ගම්මන්පිලගෙන් රජයට චෝදනා: රජයෙන් ගම්මන්පිලට චෝදනා
මැතිවරණ අභියස නොවැළැක්විය හැකි ලෙස වේදිකාගත වන පාස්කු ප්‍රහාරය පිළිබඳ නාටකය මෙවර රඟ දැක්වීම ඇරඹුණේ හිටපු පාර්ලිමේන්තු මන්ත්‍රී උදය ගම්මන්පිල ප්‍රධානත්වයෙනි. උදය ගම්මන්පිල මහතා පාස්කු ප්‍රහාරය සම්බන්ධව හෙළිදරව් නොවුණු වාර්තා තමන් සතු බව පැවසීමත් සමඟ නව අර්බුදය නිර්මාණය විය. පසුගිය සතියේ එය තීරණාත්මක අදියරකට එළඹුණු බව දක්නට ලැබුණි.
පළමු අදියරේදී උදය ගම්මන්පිල, වාර්තා එළි දක්වන ලෙස ආණ්ඩුවට කියා සිටි අතර එසේ නොකළහොත් තමන් වාර්තා එළි දැක්වීමට සූදානම් වන බව කීවේය. ඊට ආණ්ඩුව වෙනුවෙන් අමාත්‍ය විජිත හේරත් ඇතුළු බොහෝ දෙනෙක් අදහස් දක්වන්නට වූහ. අදාළ වාර්තා ආණ්ඩුව වෙත ලබා දෙන ලෙස ඔවුහු පැවසූ අතර, ගම්මන්පිලගේ භාවිතය විවේචනයට ලක් කළහ. දෙපසට දෝලනය වූ මෙම සංවාදය අවසානයේදී ඉකුත් සතියේ උදය ගම්මන්පිල විසින් අදාළ වාර්තා එළි දක්වනු ලැබීය.
මෙහිදී මෙම වාර්තා ප්‍රසිද්ධියට පත් නොකර සිටීමෙන් ජනාධිපතිවරයා ආණ්ඩුක්‍රම ව්‍යවස්ථාව චේතනාන්විතව උල්ලංඝනය කර ඇති බවට උදය ගම්මන්පිල චෝදනා කළේය.
“මම කතා කරන්නේ රනිල් වික්‍රමසිංහ ජනාධිපතිතුමා විසින් පත් කරපු මෙතෙක් ප්‍රසිද්ධ නොකරපු ජනාධිපතිතුමා සිතාමතා ප්‍රසිද්ධ කිරීමට පැකිලෙමින් සිටින කමිටු වාර්තා දෙක ගැනයි.
පළවෙනි වාර්තාව විශ්‍රාමික විනිසුරු එස්.අයි. ඉමාම් මැතිතුමාගේ ප්‍රධානත්වයෙන් පත් කරලා මේ කමිටුවේ වාර්තාව 2024 ජූනි මාසේ 25 වැනිදා එවකට හිටපු ජනාධිපති රනිල් වික්‍රමසිංහ මහතාට භාර දුන්නා. මේ වාර්තාවේ විෂය පථය වන්නේ චැනල් 4 නාළිකාව මගින් එල්ල කළ චෝදනා 25 ක් පිළිබඳ ඇත්ත නැත්ත විමර්ශනය කිරීමයි.
මේ තියෙන දෙවැනි වාර්තාවේ විෂය පථය වෙන්නේ පාස්කු ප්‍රහාරය සම්බන්ධයෙන් පොලිසියෙන් හෝ බුද්ධි අංශයෙන් යම් අතපසුවීමක්, වැරැද්දක් සිදුවුණාද කියන එක විමර්ශනය කරන එක. විශ්‍රාමික විනිසුරු ඒ.එම්.ජේ. ද අල්විස්ගේ ප්‍රධානත්වයෙන් පත් කළ මේ කමිටුව 2024 සැප්තැම්බර් 14 වැනිදා ඒ කියන්නේ වර්තමාන ජනාධිපතිවරයා පත් වෙන්න හරියටම සතියකට කලින් හිටපු ජනාධිපති රනිල් වික්‍රමසිංහ මැතිතුමාට භාර දුන්නා.”
මෙම වාර්තා එළි දක්වමින් උදය ගම්මන්පිල සඳහන් කර සිටියේ, පාස්කු ප්‍රහාරය සම්බන්ධයෙන් ප්‍රධානම චූදිතයකු ලෙස විමර්ශන කමිටු වාර්තාවකින් නම් කර ඇති හිටපු ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න මහජන ආරක්ෂක අමාත්‍යාංශයේ ලේකම් ධුරයෙන් ඉවත් කළ යුතු බවය. තවද බලය අයුතු ලෙස භාවිත කිරීම සම්බන්ධයෙන් ජනාධිපතිවරයා ජාතියෙන් සමාව ගත යුතු බවත්, මෙම කාරණා දෙක ඉටු නොකළහොත් ඉදිරි පාර්ලිමේන්තුවේදී ජනාධිපතිවරයාට එරෙහිව දෝෂාභියෝගයක් ගෙන එන බවත් ඔහු වැඩිදුරටත් අවධාරණය කළේය.
