රට හැර යන ස්නායු විශේෂඥ දොස්තරලා
මේ වනවිට රටේ තිබෙන දරුණු ආර්ථික අර්බුදය සමග බොහෝ වෘත්තිකයෝ උපන් බිම අතහැර විදෙස්ගත වෙති. ඉංජිනේරුවන්, තාක්ෂණවේදීන් ඇතුළු විවිධ වෘත්තිකයෝ විශාල පිරිසක් ලංකාව අතහැර මේ වනවිට විදෙස්ගත වෙමින් සිටිති. ඒ අතර වෛද්‍යවරුන් මෙන්ම විශේෂඥ වෛද්‍යවරුද සිටිති. මේ ආකාරයට වෛද්‍යවරුන් විදෙස්ගත වීම සම්බන්ධයෙන් සමාජයේ වැඩි අවධානයක් කතාබහක් යොමුවන්නේ වෛද්‍ය වෘත්තියේ ඇති වෘත්තියකට එහා ගිය සමාජ වගකීම හේතුවෙනි. මෙලෙස විදෙස්ගත වන වෛද්‍යවරුන් අතර කොළඹ හතේ ඩග්ලස්ලාගේ පොඩි බේබිලා වගේම මහඉලුප්පල්ලම බණ්ඩයියාගේ ලොකු කොලුවා, තිස්සමහාරාමයේ සිරියලතාගේ පොඩි කෙල්ලත් සිටින්නට පුළුවන.
සෞඛ්‍ය ක්ෂේත්‍රයේ දැනටත් ඇතැම් විෂයයවලට වෛද්‍යවරුන් විශාල පිරිසකගේ හිඟයක් පවතී. මේ ආකාරයට දැනටත් පුරප්පාඩු මැද වෘත්තීන්වල නිරත වන වෛද්‍යවරුන් පිරිසත් අනාගතයේදී නොමැති වීම මෙරට ජනතාව මුහුණ දෙන බරපතළම ඛේදවාචකය වන්නේය. එහි පාඩුව ගණනය කළ නොහැකිය.
අක්ෂි ස්නායු පටක වෛද්‍යවරුන් ඇතුළු වෛද්‍යවරුන් විදෙස්ගත වූ බව කියන සිදුවීම් සම්බන්ධයෙන් නිවැරුදි තොරතුරු විමසීමට සෞඛ්‍ය අමාත්‍යංශය දුරකතනයෙන් සම්බන්ධ කරගත් අවස්ථාවේදී ලේකම් කාර්යාලයෙන් දැනුම් දීම මත එහි අතිරේක ලේකම් (වෛද්‍ය සේවා) සුනිල් ද අල්විස් මහතා සම්බන්ධ කරගැනීමට අපි උත්සාහ කළෙමු. එම අවස්ථාවේදී නිලධාරිනියක් තොරතුරු ලබාදීම ප්‍රතික්ෂේප කළාය. නිසි බලධාරීන් ලෙස කටයුතු කරන සෞඛ්‍ය අමාත්‍යංශය තොරතුරු ලබාදීම ප්‍රතික්ෂේප කළ පමණින් පුවත්පත් ලිපිය පළ නොවේ යැයි යමකු සිතනවා නම් ඔහු හෝ ඇය සතු දැනුම පිළිබඳ අපි කනගාටු වන්නෙමු.
එම වාර්තාවට අනුව 2024 - 25 වනවිට වෛද්‍ය ක්ෂේත්‍රයේ සිටිය යුතු බවට නිගමනය කර ඇති වෛද්‍යවරුන් සංඛ්‍යාව 4000ක් පමණ වුවද මේ වනවිට සේවයේ යෙදී සිටිනුයේ 2203 කි. මේ වනවිට සමස්ත රෝහල් පද්ධතියේම විශේෂඥ වෛද්‍යවරුන් 333ක හිඟයක් පවතී.
