සීෂෙල්ස් හි නීතිපති වූ ශ්‍රී ලාංකිකයා
සීෂෙල්ස් රාජ්‍යයේ නව නීතිපතිවරයා ලෙස ශ්‍රී ලාංකිකයකු වන වින්සන්ට් පෙරේරා මහතා පත් කිරීමට එරට ජනාධිපති වේවල් රාම්කලවන් මහතා පියවර ගෙන තිබේ. ආණ්ඩුක්‍රම ව්‍යවස්ථාවේ 76 (1) ව්‍යවස්ථාවට අනුකූලව, ආණ්ඩුක්‍රම ව්‍යවස්ථාමය පත්වීම් අධිකාරියේ නිර්දේශ මත, මෙම පත් කිරීම සිදුකර ඇතැයි එරට ජනාධිපති මාධ්‍ය අංශය වාර්තා කර තිබිණි. වින්සන්ට් පෙරේරා මහතාගේ ධුර කාලය වසර හතරකි.
දශක දෙකකට වැඩි පළපුරුද්දක් ඇති කීර්තිමත් නීති වෘත්තිකයකු වන වින්සන්ට් පෙරේරා මහතා තම නව භූමිකාවට විශේෂඥ දැනුම සම්භාරයක් එක් කරනු ඇතැයි ජනාධිපතිවරයාගේ විශ්වාසය වී තිබේ. කොළඹ විශ්වවිද්‍යාලයෙන් නීතිය පිළිබඳ ශාස්ත්‍රපති උපාධිය හිමි කරගෙන ඇති පෙරේරා මහතා ශ්‍රී ලංකාවේ ශ්‍රේෂ්ඨාධිකරණ නීතිඥයෙක් ලෙස කලක් සේවය කළේය. සිවිල් හා අපරාධ යන දෙඅංශයේම කටයුතු කළ ඔහු නීතිපති දෙපාර්තමේන්තුවේ ද සේවය කළ නීතිඥවරයෙකි.
පෙරේරා මහතා නීතිපතිවරයා ලෙස පත් කෙරුණේ වසර හතක් නීතිපතිවරයා ලෙස කටයුතු කළ ෆ්‍රෑන්ක් ඇලි මහතා විශ්‍රාම යෑමෙන් පසුය. එතෙක් ඔහු එරට නීතිපති කාර්යාලයේ සිවිල් නඩු පැවරීමේ ප්‍රධානියා ලෙස ද සීෂෙල්ස් රජයේ නීති උපදේශකවරයෙක් ලෙස ද සේවය කරමින් සිටියේය.
වසර 24 ක සේවා කාලය තුළ පෙරේරා මහතා ෆීජිහි නීතිඥවරයකු සහ සොලිසිටර්වරයකු, ෆීජිහි අභියාචනාධිකරණයේ සහ මහාධිකරණයේ විනිසුරුවරයකු, මහජන නඩු පැවරීමේ සහකාර අධ්‍යක්ෂ හා දූෂණයට එරෙහි ෆීජි ස්වාධීන කොමිෂන් සභාවේ නීති දෙපාර්තමේන්තුවේ ප්‍රධානියා ලෙස ද සිංගප්පූරු සමථ මණ්ඩලයේ පිළිගත් මැදිහත්කරුවකු ලෙසින් ද කටයුතු කර තිබිණි.
නව තනතුරට පත්වීමෙන් පසු මාධ්‍යයට අදහස් දැක්වූ ඔහු නව භූමිකාව පැවරීම පිළිබඳව සීෂෙල්ස් රජයට සිය ගෞරවය ප්‍රකාශ කළේය. තම පුළුල් අත්දැකීම් මත සිය වෘත්තිය ඵලදායී ලෙස ඉටු කිරීමට හැකිවන බව පැවසූ ඔහු, “මෙම සුන්දර රටේ නීතියේ ආධිපත්‍යය තහවුරු කිරීම සහතික කිරීම සඳහා මගේ කණ්ඩායම සමඟ එක්ව මගේ උපරිමයෙන් දායක වන බවට පොරොන්දු වෙමි. අපි එක්ව, අපරාධකරුවන් නීතියේ රැහැනින් ගැලවී යාමට නොහැකි වන පරිදි කටයුතු කිරීමටත්, නිවැරදිකරුවන් පීඩාවට පත්වීම වැළැක්වීමටත් පියවර ගන්නෙමු. ඉදිරි අභියෝගවලට මුහුණ දීම සඳහා නඩු පැවරීමේ සහ විමර්ශන කිරීමේ කණ්ඩායම් ශක්තිමත් කිරීමටත් ඔවුන්ට අවශ්‍ය නිපුණතාවන්ගෙන් ඔවුන් සන්නද්ධ කිරීමටත් පියවර ගන්නෙමි”යි සඳහන් කළේය.
නීතිපති දෙපාර්තමේන්තුව රජයට නීති උපදෙස් ලබා දීමට සහ රටේ සිදුවන අපරාධ සම්බන්ධයෙන් නඩු පැවරීමේ කාර්යභාරය ඉටු කරයි. රජය ජාත්‍යන්තර ගිවිසුම් හා සම්මුතීන්වලට එළැඹීමේදී මෙන්ම වෙනත් සංකීර්ණ ගිවිසුම් අත්සන් කරන විට ඒවාට බලපාන නීතිමය පදනම සහතික කරන්නේ ද නීතිපති දෙපාර්තමේන්තුවය.
• ප්‍රියන්ජන් සුරේෂ් ද සිල්වා
