ස්ට්‍රයික් නැති කරන කතාව පත්තු වෙයි
වර්ජන නැති රටක් බිහි කළ හැකිද? එය ගෙවී ගිය සතියේ දේශපාලන කරළියේ නිර්මාණය වූ අපූරු පැනයකි. ජාතික ජනබලවේගය නිර්මාණය කරනු ලබන නව රජයේ අරමුණ වර්ජන නැති රටක් බිහි කිරීම බව කියැවුණේ එම පක්ෂයේම මැතිවරණ වේදිකාවේය. මෙහි ප්‍රායෝගිකත්වය සහ යථාර්ථය පිළිබඳ විමසා බැලීමට ඒ අනුව අපි තීරණය කළෙමු.
ඇඳිරි නීති පැනවීම අවශ්‍ය නොවන, වර්ජන සිදු නොකරන රටක් බිහි කිරීම ජාතික ජන බලවේගයේ අරමුණ බව එම පක්ෂයේ හිටපු පාර්ලිමේන්තු මන්ත්‍රී ලක්ෂ්මන් නිපුණආරච්චි මහතා කොළඹ දිස්ත්‍රික් දේශපාලන රැලියකට එක්වෙමින් ප්‍රකාශ කළේය.
“අද මම කිව්වා කියලා මතක තියා ගන්න. ඒ ස්ට්‍රයික් ඉතිහාසය නැති වෙනවා ඉස්සරහට. කාට විරුද්ධවද ස්ට්‍රයික් කරන්නේ? ආණ්ඩුවත් එක්ක මොකක් හරි ප්‍රශ්නයක් තියෙනවා නම් කතා කරලා බේරගන්නනෙ තියෙන්නෙ. අපේ පැත්තෙන් පළවෙනියට ඒකට පියවර තියනවා. ඉස්සෙල්ලාම අපේ පක්ෂය පැත්තෙන් තියෙන වෘත්තීය සමිති විසුරුවා හරිනවා. ඉවරයිනේ. මොකටද? වෘත්තිය සමිති ඕනෑ නෑ. ජනතාවගේ පාලනයක්නෙ තියෙන්නෙ.”
ගැටලු‍වක් ප්‍රශ්නයක් ඇත්නම් එය සාකච්ඡාවෙන් විසඳා ගැනීමට අවශ්‍ය ක්‍රියාමාර්ග ගත යුතු බවත්, එවන් රටක් තුළින් සංවර්ධනය මෙන්ම අධ්‍යාපනය, ප්‍රවාහනය වැනි පද්ධති ගොඩනැංවීම අසීරු නොවන බවත් ඔහු මෙහිදී පෙන්වා දුන්නේය. වර්ජන අත්දැකීම් නොවැම්බර් 14 න් පසු අවසන් විය යුතු බවද කී හෙතෙම දේශපාලකයන් විසින් අගාධයට ඇද දමා ඇති රටක්, එකම ක්ෂේත්‍රයේ දිනෙන් දින වර්ජන බිහිවන රටක්, සංවර්ධනය කරා ගෙන යාමේ භාරදූර වගකීමක් ජාතික ජන බලවේගයට ඇති බව ඔහු කියා සිටියේය.
මෙම ප්‍රකාශය පිළිබඳ වෘත්තීය සමිති ව්‍යාපාරය තුළ මෙන්ම දේශපාලන කරළිය තුළ ද කතාබහක් ඇතිවන්නට විය. වසර ගණනාවක සිට ජනතා විමුක්ති පෙරමුණ සිය ප්‍රධානතම දේශපාලන බලපෑම් කණ්ඩායම බවට පරිවර්තනය කරගෙන සිටියේ වෘත්තීය සමිති ව්‍යාපාරයයි. එසේම ජාතික ජනබලවේගය ලෙසින් රාජ්‍ය බලය අත්පත් කර ගැනීමේ ක්‍රියාවලිය තුළ ද වෘත්තීය සමිති ව්‍යාපාරය සැලකිය යුතු වැඩ කොටසක් සිදු කොට තිබුණි.
එම නිසාම සමස්ත ලංකා වෘත්තීය සමිති සම්මේලනය යටතේ ක්‍රියාත්මක වන ජාතික ජන බලවේගයට සහාය දක්වන වෘත්තීය සමිතිවල නායකයෝද මෙවර මැතිවරණයේ අපේක්ෂක ලැයිස්තුවල ස්ථාන දිනාගෙන සිටියහ. ඒ අනුව මෙම ප්‍රකාශය පිළිබඳව ජාතික ජනබලවේගය සහ ජනතා විමුක්ති පෙරමුණට සම්බන්ධ වෘත්තීය සමිතියක් වන ලංකා විදුලි සේවක සංගමයේ ප්‍රධාන ලේකම් සහ මෙවර ජාතික ජන බලවේගයේ ජාතික ලැයිස්තු අපේක්ෂකයකු වන රන්ජන් ජයලාල් මහතාගෙන් විමසීමක් කොට තිබුණි. පක්ෂය තුළ වෘත්තීය සමිති විසුරුවා හැරීම පිළිබඳ කතාබහක් නිර්මාණය වී නොමැති බවත්, එය නිපුණආරච්චි මහතාගේ පෞද්ගලික අදහසක් බවත් ඔහු එහිදී සඳහන් කොට තිබුණි.