අක්ෂි විශේෂඥ වෛද්‍යවරුන් 138 කින් සිටින්ෙන් 57ක් වන අතර අක්ෂි පටක විශේෂඥ 17න් මේ වනවිට සිටිනුයේ 13කි. සායනික පෝෂණවේදී 100 කින් මේ වනවිට සිටිනුයේ 8 දෙනකු වන අතර හෘද රෝග විශේෂඥයන් 103න් මේ වනවිට සිටිනුයේ 62 කි. වකුගඩු රෝග විශේෂඥයන් 127න් 33ක්ද, මනෝ වෛද්‍ය විශේෂඥයන් 134න් 67ක්ද, ළමා මනෝ විශේෂඥයන් 25න් 11ක්ද, විකිරණවේදී 242න් 73ක්ද, අධිකරණ වෛද්‍ය නිලධාරීන් 71න් 45ක්ද මේ වනවිට සේවයේ යෙදී සිටිති. එසේම ස්නායු විශේෂඥයන් 77න් මේ වනවිට සිටිනුයේ 33කි. උගුර කන නාසය පිළිබඳ ශල්‍ය විශේෂඥයන් 83න් මේ වනවිට සිටිනුයේ 46කි.
නිදහස් අධ්‍යාපනයේ ප්‍රතිලාභ යටතේ වෛද්‍යවරයකු බිහිකිරීම සඳහා රජය වසරකට විශාල මුදලක් වැයකරයි. එසේම අනිවාර්ය විදේශ පුහුණුව සඳහා වසරකට වෛද්‍යවරුන් සැලකිය යුතු සංඛ්‍යාවක් එංගලන්තය, ඕස්ට්‍රේලියාව, නවසීලන්තය වැනි රටවලට පිටත් කර හරින අතර ගුවන් ටිකට් පතේ සිට දීමනා රැසක්ද ඔවුන්ට සපයයි. විදේශ ගතවීමට පෙර සෞඛ්‍ය අමාත්‍යංශය සමඟ ගිවිසුම්ගත විය යුතු අතර පුහුණුවෙන් පසු වසර 8ක් අනිවාර්යයෙන් සේවය කළ යුතුය. එසේම වෛද්‍යවරයකුගේ පත්වීම් ලිපියේද සඳහන් වන්නේ ඔවුන් 1961 අනිවාර්ය සේවා පනතට යටත් බවයි. පසුගිය කාලයේ මෙරට ඇතිවූ ඩොලර් අර්බුදය හේතුවෙන් විශේෂඥ වෛද්‍යවරුන්ගේ අනිවාර්ය විශේෂඥ පුහුණුව තාවකාලිකව නවතා දැමූ අතර එය පෞද්ගලික වියදමින් සිදුකරගෙන යාමට හැකි ලෙස සංශෝධනය සිදුකර ඇත.
උගතුන් බුද්ධිමතුන් උපන් බිම හැරදා යාම යන බුද්ධි ගලනයට මහා පොදු සාධකය බවට පත් වන්නේ ආර්ථික බෙලහීනතාවයි. දහදිය සුවඳින් උගෙන නිදහස් අධ්‍යාපනයේ උපරිම ඵල නෙළාගත් ඔවුන් අධ්‍යාපනයේ හිනිපෙත්තටම ගිය ඉනිමගට පයින් ගසනුයේ උපන් මවුබිම, පන්තිය අමතක කරමිනි. ඈත අහස් කුස වරල් සැලී දිදුලන පාට සව්කොළයෙන් පිරුණු සරුංගලය ලස්සනට නිමවූයේ අන් කිසිවකින් නොව මෙරට පීඩිත ජනතාවගේ හයියෙනි. ඒ සරුංගලය අද වනවිට සත් සමුදුරෙන් එහා ඈත අහස් ගව්ව සොයමින් ඉගෙන ගත් දැනුම විකුණති. අසූව දශකයේත් කළු ජූලියත් සමග රටේ උගත් බුද්ධිමත් තරුණ විද්‍යාර්ථීහු රට හැර ගියහ. මහැදුරු සුනිල් ආරියරත්නයන් දශක ගණනාවකට පෙර කියූ අනාගත වාක්‍යය වර්තමානයේදීත් යථාර්ථයක් බවට පත්වී තිබේ.