ලෝකයේ පළමු දෙළුම් බාර් එක
ඔහු නමින් අසික බිම්සර සමරසේකරය. වර්තමානය වන විට අසික දෙළුම් වගාව හරහා නිෂ්පාදන පහළොවකට අධික සංඛ්‍යාවක් වෙළෙඳපොළට හඳුන්වා දුන් තරුණ ව්‍යාපාරිකයෙකි. වගාකරුවෙකි. අසිකගේ උපන් ගම තිස්සමහාරාමයයි. ගමේ පාසලේ මූලික අධ්‍යාපනය හැදෑරූ අසික ශිෂ්‍යත්ව විභාගයෙන් සමත්ව කොළඹ ඉසිපතන විදුහලටත් උසස් පෙළ සඳහා රාජකීය විදුහලටත් ඇතුළත් විය. කලා විෂය ධාරාවෙන් උසස් පෙළ හැදෑරූ ඔහු පෞද්ගලික විශ්වවිද්‍යාලයක නීති උපාධිය ද හැදෑරුවේය. පසුව 2018 වසරේදී සංචාරක ව්‍යාපාරයට අදාළ පුහුණුවීම් පාඨමාලාවක ද ඉගැන්වීම් කළේය. ඒ සඳහා වෘත්තීය පුහුණු ආයතනයක් ගොඩනැගූ අසික වසර කිහිපයක්ම එහි ඉගැන්වීම කටයුතුවල නිරත විය.
ඒ වන විට රට පුරා පැවැති කොවිඩ් වසංගතයත් සමඟ අසිකගේ ආයතනයට බාධා එල්ල විය. ඒ හේතුවෙන් සියල්ල නතර කර දැමූ අසික තමන් ඉතිරි කරගත් යම් මුදලක් ගොවිතැන සඳහා යෙදවීමට තීරණය කළේය. කොළඹ සේවය කරමින් සිටි ඔහු තම උපන් ගම වූ තිස්සමහාරාමයට ගියේය. ටික දිනකින් ඔහු තම පියාට අයත්ව තිබූ අක්කර දෙකක පමණ ඉඩමේ වගා කටයුතු ආරම්භ කළේය.
“මම ගමට ගිහින් තාත්තාගේ ඉඩමක දෙළුම් වගා කළා. තවත් අතුරු බෝග කිහිපයක් ද වගා කළා. තිස්සමහාරාමයේ දේශගුණය දෙළුම්වලට සුදුසුයි. තිස්සමහාරාමයේ ජල ගැටලු‍වකුත් තිබුණා. ඒ නිසා වගා කරන බෝග නියඟයට ඔරොත්තු දෙන්න ඕනෑ කියලා මම හිතුවා. ඒ වගේම අලි ගැටලු‍වත් තිබුණා. ඒ නිසා අලින් හානි නොකරන බෝගයක් වගා කරන්න මම අදහස් කළා. ඒ නිසාම තමයි දෙළුම් වගා කරන්න තීරණය කළේ. අද වෙද්දි අපි දෙළුම් අක්කර තුනහමාරක වගා කරනවා.” යැයි අසික බිම්සර සමරසේකර දේශයට අදහස් දක්වමින් පැවසීය.
2022 වසරේදී ඉන්ධන, පොහොර, ගැටලු‍වත් සමඟ අසිකට ද ආර්ථික අර්බුදයකට මුහුණ දීමට සිදුවිය. 2021 වසරේදී ඔහු තම මුහුණුපොතෙන් online හරහා දෙළුම් අලෙවි කිරීමේ ක්‍රමවේදයක් ආරම්භ කළේය. ඔහු වගා කළ දෙළුම් එකතු කර ඉල්ලු‍මට අනුව රට වඩා සිටින පාරිභෝගිකයන් වෙත අලෙවි කළේය. 2020 වසරේදී තම ඉඩමේ දෙළුම් වගා කළ ද 2021 වසර වන විට එහි අස්වැන්නක් ලැබුණේ නැත. සාමාන්‍යයෙන් දෙළුම් පැළ සිටුවා පළමු අස්වැන්න ලබා ගැනීමට වසර දෙකක් පමණ ගත වෙයි. මේ නිසාම අසික වෙනත් ගොවීන්ගෙන් ලබාගත් දෙළුම් ඒ කාලයේදී අලෙවි කළේය.
