ශ්‍රී ලංකා ක්රිකට් ක්රීඩිකාවන්ගේ විප්ලවය
"මගේ මට්ටමට වඩා පහළ ඉන්න වෙනත් රටවල්වල ක‍්‍රීඩිකාවන් දස්කම්වලින් හොඳට ජීවත් වෙනවා. ඒත් මට බලන්නකෝ ගෙවන ගාණ. මටත් දැන් එපා වෙලා තියෙන්නේ. මම කොහෙ හරි යනවා. එතකොට මටත් ලස්සනට ජීවත්වෙන්න පුළුවන්. වෙන කරන්න දෙයක් නෑ’’ මෙය ශ්‍රී ලංකා කාන්තා ක්රිකට් පිලේ ප‍්‍රබලතම ක‍්‍රීඩිකාවකගේ පීඩනය වචනවලට පෙරළුණු අවස්ථාවකි.
මෙම පීඩනය පසුගියදා සාමූහික ප‍්‍රයත්නයක් ලෙස විරෝධයක් ලෙස කරළියට පැමිණියේය.
ශ්‍රී ලංකා ක්රිකට් ඉතිහාසයේ පිරිමි හෝ කාන්තා ක්රිකට් කණ්ඩායම්වල සාමාජිකයන් විරෝධතාවකින් තම අයිතිවාසිකම් දිනාගත් පළමු අවස්ථාව පසුගිය සිකුරාදා අසන්නට ලැබුණි.
ශ්‍රී ලංකා කාන්තා ජාතික ක්රිකට් සංචිතයේ සහ කාන්තා නැගී එන සංචිතයේ ක‍්‍රීඩිකාවෝ කොළඹ ආර්. ප්‍රේමදාස ක‍්‍රීඩාංගණයට එකම වේලාවක වාර්තා කර සියලු දෙනා පුහුණුවීම්වලින් ඉවත්ව තමන්ගේ ගැටලුවලට විසඳුම් දෙන තෙක් විරෝධය දක්වන බවට ක්රිකට් බලධාරීන්ට දැනුම් දුන්හ.
ශ්‍රී ලංකා කාන්තා ක්රිකට් බාර නිලධාරී අසංක ගුරුසිංහ මහතාගේ මැදිහත්වීමෙන් එම විරෝධය පැය කීපයකට සීමාකර ගැනීමට හැකිවිය.
ක්රීඩිකාවන්ගේ දෙසැම්බර් මස වැටුප නොලැබීම, ශ්‍රී ලංකා ක්රිකට් ආයතනයෙන් ලබාදෙන කෑම අඛණ්ඩව ප‍්‍රමිතයෙන් තොර වීම, පුහුණුකරුගේ සේවය අඛණ්ඩව නොලැබීම සහ නිලධාරියකු ක‍්‍රීඩිකාවන්ට නොගැලපෙන වචනයෙන් කථා කිරීම මෙම විරෝධතාවට ප‍්‍රධාන හේතුව බවට පත්විය.
මෙම එක හේතුවක් මුල්කරගෙන ශ්‍රී ලංකා පිලේ තරුණ දක්‍ෂ ක‍්‍රීඩිකාවන් දෙපළක් වන නිපුනි හංසිකා සහ රෙබේකා වැන්ඩට් මේ වන විටත් ඕස්ට්‍රේලියාව බලා පිටත්ව ගොස් අවසන්ය. ජ්‍යෙෂ්ඨ ක‍්‍රීඩිකාවක් වන ශ්‍රීපාලි වීරක්කොඩි ද ඕස්ට්‍රේලියාවට ගොස් සිටින්නීය.
ජාතික කණ්ඩායමේ තවත් ක‍්‍රීඩිකාවන් සිවුදෙනකු ඩුබායි බලා පිටත්ව යෑමට සූදානම් වන බව ද කාන්තා ක්රිකට් ක්ෂේත‍්‍රයෙන් දැනගන්නට ලැබේ.
ක‍්‍රීඩිකාවන්ට දෙසැම්බර් මස දීමනාව නොගෙවීම කාගේ වරදක්ද? එයට ශ්‍රී ලංකා ක්රිකට් පරිපාලනය සෘජුවම වගකිව යුතුය.
ශ්‍රී ලංකා ක්රිකට් පරිපාලනය ශ්‍රී ලංකා ක්රිකට් ආයතනයට පය නොතැබූ පුද්ගලයන්ට ද ලක්‍ෂ ගණනින් වැටුප් ගෙවද්දී ක්රිකට් ක‍්‍රීඩිකාවන්ට ලැබිය යුතු රුපියල් 15,000 ක් 20,000 ක් ගෙවීම මඟ හැරීම සාධාරණද?
