අහිමිවීම් දරාගෙන ජීවිතය ආදරයෙන් සිපගන්න!
ගිම්හානයේ ගිලන් වී කෘෂව සුදුමැලිව
ඇදි ඇදී ඉකි ගැසූ ගඟ නැවත පිරිපුන්ය
දුෂ්කරය කියා හැර යා යුතුද ජීවිතය
කටු පොකුර සිප ගනිමි හෙට මලක් වනු පිණිස
රත්න ශ්‍රී විජේසිංහ කවියාණන් ලියූ වස්සානේ කවි පොතේ එන එම කවිය වරෙක නිරුදක හිස් බිමක් ලෙස කෙනකුට හැඟෙන ජීවිතය සාර සුබාවට අස්වද්දන්නට, ජීවිතය යන කටු අත්තේ මල් පුබුදන්නට සියුම්ව ගැඹුරුව කියා දෙන අපූරු කවියකි.
සංසාර වීදියෙන් වීදියට අපි යන මේ අනන්ත දුර චාරිකාවේ එක් භවයක එක් නැවතුමකට අපි ජීවිතය යැයි කියමු. සංසාරය යනු මහා සාගරයක් නම් මරණයේ තොටුපොළ තෙක් අපි පැද යන යාත්‍රාවට අපි ජීවිතය යැයි කියමු.
ජීවත්වීම යනු ජීවිතය නම් එම අවිනිශ්චිතය නිශ්චිතයන්ගෙන් පුරවන්නට අප දරණ සොඳුරු වෙහෙස යැයි මට සිතේ.
ජීවිතය වෙනුවෙන් පෙරවදන් ලියද්දී දුක සැප, නින්දා ප්‍රශංසා, යස අයස, හිමි අහිමි, වේදනා, පසුතැවීම්, කලකිරීම්, ජය පැරදුම් ගැන කියා දෙන සංසිද්ධීන් අත්නොවිඳින කෙනකු මේ ලෝකයේ නොමැත.
එය ලෝක ස්වභාවයයි. යථාර්ථයයි. එහෙත් ජීවත්වීම යනු ජීවිතයේ කවර දෙයක් අහිමි වුවද මඟහැරුණද කම්පාව නැවත අකම්පාවකට පරිවර්තනය කර ගනිමින් ගිරිහිස දකින තෙක් මහා කන්දක් ඉවසිලිවන්තව නැග යන ගමනකි.
ජීවිතයේ ඇතැම් අත්දැකීම් ඔබව වේදනාවට පත් කරයි. වේදනාව තුළින් කලකිරීම උපදියි. කලකිරීම තුළින් පසුතැවීම ඇතිවෙයි. එහි අවසානය ජීවිතය අසුරු සැණෙකින් අත්හැර දමන්නට සිත්වෙන මානසිකත්වය වීමට හැකිය.
එහෙත් එම අත්හැරීම තුළ ඔබට ලැබෙන්නේ මොනවාද?
කිසිවක් නොමැත. ඔබ ප්‍රාර්ථනා කරන සැනසීම, නිර්වාණය, මෝක්ෂය, මේ කිසිවක් කලකිරීමෙන් ජීවිතය අත්හැරීම තුළ ඔබට ලැබෙන්නේ නැත.
ජීවිතය අත්හැරීමට හේතු දාහක් තිබියදී ජීවත්වීම වෙනුවෙන් එක හේතුවක්, එක අරමුණක් සොයා ගිය මිනිසුන් ජීවිතය දිනති.
වර්තමාන තරුණ තරුණියන් බොහෝ දෙනකු ජීවිතයේ අහිමිවීම් හමුවේ ජීවිතය අත්හරින අවස්ථාද ඇත. ඔවුහු සියලු බලාපොරොත්තු අත්හරිති. එම බලාපොරොත්තු අධ්‍යාපනය පිළිබඳව වීමට හැකිය. වෘත්තීය බලාපොරොත්තු වීමට හැකිය. ආදරය, විවාහය පිළිබඳ බලාපොරොත්තු වීමට හැකිය.
මට මා අහිමි නොවන තාක් මා ශක්තිමත්ය යන මානසිකත්වයට සපැමිණි මිනිසුන් අභිමානවත් මිනිසුන් ලෙස ඉතිහාසයට එක්වෙති.
