ආර්ථික පරිවර්තන පනත වහලා ගහලා - මහාචාර්ය අමින්ද මෙත්සිල පෙරේරා
යසවර්ධන රුද්රිගූ I
දැනට ගැසට් මගින් ප්‍රකාශයට පත්කර ඇති ආර්ථික පරිවර්තන පනත පිටු 168 කින් යුක්ත වන අතර එහි අඩංගු සමහර වගන්ති පැහැදිලි නොමැති මෙන්ම ඇතැම් ඒවා ''වනලා ගහලා'' ඇති බවක් පෙනෙන්නේ යැයි ශ්‍රී ලංකා වයඹ විශ්වවිද්‍යාලයේ ආර්ථික විද්‍යා හා මූල්‍ය අංශයේ මහාචාර්ය අමින්ද මෙත්සිල පෙරේරා පවසයි.
මෙවැනි පනතක් නීතියක් බවට පත්කිරීමට වඩා එය ප්‍රතිපත්තියක් බවට හරවා ජනතාවට ඒත්තු ගැන්වූවා නම් වඩා වැදගත් බව ඔහු අවධාරණය කළේය.
මේ අනුව අලුතින් ආයතන හයක් ස්ථාපිත කිරීමට යෝජනා කර ඇති නමුත් එයින් සිදුවන්නේ දැනටමත් අධික යැයි පවසන රාජ්‍ය ආයතන සංඛ්‍යාව තවත් වැඩිවීම බව හෙතෙම කියයි. යෝජිත පරිවර්තන සාර්ථක කර ගැනීමට නම් කළ යුතුව ඇත්තේ එක ආයතනයක් පිහිටුවා එය යටතේ අදාළ අංශ ස්ථාපනය කිරීම බව ඔහු වැඩිදුරටත් පැවසීය. මෙලෙස ආයතන රුසක් බිහිකිරීමෙන් ආයෝජක ව්‍යවසායකයන් තව තවත් හිරිහැරයට ලක්වන අතර වංචාව හා දූෂණයට තවදුරටත් ඉඩ දීමක් වන බවද මහාචාර්යවරයා පැවසීය.
