පාස්කු ප්‍රහාර චෝදනා - හිටපු ජනපති ජනපති කොමිසමක් හමුවට!
දේශපාලන වාර්තාකරු I
පාස්කු බෝම්බ ප්‍රහාරය සිදු කළ තැනැත්තන් කවුද කියා තමන් දන්නා බව ප්‍රකාශ කළ හිටපු ජනාධිපති මෛත්‍රීපාල සිරිසේන මහතාට විශේෂ ජනාධිපති පරීක්ෂණ සභාවක් හමුවේ පෙනී සිට ඊට අදාළ සාක්ෂි සහිතව තොරතුරු ඉදිරිපත් කරන ලෙස නියම කර ඇත.
එම පරීක්ෂණ සභාවේ සභාපතිත්වය දරන්නේ හිටපු ශ්‍රේෂ්ඨාධිකරණ විනිසුරු අයි.එම්. ඉමාම් මහතාය. 2023 වසරේ සැප්තැම්බර් මස ප්‍රචාරය කළ චැනල් 4 නාලිකා චිත්‍රපටයකින් පාස්කු ප්‍රහාරය ගැන හෙළිදරව් කළ කරුණු විමර්ශනය ඇතුළු පාස්කු ප්‍රහාරයට අදාළ විමර්ශන මෙම පරීක්ෂණ සභාවට පැවරී ඇති රාජකාරියයි.
එම පරීක්ෂණ සභාවේ ප්‍රධාන ලේකම්වරිය වන එස්. මනෝහරන් මහත්මිය විසින් හිටපු ජනාධිපති මෛත්‍රීපාල සිරිසේන මහතා වෙත මීට අදාළ ලිඛිත නියෝගය පසුගිය බ්‍රහස්පතින්දා යවනු ලැබීය. ඒ අනුව අප්‍රේල් මස 02 දින එකී පරීක්ෂණ සභාව හමුවේ පෙනී සිටින ලෙසත් එදිනට ඔහු විසින් සිදු කළ ප්‍රකාශයට අදාළ සියලු සාක්ෂි රැගෙන එන ලෙසත් අදාළ ලිඛිත නියෝගයෙහි සඳහන්ය.
ඒ අතර ලබන අප්‍රේල් 04 දා මාලිගාකන්ද මහේස්ත්‍රාත් අධිකරණයේ පෙනී සිට පාස්කු ප්‍රහාරය සම්බන්ධයෙන් තමන් දන්නා කරුණු ඉදිරිපත් කරන ලෙස මාලිගාකන්ද මහේස්ත්‍රාත්වරිය හිටපු ජනාධිපති මෛත්‍රීපාල සිරිසේන මහතාට නියෝග කර ඇත.