මා විශ්වාස කරන සත්‍යයකි. සොබාදහමේ අසිරිමත් න්‍යායන්, සාහිත්‍යයේ ගැඹුරු ඉසව්වන්, ආගම් තුළ දිගහැරෙන දර්ශනයන් තුළින් මනස පෝෂණය කරගත් මිනිසුන් කෙදිනකවත් තමන්ගේ චින්තනය ඇදහිලි තුළ ලඝු කරන්නේ නැත.
ඔවුහු සියල්ල විනිවිද තමන්ට අවැසි ජීවිතය සහ අරමුණු සියලු දුෂ්කරතා, අභියෝග මධ්‍යයේ වුවද සොයාගෙන යති. ආචාර්ය අබ්දුල් කලාම්, ලීක් වාන් යූ, වාරිස් ඩයිරි වැනි චරිත උදාහරණ වශයෙන් දැක්විය හැකිය.
ජීවිතය මුණගැසෙන්නේ හමුවෙන තෙක් බලා සිටීම තුළ නොව, එය සොයා යාම තුළිනි. ජීවිතය යනු සමාජයේ ස්වාධීනව ජීවත්වීම පමණක් නොවන බව ශ්‍රේෂ්ඨ දාර්ශනිකයන්ගේ ඉගැන්වීම් අනුගමනය කරන අය හොඳින් දනිති.
බොහෝ විට බොහෝ මිනිසුන් තම පැවැත්ම නොසලකා හරින අතර තම ජීවිතයේ වටිනාකම අමතක කරන බව බොහෝ විට දක්නට ලැබේ. නමුත් ඔවුන්ගේ සමාජ තත්ත්වය සහ බැඳීම්, සංස්කෘතිය, ආර්ථික පසුබිම සහ ජීවිතය පිළිබඳ සමස්ත දැක්ම නොසලකා ජීවිතය සැමට එක සේ වැදගත් බව කිව යුතු දෙයකි.
මිනිසුන් තම එදිනෙදා ජීවිතයේදී ඇතිවන දුෂ්කරතා සහ අභියෝග සමඟ සාර්ථකව කටයුතු කිරීමට සහ සමාජයේ මුහුණ දෙන බාධකවලින් නැගී සිටීමට අවශ්‍යයි. ඔවුහු බොහෝ විට ඔවුන්ගේ ජීවිතයේ සැබෑ අරුත අමතක කිරීමට නැඹුරු වෙති. ඔවුන්ගේ ජීවිතය වැදගත් වන්නේ මන්දැයි ඔවුන් තේරුම් ගත යුතු කාලය පැමිණ තිබේ.
පරාජයවීම්, කඩාවැටීම්, බිඳවැටීම් හමුවේ සැමවිටම ජීවිතයට නව මානයක් එක් කරන්න.
ඔබ බොහෝ විට ජීවිතය හා එහි දෛනික තත්ත්වයන් සමඟ කටයුතු කිරීමට අපොහොසත් වන පුද්ගලයන්ගෙන් කෙනකු නම් සහ ඔබේ ජීවිතය වඩාත් අර්ථවත් කර ගැනීමට නව මානයක් අවශ්‍ය නම්, ඔබට යම් ආකාරයකින් ඔබව දැනුවත් කළ හැකි අදහස් කිහිපයක් අනුගමනය කළ හැකිය.
සැමවිටම නව ආශාවක් සොයාගන්න. මිනිසුන්ට ඔවුන්ගේ සැබෑ ආශාව සොයා ගැනීමට හැකි වූ පසු, ඔවුන්ගේ සැබෑ ඇමතුම කොතැනද යන්න තේරුම් ගැනීමටද ඔවුන්ට හැකිවෙයි. මෙය ඔබට ජීවිතයේ හොඳ වටිනාකමක් සහ වැදගත්කමක් ලබාගැනීමට උපකාරී වෙයි. එවිට ඔබට ජීවිතය කෙරෙහි ධනාත්මක ආකල්පයක් වර්ධනය කර ගැනීමටත් බොහෝ සාර්ථකත්වයන් ලබාගැනීමටත් හැකිවනු ඇත.
