විවාදය ගැනත් විවාදයක්
ඉතිහාසයේ ප්‍රථම වරට ජනාධිපතිවරණයකට ඉදිරිපත් වූ අපේක්ෂකයන් එකම වේදිකාවක සංවාදයකට සහභාගී වන අවස්ථාව එළඹෙන සැප්තැම්බර් 7 වැනිදා උදාවීමට නියමිතය. ලොව දියුණු රටවල් මැතිවරණවලදී ජනතාව දැනුවත් කිරීම සඳහා භාවිත කරනු ලබන මෙම ප්‍රජාතන්ත්‍රවාදී සංවාද ක්‍රමය මෙතෙක් අප රට තුළ නිසි පරිදි භාවිත නොවුණි.
මාර්තු 12 ව්‍යාපාරය විසින් මෙවර උත්සාහ දරන්නේ එම ක්‍රමය බිඳ දමා වඩාත් ප්‍රජාතාන්ත්‍රික මැතිවරණ සංස්කෘතියක් අප රටට හඳුන්වා දීමටයි. ඒ අනුව මෙම ඓතිහාසික සංවාදය පිළිබඳ අපි එම ව්‍යාපාරයෙන් තොරතුරු විමසා සිටියෙමු. ඒ අනුව මාර්තු 12 ව්‍යාපාරයේ සම කැඳවුම්කරු, පැෆරල් සංවිධානයේ විධායක අධ්‍යක්ෂ රෝහණ හෙට්ටිආරච්චි මහතා අප සමඟ අදහස් දැක්වීය.
“අපේ අරමුණ ජනාධිපතිවරණයට ඉදිරිපත් වන අපේක්ෂකයන්ට තමන් රට හදන වැඩපිළිවෙළ ඡන්දදායකයන්ට කියන්න අවස්ථාවක් සලසා දීම. අනික් පසින් ජනතාවට වඩාත් සුදුසු අපේක්ෂකයකු තෝරා ගැනීම සඳහා එකම වේදිකාවක් තුළ ඔවුන්ගේ අදහස් දැනගැනීමට අවස්ථාව සලසා දීම අපේ අරමුණක්.”
කෙසේ වෙතත් ඉකුත් සමයේ මෙම සංවාදයට අපේක්ෂකයන් කිහිප දෙනකු පමණක් සහභාගී කර ගැනීම පිළිබඳ සෙසු අපේක්ෂකයෝ චෝදනා එල්ල කරන්නට වූහ. ඒ අනුව මේ වනවිට මාර්තු 12 සංවාදය සියලුම අපේක්ෂකයන් වෙත විවෘත කොට තිබේ.
“අපේක්ෂකයන් සංඛ්‍යාත්මකව වැඩි නිසා එකම වේදිකාවක් තුළ සියලු දෙනාටම අවස්ථාව සලසා දීම තරමක් අපහසුයි. ඒ නිසා අපි සංවාදය අදියර තුනකට සැලසුම් කරලා තියෙනවා. පළවෙනි අදියරට අපි අපේක්ෂකයන් හය දෙනකුට ආරාධනා කරලා තියෙනවා. ඔවුන් අතරින් හතර දෙනෙක් දැනටමත් තමන්ගේ පැමිණීම තහවුරු කරලා තියෙනවා. ඒ අනුව පළමු සංවාදය එළඹෙන සැප්තැම්බර් 7 වැනිදා බණ්ඩාරනායක සම්මන්ත්‍රණ ශාලාවේ දී පැවැත්වීමට අපි සූදානම්.”
පසුගිය සිකුරාදා උදෑසන වන විට පළමු සංවාදය සඳහා සජිත් ප්‍රේමදාස, දිලිත් ජයවීර සහ පී. ආරියනේද්‍රන් යන අපේක්ෂකයන් පැමිණීම තහවුරු කර ඇති බව රෝහණ හෙට්ටිආරච්චි මහතා අප සමඟ පැවසීය.
පළමු වටය සඳහා අපේක්ෂකයන් තෝරාගෙන ඇත්තේ පාර්ලිමේන්තුවේ දැනට සිටින මහජන නියෝජිතයන්ගේ සහාය ලබන අපේක්ෂකයන් සැලකීමෙනි. සෙසු සියලු අපේක්ෂකයන්ට ද විවෘත ආරාධනාවක් සිදුකොට ඇති අතර මේ වන විටත් ඒ අතරින් කිහිප දෙනකු තම පැමිණීම තහවුරු කොට තිබේ.
“මේ සංවාදය ඇතුළේ කිසිදු දේශපාලන පක්ෂයකට මඩ ගහන්න, තවත් අපේක්ෂකයෙක් විවේචනය කරන්න, අතීතය ගැන කතා කරන්න අපි ඉඩ ලබා දෙන්නේ නැහැ. ඉතා පැහැදිලිවම තමන්ගේ ඉදිරි වැඩපිළිවෙළ ජනගත කරන්න තමා අපේක්ෂකයන්ට මෙහිදී අවස්ථාව ලබා දෙන්නේ.”
මේ අනුව මාර්තු 12 ව්‍යාපාරය විසින් ආර්ථිකය, සෞඛ්‍ය, අධ්‍යාපනය, ජාත්‍යන්තර සබඳතා ආදී ක්ෂේත්‍ර ගණනාවක් යටතේ අපේක්ෂකයන් වෙත ප්‍රශ්න ඉදිරිපත් කිරීම සඳහා ජනතාවට මේ වන විටත් අවකාශය සලසා දී තිබේ. අන්තර්ජාලය හරහා ජනතාවගේ ප්‍රශ්න බාරගනු ලබන අතර එම ප්‍රශ්න තෝරාගත් මණ්ඩලයක් හරහා සමාලෝචනය කොට අපේක්ෂකයන් වෙත ඉදිරිපත් කිරීම සිදුවේ.