මේ අතර හිටපු පාර්ලිමේන්තු මන්ත්‍රී උදය ගම්මන්පිල ඉදිරිපත් කළ පාස්කු ප්‍රහාරයට අදාළ විමර්ශන වාර්තාව පිළිගන්නේ නැතැයි කතෝලික සභාව ප්‍රකාශ කළේය. කතෝලික ජනමාධ්‍ය කේන්ද්‍රයේ අධ්‍යක්ෂ සිරිල් ගාමිණී ප්‍රනාන්දු පියතුමා මේ බව පැවසීය. මෙහිදී ඔහු විසින් පාස්කු බෝම්බ ප්‍රහාරය පිළිබඳව හිටපු ජනාධිපති ගෝඨාභය රාජපක්ෂ මහතා පත් කළ ජනාධිපති කොමිසමේ වාර්තාව ඉදිරිපත් කරන්නැයි කතෝලික සභාව කළ ඉල්ලීම එවකට ඉවත දැමූ බවද සිහිපත් කර සිටියේය. එය අනුව පියතුමා මෙහිදී අවධාරණය කළේ එකල එසේ කටයුතු කළ උදය ගම්මන්පිල මහතා අද තමන්ට තැපෑලෙන් ලැබුණේ යැයි කියන වාර්තාවක් ඉදිරිපත් කිරීම නාටකයක් බවයි.
අගරදගුරු මැල්කම් රංජිත් කාදිනල්තුමන් විසින් නිකුත් කළ නිවේදනය ප්‍රකාශයට පත් කරමින් සිරිල් ගාමිණී පියතුමා මෙසේ පැවසීය. හිටපු ජනාධිපති රනිල් වික්‍රමසිංහ මහතා විසින් පත් කළ ඒ.එන්.ජේ. අල්විස් කමිටු වාර්තාව ශ්‍රී ලංකා රදගුරු සංගමයට ලබා දී ඇති බවත් එම වාර්තාව රහසිගත වාර්තාවක් ලෙස සඳහන් කර ඇති නිසා රහසිගතව තබා ගැනීමට කටයුතු කළ බවත් අදාළ නිවේදනයේ දැක්වුණි.
ආණ්ඩුව පාර්ශ්වයෙන් ද ගම්මන්පිල හෙළිදරව් කරන ලද වාර්තා සම්බන්ධයෙන් ප්‍රතිචාර දැක්වීමක් සිදුවිය. ඒ සඳහා ඉදිරිපත් වූයේ අමාත්‍ය විජිත හේරත්ය.
“මෙම කමිටු වාර්තාවේ පැහැදිලි ඉලක්කය වෙලා තියෙන්නේ වෙන කවුරුවත් නොවෙයි, රවී සෙනෙවිරත්න සහ ශානි අබේසේකර මහත්වරුන්. මීට පෙර මානව හිමිකම් උල්ලංඝනය සම්බන්ධයෙන් ශ්‍රේෂ්ඨාධිකරණයේ නඩුවක් තිබුණා. තීන්දු දුන්නා. හිටපු ජනාධිපතිවරයාට විරුද්ධව, නිලන්ත ජයවර්ධනට විරුද්ධව, හිටපු පොලිස්පතිවරයාට විරුද්ධව තීන්දු දුන්නා. ඒ නඩුවේ ශානි අබේසේකර මහත්මයාගේ නම සඳහන් වෙලා තිබුණේ නෑ. ඒ නඩුවේ රවී සෙනෙවිරත්නගේ නම සඳහන් වුණා.
හැබැයි නඩු තීන්දුවේ කිසිදු තැනක ශ්‍රේෂ්ඨාධිකරණයේ විනිසුරුවන් 7 දෙනකුගෙන් යුක්ත පූර්ණ විනිසුරු මණ්ඩලයක විභාග කළ නඩු වාර්තාවේ රවී සෙනෙවිරත්න මහත්මයා කිසිදු චෝදනාවකට වරදකරුවෙක් වුණේ නැහැ. ඒ තීන්දුවේ ඔහුගේ නමවත් සඳහන් වෙලා නෑ. ඉතින් එහෙම තියෙද්දී තමයි මේ හදිසියේ විශ්‍රාමික පොලිස් සාමූහිකයේ කටයුතු ආරම්භ කරපු ගමන් සාගල රත්නායක, රවී සෙනෙවිරත්නව මුණගැහිලා තමන්ගේ කටයුතු සඳහා සහාය දෙන්න මෙතැනින් ඉවත් වෙන්න කියලා ඉල්ලීමකුත් කරලා තියෙන තත්ත්වයක් යටතේ දැන් මේ කමිටුවක් පත් කරලා වාර්තාවක් ඉදිරිපත් කරලා තියෙන්නේ.”
