ජල මූලාශ්‍ර 32ක් අවදානමේ
I කුසුම්සිරි විජයවර්ධන
අධික උණුසුම් කාලගුණ තත්ත්වය හමුවේ ජල මූලාශ්‍ර 32ක් අවදානම් තත්ත්වයට පත්ව ඇති බවත් රට පුරාම ජල සම්පාදන ක්‍රම 25ක ජලය මුර ක්‍රමයට ලබාදීමට පසුගිය බ්‍රහස්පතින්දා වනවිට කටයුතු කළ බවත් ජල සම්පාදන හා ජලපවාහන මණ්ඩලයේ නියෝජ්‍ය සාමාන්‍යධිකාරී අනෝජා කළුආරච්චි මහත්මිය දේශයට පැවසුවාය.
එමෙන්ම අඩු පීඩන තත්ත්වය සහ ජලය නොලැබීම සම්බන්ධ පැමිණිලි ලැබීම සියයට 30කින් ඉහළ ගොස් ඇති බවත් ඇය සඳහන් කළාය. ඇය සඳහන් කරන අන්දමට මේ වනවිට ජනතාවගේ ජල භාවිතය සියයට 20කින් පමණ ඉහළ ගොස් තිබේ.
මුර ක්‍රමය යටතේ ජලය ලබාදෙන ප්‍රදේශවලට ඉංගිරිය, බේරුවල, අලුත්ගම, නිවිතිගල සහ පැල්මඩුල්ල, නාරම්මල, අංකුඹුර, කුණ්ඩසාලේ, මැදදුම්බර, ගම්පොළවත්ත, පුස්සැල්ලාව, මීවතුර, පුස්සැල්ල, හැටන්, රත්තොට, කොටගල, ඌරුබොක්ක, බුත්තල, සූරියආර, ඌරුබොක්ක ආදී කලාප රාශියක්ම අයත් වේ. මුර ක්‍රමයට ජලය සැපයීමට පියවර ගෙන ඇති ප්‍රදේශවල ඇතැම් ප්‍රාදේශීය බෙදාහැරීම් මධ්‍යස්ථානවල ජලය බෙදාහැරීම නිශ්චිත කාලසටහනක් අනුව සිදුකරන බවත් කළුආරච්චි මහත්මිය පැවසුවාය.
ජල පිරිපහදු යන්ත්‍රාගාරවලින් උපරිම ධාරිතාවයෙන් ජලය නිකුත් කළත් අධික භාවිතය නිසා එය සපුරාලීමට අසමත් වී ඇතැයි ද ඇය සඳහන් කළාය.
කාලගුණ විද්‍යා දෙපාර්තමේන්තුවේ දින 10 පුරෝකථනය අනුව කැලණි ගංගා නිම්නයේ පෝෂක ප්‍රදේශවලට ඉදිරි දිනවල මඳ වැසි තත්ත්වයක් පෙන්නුම් කරන බව ද අප්‍රේල් මාසයේ බස්නාහිර, සබරගමුව සහ දකුණු පළාත්වලට වැසි බලාපොරොත්තු වන බව ද නියෝජ්‍ය සාමාන්‍යාධිකාරිවරිය සඳහන් කළාය. ජලය හිඟ පෙදෙස්වලට ජලය සැපයීමට බවුසර් 150 ක් සූදානමින් තබා ඇති බවත් ඇය වැඩිදුරටත් පැවසුවාය.