“මේ සංවාදය කිසිදු ආකාරයකින් අපේක්ෂකයන් අපහසුතාවයට පත්වන සංවාදයක් නොවෙයි. එහිදී එකිනෙකා ප්‍රශ්න කරමින් ගැටුම් ඇතිවීමට අවකාශයක් නැහැ. ජනතාව විසින් ලබාදෙන ප්‍රශ්න සමාලෝචනය කර සකස් කරගත් ප්‍රශ්නාවලියකට තමා අපේක්ෂකයන් විසින් පිළිතුරු සපයන්නෙ.”
සංවාදයේ ආකෘතිය පිළිබඳ දැනට පවතින සැලසුම ද රෝහණ හෙට්ටිආරච්චි මහතා අප සමඟ සඳහන් කළේය. ඒ අනුව සංවාදය ආරම්භයේ දී ආරම්භක ප්‍රකාශයක් (Opening remark) සඳහා අපේක්ෂකයන්ට අවස්ථාව උදා වේ. තෝරාගත් ප්‍රශ්න වට කිහිපයක දී අපේක්ෂකයන් වෙත ඉදිරිපත් කිරීම ඉන් අනතුරුව සිදු කිරීමට දැනට සැලසුම් කොට ඇත. අවසානයේ දී අපේක්ෂකයන්ට නැවතත්, ඡන්දදායකයන් තමාව තෝරාගත යුත්තේ ඇයි? යන්න පිළිබඳ අදහස් දැක්වීමට අවස්ථාවක් උදා වේ.
“අපි රූපවාහිනී නාළිකා සියල්ලටම මේ සඳහා විවෘත කළා. රූපවාහිනී නාළිකා සියල්ලම වගේ ඒ සඳහා සහයෝගය දක්වන්න එකඟ වී තියෙනවා. ගුවන්විදුලි නාළිකා වගේම, කර්තෘ සංසදය වෙතත් මේ සඳහා ආරාධනා කරලා තියෙනවා. ඒ වගේම සමාජ මාධ්‍ය පිටුවලටත් මේ සඳහා සම්බන්ධ වෙන්න ආරාධනා කරලා තියෙනවා. රට පුරා විසිරී සිටින එක්කෝටි හැත්තෑ ලක්ෂයක පමණ ඡන්දදායකයන්ට තමන්ගේ ආලින්දයේ ඉඳලා අපේක්ෂකයන්ගේ වැඩපිළිවෙළ අහන්න පුළුවන්. ඒ හරහා විධිමත් තීන්දුවක් ගන්න ඡන්දදායකයන්ට ඉඩ ප්‍රස්ථාවක් සැලසෙනවා.”
බණ්ඩාරනායක සම්මන්ත්‍රණ ශාලාවේ පැවැත්වෙන සංවාදය සජීවීව නැරඹීම සඳහා එක් අපේක්ෂකයකුට 25 දෙනකු සහභාගි කරවීමේ අවස්ථාව සංවිධායකයන් විසින් සලසා දී තිබේ. ඉඩ පහසුකම් පිළිබඳ සලකා ඊට අමතරව සීමාසහිත පිරිසකට මෙම සංවාදය විවර කොට ඇති අතර, සියල්ල සජීවී ලෙසම විද්‍යුත් සහ සමාජ මාධ්‍ය හරහා විකාශය කිරීමට නියමිතය.
මෙහි සංවිධාන ක්‍රමවේදයන් සහ මූල්‍ය පිළිබඳව ද දැනගැනීමට ජනතාව උනන්දු වන බැවින් අපි ඒ පිළිබඳව ද රෝහණ හෙට්ටිආරච්චි මහතාගෙන් විමසා සිටියෙමු.
“ශාලා පහසුකම් වෙන්කර ගැනීම සහ තවත් කටයුතු කිහිපයක් සඳහා අපිට මුදල් අවශ්‍ය වෙනවා. මාධ්‍ය අනුග්‍රහය අප වෙත ලැබෙන්නේ නොමිලේ. සමස්තයක් විදිහට සැලකුවම විශාල මුදලක් නොවුණත්, අදාළ වියදම් මාර්තු 12 ව්‍යාපාරයට අයත් සංවිධාන විසින් දරාගනු ලබනවා.”
මාර්තු 12 ව්‍යාපාරය තවත් සංවිධාන ගණනාවකින් සැදුණද සමාජ ව්‍යාපාරයකි. පැෆරල් සංවිධානය සහ සී.අයි.එස්.එල්. ආයතනය මෙහි සම කැඳවුම්කරුවන් ලෙස කටයුතු කරන අතර පැෆරල් සංවිධානයේ විධායක අධ්‍යක්ෂ රෝහණ හෙට්ටිආරච්චි මහතා මේ පිළිබඳ තොරතුරු විමසීමට සම්බන්ධ කර ගත්තේ ද එබැවිනි.
කෙසේ වෙතත් මෙකී සංවාදය ශ්‍රී ලාංකීය දේශපාලනයේ ඓතිහාසික මොහොතක් වනු ඇතැයි අපි අපේක්ෂා කරමු. ගුණාත්මක දේශපාලන සංස්කෘතියක් උදෙසා රට රැගෙන යාමට ද මෙම සංවාදය දායකත්වයක් සපයනු ඇතැයි බලාපොරොත්තු වෙමු.
• චමිඳු නිසල් ද සිල්වා