වී තොග හිඟයෙන් පුංචි මෝල්කරුවෝ කම්මුතුයි!
ප්‍රියන්ජන් සුරේෂ් ද සිල්වා I
තමන් සතුව වී තොග නොමැති බැවින් සුළු හා මධ්‍ය පරිමාණ වී මෝල්වලින් සියයට හැත්තෑවකට ආසන්න සංඛ්‍යාවක් වැසී ගොස් ඇතැයි ශ්‍රී ලංකා සුළු හා මධ්‍ය පරිමාණ වී මෝල් හිමියන්ගේ සංගමයේ සභාපති පී.කේ. සේමසිංහ මහතා සඳහන් කරයි.
රටේ සමස්ත වී නිෂ්පාදනයෙන් වැඩි ප්‍රමාණයක් බියර් සහ සත්ත්ව ආහාර නිෂ්පාදනයට යොදා ගැනීම මත මෙම තත්ත්වය උද්ගතව ඇතැයි ද පසුගිය දශකයක පමණ කාලය තුළ සුළු හා මධ්‍ය පරිමාණ සහල් කර්මාන්තකරුවන් දස දහසකට ආසන්න පිරිසකගේ ව්‍යාපාර වැසී ගොස් ඇති අතර මේ වන විට ඉතිරිව ඇත්තේ සහල් මෝල් හත්සියයක පමණ සංඛ්‍යාවක් බවද ඒ පිරිසද අධික ණය බරකින් මිරිකී සිටිතියි ද ඔහු සඳහන් කරයි.
වී තොග පැවතියද පවතින පාලන මිලට සහල් ලබා දීමට හැකියාවක් නොමැති බවත් රුපියල් 220 ක පාලන මිලට සහල් ලබාදීමට නම් වී කිලෝවක මිල රුපියල් 110 ත් 120 ත් අතර අගයක පැවතිය යුතු බවත් මේ වන විට වෙළෙඳපොළේ වී කිලෝවක් 145 ත් 148 ත් අතර අගයක පවතින බැවින් එම මිලට වී ගෙන පාලන මිලට සහල් ලබා දිය නොහැකි බවත් ඔහු සඳහන් කරයි.
දැනට පවතින සහල් හිඟයට පිළියමක් ලෙස ආණ්ඩුව සහල් ආනයනය කිරීමට ගෙන ඇති තීරණය සම්බන්ධයෙන් විරෝධයක් නොමැති වුවද දීර්ඝ කාලීනව සහල් ආනයනය කළහොත් සුළු හා මධ්‍ය පරිමාණ සහල් කර්මාන්තය සම්පූර්ණයෙන්ම බිඳ වැටීමට ලක් විය හැකිය. වී අලෙවි මණ්ඩලය නැවත සක්‍රිය කොට එමගින් මිලදී ගන්නා වී සුළු හා මධ්‍ය පරිමාණ වීමෝල් හිමියන්ට ලබා දී සහල් බවට පත්කොට සමූපකාර සහ සතොස ඇතුළු ආයතන මගින් පාරිභෝගිකයාට සහල් කිලෝවක් රුපියල් 220 කට වඩා අඩු මිලකට ලබා දිය හැකි බවද ඔහු සඳහන් කරයි.