යහපත් ක්‍රියාවන්හි ඔබම සම්බන්ධ වීමෙන් සහ මිනිසුන්ට උපකාර කිරීමෙන් ඔබට අන් අයට ඉගෙනීමේ ආදර්ශයක් තැබීමට හැකිය. ඔබට පසුතැවීම් සහ අහිමිවීම් සමඟ වඩාත් තෘප්තිමත් සහ සතුට පිරුණු ජීවිතයක් ගත කිරීමට හැකිය. අන් අයට බලපෑම් කිරීමෙන්, ජීවිතයේ සැබෑ අරුත අන් අයට ඉගැන්වීමට සහ ධනාත්මක ආදර්ශයක් තැබීමට ඔබට හැකිවනු ඇත.
අහිමිවීම්, බිඳවැටීම්, කඩාවැටීම් හමුවේ ජීවිතය කෙරෙහි ධනාත්මක ආකල්පයක් ඇතිකර ගැනීම වැදගත්ය. ජීවිතය කෙරෙහි ධනාත්මක ආකල්පයක් වර්ධනය කර ගැනීමෙන්, නරක සිතුවිලි සහ සීමාවන් සඳහා ඇති ඉඩකඩ ද බොහෝ දුරට අවම වෙයි. ඔබ වටිනා බව තේරුම් ගත යුතු අතර, ජීවිතය කෙරෙහි වඩාත් උද්‍යෝගිමත් සහ අධිෂ්ඨානශීලී විය යුතුය.
අහිමිවීම්, බිඳවැටීම්, කඩාවැටීම් හමුවේ ඔබගේ අභියෝග ජය ගන්න. ඔබගේ බිය සහ අභ්‍යන්තර කැළඹිලි මැඩපවත්වා ගැනීමෙන් පසු, ඔබට සාමය උදාකර ගැනීමෙන් ඔබගේ ජීවිතය යහපත් ආකාරයෙන් ගෙන යාමට හැකිවෙයි. ඔබ තුළ ඇති හොඳම දේ පිටතට ගෙන ඒම සඳහා ඔබේ අභ්‍යන්තර අඩුපාඩු හදාගන්න.
අහිමිවීම්, බිඳවැටීම්, කඩාවැටීම් හමුවේ ඔබේ අභ්‍යන්තර ශක්‍යතාව සහ කුසලතාව සොයන්න. ඔබ ඔබේ දක්ෂතා සහ ශක්තිමත් හැකියාවන් හඳුනා ගත් පසු, ඔබට ජීවිතයට වෙනස් අරුතක් එක් කිරීමට හැකිවෙයි. ඔබේ දක්ෂතා සහ හැකියාවන් ගැන ඔබ දැනුවත් වන බැවින්, ඔබ ජීවිතය පිළිබඳ වඩාත් විශ්වාසයක් හා ශක්තිමත් බවක් ඇතිවනු ඇත.
අහිමිවීම්, බිඳවැටීම්, කඩාවැටීම් හමුවේ ජීවිතයෙන් පලා යෑම වෙනුවට වඩාත් සාමකාමී ජීවිතයක් සොයන්න. ජීවිතයේ අරුත සාමාන්‍යයෙන් පුද්ගලයකුගේ පෞද්ගලික අදහස්, විශ්වාසයන් සහ සාරධර්මවලට විෂය වන බැවින්, එවැනි ප්‍රශ්නවලට පිළිතුරු සෙවීමට මිනිසුන් අසමත් වෙති. නමුත් ඉහත සඳහන් කළ අංශවල සහාය ඇතිව ඔවුන්ට ජීවිතයට නව අරුතක් සොයාගත හැකි අතර අනාගතයේදී වැඩි සාමයක් සහ තෘප්තියක් ලබාගන්නට හැකිවනු ඇත.
අහිමිවීම්, බිඳවැටීම්, කඩාවැටීම් හමුවේ ජීවිතයෙන් පලා යෑම වෙනුවට සාර්ථක වීමෙන් ජිවිතය වර්ණවත් කර ගැනීමට හැකිය. අධ්‍යාපනයෙන් අසාර්ථක වන තරමට උත්සාහය අත් නොහරින්න. එවිට ඔබ සාර්ථක වනු ඇත. වෘත්තීය ජීවිතය අසාර්ථක වන තරමට උත්සහය අත් නොහරින්න. එවිට ඔබ සාර්ථක වනු ඇත. ආදරය, විවාහය යන අංශවලින් අසාර්ථක වන තරමට ජීවිතයෙන් පලා නොයා යුතුය. අසාර්ථක අත්දැකීම් ජීවිතයට පාඩම් ලෙස ගෙන ජීවිතය සාර්ථක කරගත් තරමට සතුටින් ජීවත් වීමට හැකිය.