොකු ලූනු හිඟය මිල ඉහළ යාම පාලනය සඳහා මධ්‍යම ප්‍රමාණයේ රෝස ලූනු ප්‍රභේදය ආනයනය කිරීමට තීරණය කර ඇති බවයි.

මේ වන විටත් අවශ්‍ය ලූනු තොග ආනයනයට පියවරගෙන ඇති අතර ඒවිට වෙළඳ පොළේ ලූනු කිලෝවක් රුපියල් 400ත් 450ත් අතර මිලකට ලබාගත හැකි වනු ඇතැයිද ඔහු සඳහන් කළේය. මේ අතර පසුගිය සිකුරාදා වනවිට පෑලියගොඩ මැනිං තොග වෙළෙඳපොලේ ලොකු ලූනු කිලෝවක තොග මිල රුපියල් 480 - 500 අතර මිලක පැවැති බවට අනාවරණ විය.