“ඉන්ධන ගැටලුව මතුවීමත් සමඟ මගේ එම ව්‍යාපාරයත් විශාල ගැටලු‍වලට මුහුණ දුන්නා. අඩුම තරමින් මට වගා කටයුතු කරගෙන යාමටවත් මුදල් තිබුණේ නැහැ. මේ නිසා ණය වෙන්නත් සිදුවුණා. දෙළුම්වලට අමතරව යම් ප්‍රමාණයකට වගා කළ මිරිස්, තුඹ කරවිල ආදී වගාවලටද නිසි ජලය, පොහොර නැතිකම නිසා ඒවාත් සාර්ථක වුණේ නැහැ. ඒ නිසාම දෙළුම් ගසේ වෙනත් කොටසකින් නිෂ්පාදනයක් කර හෝ මේ සඳහා මුදල් උපයා ගැනීමට මම තීරණය කළා.” යැයි අසික සමරසේකර පැවසීය.
ඒ අනුව අසික දෙළුම් ලෙල්ලේ ඇති ගුණය පිළිබඳව සොයා බැලීය. දෙළුම් ලෙල්ල ලොව ආයුර්වේද වෛද්‍ය විද්‍යාවෙත්, පාරම්පරික වෛද්‍ය විද්‍යාවෙත් අර්ශස්, මළ බද්ධය ආදී රෝග සඳහා ගුණදායක ඖෂධයක් බව ඔහුට දැන ගැනීමට ලැබිණි. එමෙන්ම දෙළුම් යුෂයට වඩා දෙළුම් ලෙල්ලේ ප්‍රතිඔක්සිකාරක ගුණය වැඩි බව ඔහු සොයා ගත්තේය. ඒ කරුණු ද උපයෝගී කරගෙන අසික, දෙළුම් ලෙල්ල පවුඩර් එකක් බවට පත්කර, ෆේෂල් පැක් එකක් ලෙස සකසා වෙළෙඳපොළට නිකුත් කළේය.
ඒ වනවිට මුහුණුපොත හරහා කිසියම් පාරිභෝගික පිරිසක් අසික වටා එකතු වී සිටියහ. ඔවුහු මෙය මිලදී ගත්හ. එය සාර්ථක විය. පසුව ඔහු දෙළුම් ආශ්‍රිත නිෂ්පාදන කිරීමට උනන්දුවක් දැක්වීය. දෙළුම් වසරකට වරක් පමණක් ඵලදාව ලැබෙන බෝගයකි. මේ නිසාම වසර පුරාවට යම්කිසි මුදලක් ඉපැයීමට අනිවාර්යෙන්ම ඒ හරහා වෙනත් නිෂ්පාදනයකට යා යුතු බව ඔහුට වැටහී තිබිණි. මෙය අතරමැදියකුට නොදී ඍජුව වෙළෙඳාමේ යෙදීමට අසිකට අවශ්‍ය විය. ඒ නිසාම එකවරම විශාල දෙළුම් අස්වැන්නකින් ඵලදාව ලබා ගතහොත් දෙළුම්වල මිල අඩුවන බව වටහාගත් ඔහු, විවිධ ක්‍රම අත්හදා බලමින් ඒ සම්බන්ධයෙන් සොයා බැලීය. ඔහු 2022 වසරේදී දෙළුම් ජෑම් නිෂ්පාදනය කළේය. පිළිකා ආශ්‍රිත රෝගවලට, කෑම අරුචියට දෙළුම් සුදුසුම පළතුරකි. මෙලෙස සිදු කළ පර්‌යේෂණ කිහිපයකට පසුව අවාරයට දෙළුම් අවශ්‍යතාවය ඇති අයට අවශ්‍ය ඕනෑම වෙලාවක ලබා ගැනීමට හැකි, 100% ක් දෙළුම්වලින් සමන්විත, රසායනික ද්‍රව්‍ය කිසිවක්ම නැති දෙළුම් බෝතලයක් ඔහු නිෂ්පාදනය කළේය. ඒ සඳහා ද ඉතා ඉහළ ඉල්ලු‍මක් ලැබිණි.