“අපි දුප්පත්කම නැති කරනවා නම් රටේ දුප්පතුන් නැති වෙනවනෙ. අපි කියන්නෙ මේ පත්වෙලා තියෙන්නෙ මෙච්චර කාලයක් පාරට බැහැලා උද්ඝෝෂණය කරපු වෘත්තීය සමිති තියෙන කම්කරුවන්ගේ ආණ්ඩුවක්නෙ. ඒ නිසා අපි පැහැදිලිවම කියනවා මීට පස්සේ වෘත්තීය අරගල තියෙන්න විදිහක් නෑ. අපි ජාතික ජන බලවේගයේ වුණාට එයාලා හරියට කරන්නෙ නැති නම් අපි පාරට බහිනවා. අපිව මාධ්‍යවලින් රටේ ජනතාව හඳුනා ගත්තෙ අපි කරපු වෘත්තීය අරගලත් එක්ක. අපට විශ්වාසයක් තියෙනවා, අපි සාකච්ඡා කරලා තියෙනවා සහ ආණ්ඩුවත් අපට කියලා තියෙනවා මාස හයෙන් හයට වැටුප් සමාලෝචන සිදු කරනවා කියලා.”
එවන් පසුබිමක් තුළ තවදුරටත් වෘත්තීය සමිති වැඩක් නොවන බව නිපුණආරච්චි මහතා විසින් කියා සිටීම පිළිබඳ වෙනත් දේශපාලන පක්ෂ සහ එම දේශපාලන පක්ෂවලට සම්බන්ධ වෘත්තීය සමිති නායකයන් වෙතින්ද දැඩි විවේචන එල්ල විය.
සමගි ඒකාබද්ධ වෘත්තීය සමිති බලවේගයේ කැඳවුම්කරු ආනන්ද පාලිත මහතා මේ පිළිබඳ අදහස් දක්වා තිබූ තවත් වෘත්තිය සමිති නායකයෙකි. ආණ්ඩුව වෘත්තීය සමිති මර්දනයක් සඳහා සූදානම් වෙමින් සිටින බව ඔහු පවසා තිබුණි.
“ලක්ෂ්මන් නිපුණආරච්චිගේ කතාවේ දිගුවක් විදිහට පසුගිය දවසක විජිත හේරත් කියනවා, ජනතාව අපහසුතාවට පත් කරන වෘත්තීය ක්‍රියාමාර්ගවලට ඉඩ තියෙන්නෙ නෑ කියලා. ඒ කියන්නෙ වෘත්තීය සමිති මර්දනයක් කරනවා කියන එක. වැදගත්ම දේ තමයි මේ තියෙන්නෙ ජනතාවගේ ආණ්ඩුවක්, ඒක නිසා වෘත්තීය සමිති අවශ්‍ය නෑ වගේ කතාවක්. ඔය කියන්නෙ වාමාංශික රජයන්වල ආණ්ඩු ක්‍රියාත්මක කරන න්‍යාය. උතුරු කොරියාව, චීනය, කියුබාව සහ රුසියාව ගත්තත් ඔය කිසිම රටක වෘත්තීය සමිති කියන භූමිකාවක් නෑ. මාධ්‍ය කියන භූමිකාවක් නෑ.” පළමුව ජාතික ජනබලවේගය සිය වෘත්තීය සමිති විසුරුවා හැර අනතුරුව සෙසු වෘත්තීය සමිති මර්දනයට සූදානම් වන බව ඔහු කීය. එසේම මේ වාමාංශික දේශපාලනයේ න්‍යායක් බවද ඔහු පැවසීය.
ලංකා ගුරු සංගමයේ ප්‍රධාන ලේකම් ජෝසෆ් ස්ටාලින් මෙම සංවාදයට එක් වී සිටියේය. රාජ්‍ය සේවක වැටුප් ගැටලු‍ව සම්බන්ධ වෘත්තීය සමිති කටයුතුවලට ජනතා විමුක්ති පෙරමුණට සම්බන්ධ වෘත්තීය සමිති ද සම්බන්ධ වී සිටි බව ඔහු සිහිපත් කොට තිබුණි. කෙසේ වෙතත් වෘත්තීය සමිති විසුරුවා හැරීම පිළිබඳ වන අදහස් ඔහු වෙතින්ද විවේචනයට ලක් විය.
“තවමත් ඒ ගැටලු‍ව විසඳන්න ආණ්ඩුව මැදිහත් වෙනවා වෙනුවට නිපුණආරච්චි කියනවා, වෘත්තීය සමිති විසුරුවා හරිනවා කියලා. ප්‍රශ්න විසඳනවා, මීට පස්සේ ගැටලු ඇතිවෙන්නෙ නෑ කියලා වචනවලින් කියලා වැඩක් නෑ. අපේ ප්‍රශ්න විසඳනවා නම් අපි එළියට බහින්නෙ නෑ තමයි. නමුත් ඒවා වචනවලට සීමා කරලා හරියන්නෙ නෑ.”