කාන්තා ක්රිකට් පරිපාලනයට යැයි පවසමින් ශ්‍රී ලංකා ක්රිකට් ආයතනයෙන් ලක්‍ෂ ගණනින් වැටුප් ලබන අය එක දිනයක් සිය වැටුප ප‍්‍රමාද වූවහොත් ක්රිකට් සභාපතිට එස්.එම්.එස්. පණිවුඩ නොයවන්නේද?
ශ්‍රී ලංකා ක්රිකට් ආයතනය කෑම සැපයුම්කරුවන්ට විශාල මුදලක් ගෙවන්නේ නම් ක‍්‍රීඩිකාවන්ට නරක් වූ කෑම අඛණ්ඩව ලැබෙන්නේ නම් ඒ සඳහා කථා කිරීම වරදක් යැයි කිසිවකුට පැවසිය නොහැක.
‘‘අපිට දෙන්නේ ෆ්‍රයිඩ් රයිස් එකට චිකන් කෑල්ලක් එක්ක කෑම එකක්. ව්‍යායාමවලට සම්බන්ධ නිලධාරීනියක් අපිට කියනවා ඒක කන්න කියලා’’ යැයි කාන්තා ක්රිකට් සම්බන්ධ කාන්තාවක් ‘දේශය’ට පැවසුවාය.
ශ්‍රී ලංකා ජාතික කාන්තා ක්රිකට් පිලේ පුහුණුකරු හර්ෂ ද සිල්වා මහතා මාස ගණන් නිවාඩු ලබා ඔස්ට්‍රේලියාවට ගොස් සිටීමෙන් ක‍්‍රීඩිකාවන්ට ප‍්‍රධාන පුහුණුකරුගේ සේවය නොලැබෙන බව වාර්තා වේ. රුපියල් ලක්‍ෂ නවයක වැටුපක් ගන්නේ යැයි කියන පුහුණුකරුවකුට එසේ නිවාඩු ගතහැකිද යන්න ගැටලුවකි.
හර්ෂ මහතාගේ දරුවන් ඇතුළු පවුලේ සාමාජිකයන් ඔස්ට්‍රේලියාවේ පදිංචිව සිටින බව වාර්තා වේ. ඒ හේතුවෙන් ඔහු සංචාරයක් නොමැති අවස්ථාවේදී ඔස්ට්‍රේලියාවට යෑමට උනන්දුවක් දක්වන බවට චෝදනා එල්ල වේ.
අසංක ගුරුසිංහ මහතාගෙන් මේ පිළිබඳව කළ විමසුමේදී පැවසුවේ මානුෂික හේතු මත පුහුණුකරුට නිවාඩු ලබාදුන් බවයි. ජාතික වගකීමකදී මානුෂික හේතු තිබිය හැකිද යන්න මෙහිදී මතුවන තවත් ගැටලුවකි.
"උන් කවුද විරෝධතා කරන්න. මුන්ව එළවන්න ඕනේ. අරකි ඇවිත් මගෙන් සමාව ගත්තා’’ යැයි මෙම කණ්ඩායමේ නිලධාරියකු පවසා ඇතැයි ද කාන්තා ක්රිකට් ක්ෂේත‍්‍රයේ කතාබහට ලක්ව තිබේ.
ඉහත ප‍්‍රකාශය කළ නිලධාරියා ක‍්‍රීඩිකාවන්ට කථා කරන ආකාරය ඉතාමත් පහත් තත්ත්වයක පවතින බව බොහෝ දෙනා පවසති. හිටපු ක්රිකට් ප‍්‍රධානියකුගේ එහෙයියෙක් වන මෙම පුද්ගලයා කණ්ඩායමට පිළිලයක් බවට පත්ව ඇති බව වාර්තා වේ.
ශ්‍රී ලංකා කාන්තා ක්රිකට් කණ්ඩායම ඕස්ට්‍රේලියාවේ මිතුරුකමට සහ කොළඹ ප‍්‍රධාන පාසලක මිතුරුකමට මෙහෙයවිය නොහැකි බව ක්රිකට් බලධාරීන් දැන සිටිය යුතුය.
ක‍්‍රීඩකයන්ට නැති ශක්තියක් චමරි අතපත්තු ප‍්‍රමුඛ ක‍්‍රීඩිකාවන්ට තිබූ බව පසුගිය 10 වැනිදා ඔවුහු ප‍්‍රදර්ශනය කළහ.
I සටහන: යොහාන් භාසුර