අපේක්ෂක විරෝධතා නිසා ක්රිකට් සටන රත්වෙයි
ශ්රී ලංකා ක්රිකට් ආයතනයේ නිලවරණයේ සභාපති ධූරයට නාමයෝජනා ඉදිරිපත්කර ඇති ජයන්ත ධර්මදාස සහ මොහාන් ද සිල්වා යන මහත්වරු දෙදෙනාට එරෙහිව ක‍්‍රීඩා අමාත්‍යවරයා පත්කළ අභියාචනා කමිටුවට විරෝධතා ඉදිරිපත් වීමෙන් ක්රිකට් නිලවරණය නැවතත් උණුසුම් වී තිබේ.
ක‍්‍රීඩා අමාත්‍යවරයාගේ අභියාචනා කමිටුවට විරෝධතා දහයකට ආසන්න සංඛ්‍යාවක් යොමුකර ඇති බව වාර්තා වේ. එහිදී ජයන්ත ධර්මදාස මහතාට එරෙහිව ක‍්‍රීඩා පනතට ප‍්‍රකාරව පළමු පෙළ ක්රිකට් ක‍්‍රීඩා කර නොමැති බවට සභාපති ධූර අපේක්‍ෂකයන් වන මොහාන් ද සිල්වා සහ ශම්මි සිල්වා යන මහත්වරු විරෝධතා ඉදිරිපත්කර ඇති බව වාර්තා වේ.
ධර්මදාස මහතා ශ්රී ලංකා ක්රිකට් ආයතනයේ තනතුරු දරමින් සිටියදී ශ්රී ලංකා ක්රිකට් ආයතනයේ පහසුකම් සැලසීමේ අනුග‍්‍රහකයකු ලෙස කටයුතු කළ බවට ද ශම්මි සිල්වා මහතා ධර්මදාස මහතාට එරෙහිව විරෝධතාවක් ඉදිරිපත් කර ඇති බව වාර්තා වේ.
සභාපති ධූර අපේක්ෂක ශම්මි සිල්වා මහතා 2001 වසරේ ක්රිකට් විධායක කමිටුව නියෝජනය කරමින් සිටියදී එවකට ක‍්‍රීඩා අමාත්‍ය ලක්‍ෂ්මන් කිරිඇල්ල මහතා ගැසට් පත‍්‍රයක් ඔස්සේ විසුරුවා හැරීම පාදක කරගෙන විරෝධතාවක් ඉදිරිපත් වී ඇති බව වාර්තා වේ.
සභාපති ධූර අපේක්ෂක මොහාන් ද සිල්වා මහතා විධායක කමිටුව නියෝජනය කරමින් සිටියදී එවකට ක‍්‍රීඩා අමාත්‍ය ජීවන් කුමාරතුංග මහතා කමිටුව විසුරුවා හැරීම නිමිත්ත බවට පත්කරගනිමින් ඒ මහතාට එරෙහිවද විරෝධතාවක් ඉදිරිපත්ව තිබේ.
විශ‍්‍රාමික ශ්‍රේෂ්ඨාධිකරණ විනිසුරු නිමල් දිසානායක මහතා සභාපතිත්වයෙන් යුත් අභියාචනා කමිටුව මෙම විරෝධතා සළකා බලා මේ මස 10 වැනිදාට පෙර තීරණ ප‍්‍රකාශ කිරීමට නියමිතය බව වාර්තා වේ. මෙම තීන්දු ප‍්‍රකාකශයට පත්කිරීමෙන් පසුව අදාළ පාර්ශව ගන්නා තීරණ මත නිලවරණයේ අනාගතය ද තීරණ වේ.
I විශේෂ ලියුම්කරුවකු විසිනි