එජාප-සජබ පක්ෂ දෙක එකතු වෙන්නම ඕනෑ
රුවන් විජයවර්ධන – එජාප නියෝජ්‍ය නායක
ගම්පහ දිස්ත්‍රික් අපේක්ෂක නව ප්‍රජාතන්ත්‍රවාදී සන්ධානය
ඔබ එක්සත් ජාතික පක්ෂයේ නියෝජ්‍ය නායකයා. ඔබ මෙවර තරග කරන්නෙ පොහොට්ටුව සහ එක්සත් ජාතික පක්ෂයේ අයත් සමඟයි. ජනාධිපතිවරණය වගේ නෙමෙයි, අපේක්ෂකයො දෙගොල්ලම, පාක්ෂිකයො දෙගොල්ලොම එකතු කරගන්න ඕනෑ. මේක කොහොමද ඔබලා සිදු කරන්නෙ?
අපි ජනාධිපතිවරණයෙදි හැමදෙනාම එකම වේදිකාවට නැග්ගෙ හිටපු ජනාධිපති රනිල් වික්‍රමසිංහ මහත්තයාගේ ආර්ථික ප්‍රතිපත්තිය ඉදිරියට අරගෙන යන්න. ඒ නිසාම මේ මහ මැතිවරණයෙදි එකට එක්ව තරග කරන්න තීන්දුවක් ගත්තා. ඇත්තටම කියන්න ඕනෑ අපේ දෙපාර්ශ්වය අතර කිසිදු ගැටුමක් නෑ. හැමෝම එකතු වෙලා වැඩ කරනවා. විශේෂයෙන් ගොඩක් දෙනා බලාපොරොත්තු වුණා රනිල් වික්‍රමසිංහ මහත්තයාගේ නායකත්වය. දැන් එතුමා අපිත් එක්ක ඔහුගේ නායකත්වය දෙමින් කටයුතු කරමින් ඉන්නවා.
ඔබලගේ කණ්ඩායමට නායකත්වය දෙන්නෙ රනිල් වික්‍රමසිංහ මහත්තයා. ඔබලට එතුමා පාර්ලිමේන්තුවෙ නැතුව කටයුතු කරන්න හැකි වෙයිද?
එතුමා පාර්ලිමේන්තුවෙ ඉන්න එක නම් ලොකු ශක්තියක්. නමුත් එතුමාගේ ප්‍රතිපත්තියත් එක්සත් ජාතික පක්ෂයේ ප්‍රතිපත්තියත් මත තමයි එතුමා පාර්ලිමේන්තු නොයන්නෙ.
මොකක්ද ඒ පාර්ලිමේන්තු නොයන ප්‍රතිපත්තිය?
මේ පක්ෂයේ ප්‍රතිපත්තියක් තියෙනවා, ජනාධිපති හැටියට පත්වෙලා ගියාට පස්සෙ නැවත මන්ත්‍රීවරයෙක් හැටියට පාර්ලිමේන්තුවට එන්නෙ නෑ කියලා. එක්සත් ජාතික පක්ෂයේ ප්‍රතිපත්තියක් හැටියට ඒක අපි සියලු දෙනාම අනුගමනය කරනවා. ඒ අනුව රනිල් වික්‍රමසිංහ මහත්තයා කිව්වා ඒ ප්‍රතිපත්තියට ගරු කරලා පාර්ලිමේන්තු එන්නෙ නෑ කියලා. නමුත් ඇත්තටම එතුමාගේ නායකත්වය මේ වෙලාවෙ රටට අවශ්‍යයි. ඒ වගේම පාර්ලිමේන්තුවටත් අවශ්‍යයි. ඒත් ප්‍රතිපත්තිය අනුව එතුමා පාර්ලිමේන්තු එන්නෙ නෑ.
වර්තමාන ආණ්ඩුව අලු‍ත් මුහුණු වගයක් දේශපාලනයට හඳුන්වලා දෙන්න යන්නෙ. ඒත් ඔබේ නායක රනිල් වික්‍රමසිංහ මහත්තයා කියනවා පරිණත නායකයෝ නැතුව මේ රට පාලනය කරන්න බෑ කියලා. දැන් මොකක්ද ජනතාව කරන්න ඕනෑ?
