රට සල්ලි හොරෙන් අදින්න ලංකාවට බහින චීන්නු
1989 වර්ෂයේදී ඇමෙරිකානු ආරක්ෂක විද්‍යාලයක ඉගෙනීම සඳහා ගිය ඕනෑම ආරක්ෂක නිලධාරියකුට ලබාදුන් අනාගත අනතුරු 3 කි. පළමුවැන්න නම් ඉස්ලාමීය අන්තවාදයයි. දෙවැන්න අග්නිදිග යුරෝපයේ නැගිටීම වූ අතර තෙවැන්න වූයේ චීන ආක්‍රමණයයි. මේ තුන සම්බන්ධයෙන් රටවල් දැඩිව අවධානයෙන් සිටිය යුතු බවට එවකට ආරක්ෂක විද්‍යාලය, පාඩමක් ලෙස කියා දී තිබිණි.
කෙසේ වෙතත් එදා කියූ ඒ අනාවැකිය සහතික කරමින් අද මේ අවදානම් තුනම එක ලෙස ලෝකය පුරා පැතිරී තිබේ. චීනයේ පිබිදීම ආසියාව පමණක් නොව ලෝක වෙළෙඳපොළ ද ආක්‍රමණය කර ඇත. අදූරදර්ශී පාලකයන් නිසා අද මෙරට චීන ණය උගුලක හිර වී අවසන්ය. අද අපේ රටේ දේශපාලනය, චීන කඳවුරත් ඉන්දියානු කඳවුරුත් පාලනය කරමින් සිටින මොහොතක එහි වැඩිම අයිතිය ලබා ගැනීම සඳහා චීනය සටන් වදිමින් සිටී.
අපේ රටට පැමිණෙන බොහොමයක් චීන ජාතිකයන් සහ ඉන්දියානු ජාතිකයන් මෙරටදී කටයුතු කරනුයේ ශ්‍රී ලංකාව තමන්ගේ කොලනියක් ලෙස සලකමිනි. ඔවුහු සංචාරක වීසා මාර්ගයෙන් මෙරටට ඇතුළු වී තම ව්‍යාපාර මෙන්ම විවිධ ජාවාරම් ද තරගකාරී ලෙස සිදු කරමින් සිටිති. දැන් අපේ රටේ පොලිස් පරීක්ෂණවල එක් කොටසක් වී ඇත්තේ මෙම ඉන්දියානු සහ චීන ජාතිකයන්ගේ මෙකී කටයුතු වළක්වාලීමය.
පසුගිය කාලය පුරාම මෙරටදී විශාල වශයෙන් චීන ජාතිකයන් නීතියේ රැහැනට කොටුවුණු අතර ඒ අය විවිධ නීති විරෝධී ක්‍රියා සිදුකර ඇති බවට අනාවරණය විය. ඇතැම් අය ව්‍යාපාර සහ රැකී රක්ෂා සඳහා මෙරටට පැමිණ ඇත්තේ සංචාරක වීසා මගිනි. එසේ පැමිණෙන පිරිස් සංචාරක මගපෙන්වන්නන්, ඉදිකිරීම් සමාගම් ආදියේ රැකියාවල නිරත වීම අරඹති. ඒ එක් පිරිසකි. අනෙක් පිරිස පරිගණක අපරාධකරුවන් හෙවත් අන්තර්ජාල හැකර්වරු වෙති. එවැනි පිරිසක් පසුගිය දා මහනුවර ප්‍රදේශයේ හෝටලයකදී අත්අඩංගුවට ගනු ලැබූහ. එහි චීන ජාතිකයන් ඇතුළු 120 කට අධික පිරිසක් වූහ. ඔවුන් මහනුවර ප්‍රදේශයේ කාමර 75 ක හෝටලයක වූ කාමර 45 ක් මාස හයක කාලයක් සඳහා ලබාගෙන තිබූ බවට හෙළි විය. මේ සම්බන්ධයෙන් හෝටල් කළමනාකාරීත්වයට ඇතිවූ සැකයක් මත ඔවුන් පොලිසියට දන්වා ඇති අතර පොලිසිය පැමිණ පරීක්ෂා කිරීමේදී මොවුන් පරිගණක අපරාධකරුවන් බවට අනාවරණය කරගෙන තිබිණි.