රූපලාවණ්‍ය කටයුතු සඳහා දෙළුම් ඉතා සුදුසු පළතුරකි. ඔහු විවාහ වූයේ ද රූපලාවණ්‍ය නිෂ්පාදන සම්බන්ධ උපාධිධාරිනියක් සමඟය. ඇයගේ සහයෝගය ඇතිව අසික දෙළුම්වලින් රූපලාවණ්‍ය ආලේපන නිෂ්පාදන කිහිපයක් සහ ආහාරපාන නිෂ්පාදන ද සැකසීය. තමන් මුහුණදුන් ගැටලු‍වලට පිළිතුරු සොයාගන්නා අතරේදී ඔහු නිෂ්පාදනය වැඩි කර ගැනීමට සමත් විය.
මේ වන විට අසික, තමන් වගා කළ අක්කර තුනහමාරට අමතරව රට පුරා වූ අක්කර 45 ක පමණ ඉඩ ප්‍රමාණයක ඇති දෙළුම් වගාවන්හි අස්වැන්න ලබා ගනියි. අසික හා වගාකරුවෝ වගා භූමි අක්කර විස්සක පමණ සක්‍රීයව වගාව සිදු කරති. ඔවුහු වාණිජ අරමුණින් මෙහි වගා සිදු කරති. තිස්සමහාරාමය, අනුරාධපුරය, පුත්තලම, දඹුල්ල ඇතුළු ලංකාව පුරා වගාකරුවෝ අසික සමඟ සම්බන්ධව සිටිති. මේ වන විට දෙළුම්වලින් නිෂ්පාදන දහසයක් ඔහු එළිදක්වා ඇත. ඉතා නුදුරේදීම දෙළුම් ෆේස් වොෂ් නිෂ්පාදනයක්, බොඩි ජෙල් මෙන්ම වේළුණු දෙළුම් ඇට උපයෝගී කරගෙන කිරිවලට මුසු කරගන්නා උදෑසන ආහාරයක්ද නිෂ්පාදනය කිරීමට නියමිතය.
“මෙම නිෂ්පාදන ලංකාවේ ඕනෑම තැනකට වැඩ කරන දින දෙකක් ඇතුළත online ක්‍රමය හරහා ලබා දෙන්න පුළුවන්. ඊට අමතරව මහරගම අපේක්ෂා රෝහල අසල ලෝකයේ තියෙන එකම දෙළුම් අවන්හල අපි විවෘත කළා. එය නම්කර ඇත්තේ දෙළුම් බාර් නමින්. මෙහිදී අපේ නිෂ්පාදනවලට අමතරව දෙළුම් ආහාරපාන මිලදී ගන්න පුළුවන්. මෙහිදී දෙළුම් ලෙල්ලෙන් සාදන තේ කෝප්පයක, දෙළුම් මලෙන් සාදන තේ කෝප්පයක මෙන්ම රස ආහාර ගණනාවක රස බලන්න පුළුවන්. ඉදිරියේදී මෙම දෙළුම් නිෂ්පාදන විදෙස් රටවලට අපනයනය කිරීමට ද බලාපොරොත්තු වෙනවා.” යැයි අසික බිම්සර සමරසේකර වැඩිදුරටත් පැවසීය.
• දිශානි ජයමාලි කරුණාරත්න