ඇත්තටම අපි යථාර්ථය තේරුම් ගන්න ඕනෑ. නායකත්වයට පත්වෙන ජනාධිපතිවරයාගේ පක්ෂය තමයි ඊළඟට ආණ්ඩුව පිහිටුවන්නෙ. හැබැයි මාලිමාවට ඡන්දය දුන්න සමහර අය ටිකක් කලකිරීමකින් ඉන්නෙ. මොකද ජනතාව ඉක්මනින් බලාපොරොත්තු වුණු දේවල් සිද්ධ වුණේ නෑ. ඒත් මම හිතනවා ජනාධිපතිතුමා පත්වෙලා පොඩි කාලයක් නිසා ඔහුට කාලයක් දෙන්න ඕනෑ. ඒත් මම කියනවා ජනතාවට මේ පාර ඡන්දෙදි හොඳ පළපුරුදු කණ්ඩායමක් පාර්ලිමේන්තු යවන්න කියලා.
ජනතාව කියන්නෙ අලු‍ත් මුහුණු ඕනෑ කියලා. මාලිමාව අලු‍ත් මුහුණු ඉදිරිපත් කරලා තියෙනවා. මොකද හිටිය අය සම්බන්ධයෙන් ජනතාවට අවුලක් තියෙන නිසා?
මාලිමාවේ කණ්ඩායම ගත්තාම ඒ අය අතර පළපුරුදු නායකයෝ අඩුයි. ඒක ඉතාම නරක තත්ත්වයක්. ඒ අයට පාර්ලිමේන්තු ක්‍රමය ගැන අවබෝධයක් නෑ. ඒ අය තමයි අරගලය වෙලාවෙ පාර්ලිමේන්තුව අල්ලන්නත් ගියේ. රනිල් වික්‍රමසිංහ මහත්තයා ඒ වෙලාවෙ පාර්ලිමේන්තුව රැක්කා. ඒ අත්දැකීම් නැති එක ලොකු ප්‍රශ්නයක්. ඒ නිසා පාර්ලිමේන්තුවේ හිඩැස් ඇතිවෙන්න පුළුවන්.
අපි දන්නවා ගෝඨාභය රාජපක්ෂ මහත්තයාගේ ආණ්ඩුවත් තුනෙන් දෙකේ බලයක් ගත්තා. ඒත් ආණ්ඩුව කරගෙන යන්න බැරිව ගියා. දැන් ඔබ කියන්නෙ මේ අලු‍ත් කණ්ඩායමට ඒ වගේ අවදානමක් තියෙනවා කියලද?
ඇත්තටම ඔව්... භයානක අවදානමක් තියෙනවා. පුහුණුවක් නැති කණ්ඩායමක් බලය අතට ගත්තොත් රටට මොකක්ද වෙන්නෙ කියලා හිතාගන්නවත් බෑ. හොඳම උදාහරණය ගෝඨාභය මහත්තයාගේ ආණ්ඩුව ගොඩක් පාලනය කළේ වියත් මඟ හිටපු අය. ඒ නිසා ඉක්මනින් වැරදුණා. ඒත් ගෝඨාභය රාජපක්ෂ මහත්තයාගේ ආණ්ඩුව අඩුම ගාණේ අවුරුදු දෙකහමාරක්වත් හිටියා. මෙයාලට ඒ ප්‍රමාණයවත් ඉන්න පුළුවන් වෙයිද කියලා ප්‍රශ්නයක් තියෙනවා. එහෙම වුණොත් ඒ අය බලාපොරොත්තු වුණු වෙනස රටේ ජනතාවට දෙන්න බැරි වෙනවා.
