නොගෙවූ බැඳුම්කර ගෙවන්න සාකච්ඡා
ප්‍රියන්ජන් සුරේෂ් ද සිල්වා I
ශ්‍රී ලංකාව 2022 වසරේ සිට ගෙවීම් පැහැර හැර ඇති ඇමෙරිකානු ඩොලර් බිලියන 12ක පමණ වන බැඳුම්කර ප්‍රතිව්‍යුහගත කිරීම සම්බන්ධයෙන් ශ්‍රී ලංකා බලධාරින් හා ආයෝජකයන් අතර සාකච්ඡා ලබන සතියේ ආරම්භ කෙරෙන බවට බ්ලූම්බර්ග් වෙබ් අඩවිය සඳහන් කර තිබේ.
විශේෂයෙන්ම ශ්‍රී ලංකාව මේ වසර අගදී ජනාධිපතිවරණය පැවැත්වීමට නියමිත බැවින් මෙම කටයුතු කඩිනම් කිරීම මෙහි අරමුණ යැයි එම වාර්තාව වැඩිදුරටත් සඳහන් කරයි.
මහ බැංකු අධිපතිවරයා සහ භාණ්ඩාගාර ලේකම්වරයා බැඳුම්කර හිමියන් සමඟ සාකච්ඡා කිරීම සඳහා යුරෝපයට යාමට නියමිත බව ජනාධිපති රනිල් වික්‍රමසිංහ මහතා මාර්තු 20 වැනිදා ප්‍රකාශ කර තිබේ.
විදේශ අමාත්‍ය අලි සබ්රි පසුගිය දා රොයිටර් පුවත් සේවයට ප්‍රකාශ කළේ තම විදේශ ණය ප්‍රතිව්‍යුහගත කිරීම අවසන් වූ පසු ඉදිරි වසර දෙක තුළ දළ වශයෙන් ඩොලර් බිලියන 5 ක විදේශ අරමුදල් ආකර්ෂණය කර ගැනීමට ශ්‍රී ලංකාව අපේක්ෂා කරන බවටය.