ලෝකයේ සුප්‍රසිද්ධ හැකර් ජාවරාමක් වන ඩෙත් එකවුන්ට් හෙවත් අක්‍රීය වූ ගිණුම් හරහා මුදල් ඇදීම මොවුන්ගේ ජාවාරම වී තිබේ. චීන ජාතිකයන් පමණක් නොව, ලෝකයේ වෙනත් රටවල්වල අය ද, කොටින්ම කීවොත් ලංකාවේ ඇතැම් පිරිස් ද මෙම ජාවාරමේ නියැලෙති. යුරෝපයේ හෝ වෙනත් ධනවත් රටවල කෝටිපතියන් මියගිය පසු හෝ ඇතැම් ගිණුම් අත්හල පසු එම බැංකුවේ ඇතැම් නිලධාරීන්ගේ සහායෙන් විශේෂ ක්‍රමවේදයක් හරහා මෙහිදී මුදල් ඇදීම සිදු කරනු ලබයි. මෙම ක්‍රමය පිළිබඳ ලියුම්කරු දැනුවත් වුවද මෙහිදී එම ක්‍රමය සඳහන් නොකරනුයේ තවත් අය ඒ කෙරෙහි පෙළඹිය හැකි බැවිනි.
මෙම චීන කණ්ඩායම මහා පරිමාණයෙන් මෙම ජාවාරම සිදු කරගෙන ගොස් ඇති බව පරීක්ෂණවලදී අනාවරණය වී තිබේ. ඔවුන් සුඛෝපභෝගී ජීවිත ගත කරමින් මෙම ජාවාරමේ නිරත වී ඇත්තේ ඒ හරහා විශාල වශයෙන් මුදල් ඉපයිය හැකි බැවිනි. ඔවුන් විශාල හෝටලයක් මිලදී ගෙන සංවිධානාත්මක ලෙස මෙම ජාවාරම සිදු කරගෙන ගොස් ඇතැයි පැවසේ. මෙම සැකකරුවන් අත්අඩංගුවට ගැනීමෙන් පසුව අනාවරණය වී ඇත්තේ මෙම ජාවාරම සඳහා කණ්ඩායම් රැසක් ලංකාවට පැමිණ ගොස් ඇති බවය. මෙය දැන් චීනයේ ප්‍රධාන ජාවාරමක් බවට පත්වී තිබේ.
ක්‍රෙඩිට් කාඩ් දත්ත හරහා මුදල් ඇදීම මෙම ජාවාරමුන්ගේ අනෙක් ජාවාරමයි. එය ලෝකයේ පරිගණක ජාවාරම්කරුවන්ගේ එක් ප්‍රධාන ජාවාරමකි. එමෙන්ම එය ලෝකයේ ඕනෑම ක්‍රෙඩිට් කාඩ් හිමියකුට අත්විය හැකි දරුණුම ඉරණමක් බව කිව යුතුය. ඊට ප්‍රධාන හේතුව නම්, ඔන්ලයින් හරහා විවිධ ගෙවීම් සිදු කිරීමට මේ හරහා ඉඩ සැලසීමය. එමගින් පුද්ගලයන් හැක් කර අදාළ කාඩ් අංක ලබාගෙන මුදල් ඇදීම සිදු කරයි. මේ අවදානම හේතුවෙන් නොදන්නා වෙබ් අඩවිවලට ගොස් ගෙවීම් සිදුවීම් නොකරන ලෙසට පොලිසියත් වගකිව යුතු අංශත් සති කිහිපයක සිටම, ජනතාව දැනුවත් කරමින් සිටියි. එය දැනටමත් ඇතැම් විදෙස් කණ්ඩායම් විසින් මෙරට සිට සිදු කරන ප්‍රධාන ජාවාරමක් වී ඇති බැවිනි.
මේ වන විට වැටලීම් හරහා චීන ජාතිකයන් 450 කට ආසන්න ගණනක් මෙරට පොලිසිය විසින් අත්අඩංගුවට ගෙන තිබේ. මේ සිදුවීමත් සමඟ චීන තානාපති කාර්යාලය දැනුම් දී ඇත්තේ අදාළ ජාවාරම්කරුවන් සම්බන්ධයෙන් පරීක්ෂණ සිදු කිරීම සඳහා වැඩිදුරටත් තොරතුරු ලබාදීමට තමන් කැමැත්තෙන් පසුවන බවය. දෙරට අතර මිත්‍රත්වයට හානි සිදු කරන මෙම කණ්ඩායම් මර්දනය සඳහා උපරිම සහය ලබාදෙන බවද චීනය පවසයි. ශ්‍රී ලංකා පොලිසියට ද මෙම ගෝලීය ප්‍රශ්නය විසඳීම සඳහා චීන සහය ඉතාම වැදගත් වී තිබේ. මේ වන විට ලැබී ඇති තොරතුරු අනුව තවත් කණ්ඩායම් රාශියක් මෙම ජාවාරමේ නිරත වන අතර ඔවුන් අත්අඩංගුවට ගැනීම සඳහා කටයුතු කරමින් සිටින බව වාර්තා වේ.
• ගයාන් ගාල්ලගේ
