ණය ප්‍රතිව්‍යුහයේ බිල් ගෙවන්න ඩොලර් මිලියන 11.5 ක්
ප්‍රියන්ජන් සුරේෂ් ද සිල්වා I
විදේශ ණය ප්‍රතිව්‍යුහගත කිරීම සහ ඒ සඳහා අවශ්‍ය උපදේශනය ලබාගැනීම සඳහා අමාත්‍ය මණ්ඩල අනුමැතිය මත ලසාර්ඩ් ෆ්‍රාන්ස් සමාගමට 2024–07- 31 දිනට ඇමෙරිකානු ඩොලර් මිලියන 6.9ක් ද ක්ලිෆඩ් චාන්ස් සමාගම විසින් සපයන ලද නීති උපදේශන සේවා සඳහා 2024 නොවැම්බර් මාසය වන තෙක් ඇමෙරිකානු ඩොලර් මිලියන 4.6ක් ද ගෙවා ඇතැයි මුදල් රාජ්‍ය අමාත්‍ය ශෙහාන් සේමසිංහ මහතා පාර්ලිමේන්තුවේ දී ප්‍රකාශ කළේය.
මේ සම්බන්ධයෙන් මුලින් ටෙන්ඩර් කැඳවීමේදී ගෙවීමට නියමිත වූ මුදල ඇමෙරිකානු ඩොලර් මිලියන 5.4ක් යැයි මුදල් අමාත්‍යංශය ප්‍රකාශ කර තිබූ අතර එම මුදලට වඩා වැඩි මුදලක් මෙම ආයතන සඳහා ගෙවා තිබේ. ණය ප්‍රතිව්‍යුහගතකරණ ක්‍රියාවලිය සංකීර්ණ ක්‍රියාවලියක් වූ හෙයින් මෙම ආයතනයන්හි සේවය ලබා ගැනීමේ කාලය දීර්ඝ කිරීමට සිදු වූ බවත් මෙම කාර්යය කෙදිනක අවසන් විය හැකිදැයි ප්‍රකාශ කළ නොහැකි බවත් ණය ප්‍රතිව්‍යුහගත කිරීමේ ක්‍රියාවලිය අවසන් වන තෙක් මෙම ආයතන දෙකෙහි සේවය ලබා ගැනීමට සිදුවන බවත් රාජ්‍ය අමාත්‍යවරයා වැඩිදුරටත් සඳහන් කළේය.
