ආදිවාසීන්ට කැලෑ ඖෂධ ලබාගන්න අවසර: නව පනතක් එයි
කුසුම්සිරි විජයවර්ධන I
ආදිවාසීන් වන සංරක්ෂණ දෙපාර්තමේන්තුවේ වනාන්තරවලින් ඖෂධ වර්ග ලබාගැනීම සම්බන්ධයෙන් නව රෙගුලාසි පද්ධතියක් කඩිනමින් සකස් කිරීමට පසුගියදා පාර්ලිමේන්තුවේදී පැවැත්වූ ආදිවාසී ජනතාව පිළිබඳ පනතක් සකස් කිරීමේ සාකච්ඡාවේදී තීරණය කෙරැණි.
සති තුනක් තුළ අදාළ රෙගුලාසි පිළිබඳව නිර්ණායක ලබාදීමට නියමිත අතර ඖෂධ වර්ග නෙලීම සිදු කළ හැකි ආදිවාසී ජනතාවට වනජීවී අධ්‍යක්ෂ ජනරාල්වරයා විසින් අවසර පත්‍රයක් නිකුත් කිරීමට නියමිත බවත් වාර්තා වේ.
ආදිවාසී ජනතාව මුහුණදෙන ගැටලුවලට විසඳුම් ලබාදීමට නව පනතක් සකස් කිරීමට රජය තීන්දු කළේය. ඒ අතර ඔවුන්ගේ අයිතිවාසිකම් සුරක්ෂිත කිරීම සඳහා රෙගුලාසි පද්ධතියක් සකස් කිරීමට අධිකරණ, බන්ධනාගාර කටයුතු ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය විජයදාස රාජපක්ෂ මහතාගේ මූලිකත්වයෙන් වනජීවී හා වන සංරක්ෂණ හා වාරිමාර්ග අමාත්‍ය, පවිත්‍රාදේවී වන්නිආරච්චි මහත්මියගේ ප්‍රධානත්වයෙන්, ආදිවාසී නායක ඌරැවරිගේ වන්නිලා ඇත්තන්ගේ සහභාගිත්වයෙන් පසුගියදා එම සාකච්ඡාව සිදු විය.
නව පනත් කෙටුම්පත දැනට අමාත්‍ය මණ්ඩලය වෙත ඉදිරිපත් කර ඇති බවත්, පනත සඳහා ඇතුළත් කිරීමට නොහැකි කරැණු රෙගුලාසි යටතේ නීතිගත කිරීමට පියවර ගන්නා බවත් අධිකරණ අමාත්‍යවරයා මෙහිදී පැවසීය. ඇමැතිවරයා වැඩිදුරටත් සඳහන් කළේ මේ පනත එක්සත් ජාතීන්ගේ ප්‍රඥප්තියට අනුකූලව ආදිවාසීන් ගැන මානුෂිකව සලකා බලා ඉදිරිපත් කරන බවයි. ආදිවාසී ජනතාව වනාන්තරවලින් ඖෂධ එකතු කිරීම කරන විට ඒවා ආරක්ෂා වන පරිදි කටයුතු කළ යුතු ආකාරය පිළිබඳව වනජීවී දෙපාර්තමේන්තුව විසින් රෙගුලාසි පද්ධතියක් මේ වනවිට සකස් කරමින් පවතින අතර, ඒ පිළිබඳව තවදුරටත් අධ්‍යයනය කිරීම සඳහා විශේෂඥ කමිටුවක් ද පත් කර තිබේ.