ජනාධිපතිවරණය මුලදිත්, ඉන් පසුවත්, ඒ වගේම මහ මැතිවරණයට ළං වෙලත් ඔබලා උත්සාහයක් ගත්තා සමගි ජන බලවේගය එක්ක එකතු වෙන්න. ඒත් ඒක හරි ගියේ නෑ. මම අහන්නෙ දැන් පාර්ලිමේන්තුවට ගියාට පස්සෙ මේ කණ්ඩායම් දෙක එකතු වෙලාද වැඩ කරන්නෙ?
ඔබ කිව්වා වගේ අවස්ථා කිහිපයකදී උත්සාහ ගත්තා මේ පක්ෂ දෙක එකතු කරන්න. මහ මැතිවරණය කිට්ටු වෙලා රනිල් වික්‍රමසිංහ මහත්තයා මට පැවරුවා ඒ පක්ෂය එක්ක සාකච්ඡා කරන්න. සමහර අවස්ථාවලදී සාකච්ඡා සාර්ථක වුණා. සමහර කොන්දේසි නිසා සාකච්ඡා ඉදිරියට කරගෙන යන්න බැරි වුණා. අනිවාර්යෙන්ම මේ පක්ෂ දෙක එකතු වෙන්න ඕනෑ. මම හිතනවා මහ මැතිවරණයෙන් පස්සෙ මේ පක්ෂ දෙක එකතු වෙන තැනකට එයි කියලා.
ඔබ දෙගොල්ලො එකතු වුණා නම් ආණ්ඩුවක් හදන්න තිබුණා කියලා විශ්වාස කරනවද?
අනිවාර්යෙන්ම. ජනාධිපතිවරණයේදී අපේ පක්ෂ දෙකේ ඡන්ද ප්‍රතිඵල ගත්තාම ජනාධිපතිතුමාගේ ඡන්දවලට වඩා වැඩියි. මේ නිසාම තමයි රනිල් වික්‍රමසිංහ මහත්තයට ඕනෑ වුණේ මහ මැතිවරණයට පුළුල් සන්ධානයක් හදන්න. නමුත් අපිට ඒක කරගන්න බැරුව ගියා. පාර්ලිමේන්තුව ඇතුළේ අපි දෙගොල්ලන්ටම එකතු වෙලා වැඩ කරන්න පුළුවන්. ඒ වගේම නැවත මේ එක්සත් ජාතික පක්ෂය ගොඩනගන්න ඕනෑ.
ගෑස් සිලින්ඩරය ලකුණ ජනතාවට පුරුදු ලකුණක් නෙමේ. ඊට වඩා ජනතාවට අලියා සමීපයි. ඒත් ඔබලා අලියා ගත්තෙ නෑ. ඒ කියන්නෙ ශ්‍රී ලංකා නිදහස් පක්ෂය වගේම එක්සත් ජාතික පක්ෂයේ ගමනත් මෙතැනින් අවසන් වෙනවද?
කොහොමටත් එක්සත් ජාතික පක්ෂය කියන්නෙ මේ රටේ ඉතිහාසයත් එක්ක බැඳුණු පක්ෂයක්. වාමාංශික පැත්තෙ අයගෙත් එක්සත් ජාතික පක්ෂයට ගෞරවයක් තියෙනවා. ඒ වගේම සියලු‍ම ආගම්වල නායක ස්වාමීන් වහන්සේලා, පූජකවරු හැමෝම මේ පක්ෂය ගැන අහනවා. ගොඩක් අය අහනවා අලියා ගේන්නෙ නැද්ද කියලා. ඒ නිසා මට විශ්වාසයි ජනතාව අලියා විශ්වාස කරනවා. මම හිතනවා මහ මැතිවරණයෙන් පස්සේ පක්ෂය නැවත නිවැරදි තැනට ගේන්න පුළුවන් වෙයි කියලා.
ගම්පහ දිස්ත්‍රික්කය කියන්නෙ ඔබගේ පරම්පරාවට නෑකම් තියෙන දිස්ත්‍රික්කයක්. ගම්පහ ජනතාව පරම්පරාවම දන්නවා. ඔබ ගම්පහ දිස්ත්‍රික් අපේක්ෂකයෙක්. ඔබ කොහොමද ගම්පහ ජනතාව ගැන විශ්වාසය තියන්නෙ?