රාජ්‍ය සේවක වැටුප් ගැටලු‍ව තවදුරටත් ඉතිරිව තිබියදී මෙවන් ප්‍රකාශ සිදු කිරීම පිළිබඳ තවත් වෘත්තීය සමිති නායකයන් තුළ ද අප්‍රසාදය පළවනු දැකගත හැකි විය.
තවත් වෘත්තිය සමිති නායිකාවක වන වාණිජ හා කාර්මික සේවක සංගමයේ සභාපති නීතිඥ ස්වස්තිකා අරුලින්ගම් ද පවසා තිබුණේ වැඩවර්ජන කිරීම කම්කරුවන්ගේ අයිතියක් බවයි.
“වැඩවර්ජන කියන්නෙ මීට පස්සේ ඉතිහාසයට එක්වෙන දෙයක් කියලා ඒ අය කිව්ව කතාව සමස්ත කම්කරු ව්‍යාපාරයටම විරුද්ධව කියපු කතාවක්. ඒකට අපි සම්පූර්ණයෙන් විරුද්ධයි.
මාලිමා ආණ්ඩුවට කියන්න බෑ, එයාලා හාම්පුතුන් එක්ක කතා කරලා විසඳුම් ගන්නම් කියලා. ඒකට අයිතිය තියෙන්නෙ අපට.”
ජාත්‍යන්තර මූල්‍ය අරමුදලේ කොන්දේසිවලට අනුව නව කම්කරු පනතක් සකස් වෙමින් ඇති බවත්, ඊට අනුව වැඩවර්ජන වළකාලීමේ අරමුණ සහිතව මෙවන් ප්‍රකාශ සිදුවන බවත් ස්වස්තිකා අරුලින්ගම් ඇතුළු වෘත්තීය සමිති නායක නායිකාවන් තුළ සැක සංකා නිර්මාණය වී ඇති බව පෙනී ගියේය.
මේ අතර සෞඛ්‍ය ක්ෂේත්‍රයට සම්බන්ධ ක්‍රියාකාරී වෘත්තීය සමිති නායකයකු වූ, මේ වන විට එක්සත් ප්‍රජාතන්ත්‍රවාදී හඬ පක්ෂය සමඟ දේශපාලනයේ නියුතුව සිටින රවී කුමුදේශ් ද මේ හා සම්බන්ධව ප්‍රකාශයක් සිදු කොට තිබුණි.
“කොළඹ දිස්ත්‍රික්කයේ ජාතික ජන බලවේගයේ අපේක්ෂකයෙක්, මැතිවරණයෙන් පසු වෘත්තිය සමිති විසුරුවා හරින බවත්, වෘත්තීය සමිති ජනතාව පීඩාවට පත් කරන බවත් ප්‍රකාශ කර තිබුණා. මේක ජාතික ජන බලවේගයේ හෝ ජනතා විමුක්ති පෙරමුණ ආණ්ඩුවේ නිල ප්‍රකාශය ද කියලා ජනාධිපතිවරයා නිශ්චිත ප්‍රකාශයක් කළ යුතුයි. අපේක්ෂකයකු ලවා මෙවන් ප්‍රකාශයක් කරමින්, බලය ලබාගත් පසු ඊට ජනතා එකඟතාවක් ඇති බව ප්‍රකාශ කිරීමේ අවදානමක් තිබෙනවා. ඒ නිසා වෘත්තීය සමිති පිළිබඳව ආණ්ඩුවෙත් මතය එය නම්, මැතිවරණයට පෙර එය නිශ්චිතව ප්‍රකාශයට පත් කිරීමේ වගකීමක් ආණ්ඩුවට තිබෙනවා.”
මේ ආදී ප්‍රකාශ, අදහස් රැසක් පසුගිය සතිය පුරාවට දැකගත හැකි විය. සැබෑවටම රටක් තුළ වැඩවර්ජන සහ වෘත්තීය සමිති ක්‍රියාකාරීත්වය නතර කිරීම පහසු නොවන බව පැහැදිලිය. කෙසේ වෙතත් නිපුණආරච්චි මහතා ඉදිරිපත් කිරීමට සූදානම් වූයේ වෘත්තීය සමිති අහෝසි කිරීමක් පිළිබඳ කතාවක්ද, නොඑසේ නම් වෙනත් අදහසක්ද යන්න තවදුරටත් ගැටලු සහගතය. මේ පිළිබඳ නිශ්චිත පැහැදිලි කිරීමක් මැතිවරණයට පෙර ලැබෙන්නේ නම් එය ඉතා අගය කොට සැලකිය යුතුමය.
• චමිඳු නිසල් ද සිල්වා
මූලාශ්‍ර : BBC සිංහල