ඒ වාර්තාවේ තවත් අය පිළිබඳව සඳහන් කරලා තියෙනවා. හිටපු පොලිස්පති දේශබන්දු තෙන්නකෝන් මහත්මයා පිළිබඳවත්, තවත් විවිධ අය පිළිබඳවත් නිර්දේශ ඉදිරිපත් කරලා තියෙනවා. ගම්මන්පිලට ඒවා පේන්නේ නෑ. ඒවා දකින්නේ නෑ. දැන් මේ මෙච්චර කාලයක් නිදාගෙන ඉඳලා, ඔහු ආණ්ඩුවේ අමාත්‍ය ධුර දැරුවා. විපක්ෂයේ හිටියා. ඒ මොකක්වත් නැතිව දැන් මේ වුවමනාව කාගේද කියලා පැහැදිලියිනෙ. හරියටම ඡන්ද ප්‍රචාරක කටයුතු ඉවර වෙන සැප්තැම්බර් 18, 17 තමයි මේ වාර්තාව ලබා දෙන්නේ. මේක නිකම්ම නිකම් කමිටු වාර්තාවක්.”
මෙම සිදුවීම් පෙළ සඳහා තවත් බොහෝ පාර්ශ්ව ප්‍රතිචාර දැක්වීම ඉකුත් සතියේදී ආරම්භ කර තිබුණි. හිටපු ඇමැති උදය ගම්මන්පිල ඇතුළු කිහිප දෙනකු සුපුරුදු කූඨ උපක්‍රම සහිතව අවර ගණයේ මැතිවරණ ප්‍රචාරණ විධි ක්‍රම මගින් ඡන්දදායකයා මුලා කිරීමේ සියුම් මෙහෙයුමක නිරතව සිටින බව ප්‍රජාතන්ත්‍රීය ප්‍රතිසංස්කරණ සහ මැතිවරණ අධ්‍යයන ආයතනය නිවේදනයක් නිකුත් කරමින් සඳහන් කර සිටියේය.
මෙම ආයතනයේ විධායක අධ්‍යක්ෂ මංජුල ගජනායක විසින් මාධ්‍ය වෙත නිවේදනයක් නිකුත් කරමින් මේ බව සඳහන් කළ අතර එහි වැඩිදුරටත් සඳහන් වන්නේ මුළු රටක් කම්පනය කළ සිද්ධි දාමයක් මැතිවරණය සඳහා අවශ්‍ය ප්‍රචාරක වාසිය ලබා ගැනීමේ එකම මාර්ගය ලෙස ඔහු තෝරාගෙන ඇති බවයි.
කෙසේ වෙතත් උදය ගම්මන්පිල මහතා නැවතත් මාධ්‍ය සාකච්ඡාවක් කැඳවමින් ඔහුගේ හෙළිදරව්ව සම්බන්ධව ඉදිරිපත් වූ කරුණුවලට ප්‍රතිචාර දක්වන්නට විය.
“ජනාධිපති කමිටු වාර්තාවේ නිගමන ආණ්ඩුව පිළිගන්නේ නැතිනම් මාධ්‍ය හමුවල කියන්නේ නැතිව අභියාචනාධිකරණයට ගොස් මේ නිගමනවල තිබෙන නීතිමය වැරැද්ද පෙන්වා දීලා මේ නිගමන බල ශූන්‍ය කර ගන්නා ලෙස ආණ්ඩුවට සිහිපත් කරනවා.”
මේ අනුව ඉකුත් සතිය අවසන් වන විට පෙනී ගියේ මෙම පාස්කු නාටකය තවදුරටත් අවසන් වී නොමැති බවයි. කෙසේ වෙතත් අවසානයේ සඳහන් කළ යුත්තේ මෙම ගැටුමේ සත්‍ය කවුරුන් පැවසුවද, අසත්‍ය පවසමින් තවදුරටත් සිය ගණනක් මිනිසුන්ගේ ජීවිතවල කඳුළු සමඟ සෙල්ලම් කරන පිරිස් පාස්කු ප්‍රහාරකයන්ට වඩා විනාශකාරී මිනිසුන් බව පමණි.
• චමිඳු නිසල් ද සිල්වා