ගම්පහ දිස්ත්‍රික්කයෙන් තමයි එක්සත් ජාතික පක්ෂය මතු වුණේ. ඩී.එස්. සේනානායක මැතිතුමා, ඩඩ්ලි සේනානායක මැතිතුමා, ජේ.ආර්. ජයවර්ධන මැතිතුමා, ඒ හැමෝම දේශපාලන ගමන පටන් ගත්තෙ ගම්පහෙන්. හැබැයි බණ්ඩාරනායක මහත්තයාට පස්සේ ගම්පහ දිස්ත්‍රික්කය වාමාංශික පැත්තට බර වුණා. ඒක විශාල අභියෝගයක්. මම හිතනවා මට ඒක ජය ගන්න පුළුවන් වෙයි කියලා.
එහෙම ඉතිහාසයක් තියෙන පක්ෂයක් ගැන මම හිතන්නෙ නෑ අලු‍ත් පරම්පරාව දන්නවා කියලවත්?
ඔබ හරි. නූතන පරම්පරාවට ඉතිහාසය ගැන අවබෝධයක් නෑ. අපිට තියෙන අරමුණක් තමයි මේ නූතන පරම්පරාවට ඒ ඉතිහාසය පෙන්වා දෙන එක. අපේ පක්ෂයේ තියෙන දුර්වලතාවය තමයි සන්නිවේදන ප්‍රශ්නය. හරියට සන්නිවේදනය වෙන්නෙ නෑ. අපේ ප්‍රතිපත්ති, ඉතිහාසය මොකක්ද කියල දන්නෙ නෑ. අපි ඒක ඉක්මනින් නිවැරදි කරනවා.
ගම්පහ ජනතාව ගැන ඔබට විශ්වාසයක් තියෙනවද?
පැහැදිලිවම. මම හිතනවා ගම්පහ දිස්ත්‍රික්කයෙන් නැවත එක්සත් ජාතික පක්ෂය ආරම්භ කරන්න පුළුවන් යිවෙ කියලා. හැබැයි ඒක විශාල අභියෝගයක්. මේ පාර මාලිමාවට වැඩිම ඡන්ද ගියෙත් ගම්පහෙන්. ඒ නිසා ඒක වෙනස් කරන්න ඕනෑ අපි.
ජනතාවට ගැටලුවක් තියෙනවා, පහුගිය දේශපාලනඥයන් ගත කරපු ජීවිත ගැන. හම්බවෙන වාහන, ආරක්ෂාව, මේ සියල්ල දැන් ජනතාව දකිනවා. ඔබ හිතන්නෙ මොකක්ද ඒ ගැන?
ජනාධිපතිවරයා නාස්තිය අවම කරන එක, දූෂණය නතර කරන එක ඉතාම හොඳ දෙයක්. අපි බලාපොරොත්තු වුණෙත් එහෙම දේවල්. මමත් හිතනවා අලු‍ත් දේශපාලන සංස්කෘතියක් ඕනෑ. දේශපාලනඥයන් කෙරෙහි ජනතාව දැන් සැකයෙන් බලන්නෙ. ඒ නිසා මම හිතනවා මේ වෙනස හොඳයි කියලා. ඒත් ඉතින් බලන්න ඕනෑ මොකද වෙන්නෙ කියලා. හැබැයි කියන්න ඕනෑ, මම කවදාවත් ඇමැතිකම් දැරුව මොහොතේ කිසිම වරප්‍රසාදයක් ගත්තෙ නෑ. වාහනය සහ නිවස, මගේ පෞද්ගලික දේවල් පාවිච්චි කළේ. ඊට පස්සේ ජනාධිපතිතුමාගේ උපදේශකයකු හැටියට ඉන්නකොට මම පඩියක් ගත්තෙත් නෑ. ඒ වගේ සමහර දේශපාලනඥයෝ ඉන්නවා රටට ආසාවෙන් වැඩ කරන.
• ගයාන් ගාල්ලගේ