ඔහොම ගහලා මැච් දිනන්න බෑ
ශ්‍රී ලංකා ටෙස්ට් පිල ඕස්ට්‍රේලියාවට එරෙහිව බ්‍රිස්බේන්හිදී පැවැති ටෙස්ට් තරගය තුන්දින තරගයක් බවට පත්කරමින් දින දෙකහමාරකින් පරාජය වැළඳ ගැනීමත් සමඟ ශ්‍රී ලංකා ක‍්‍රිකට් අගාදයට ඇඳ වැටුණෝය. ශ්‍රී ලංකා පිල එහිදී ඉනිමක සහ ලකුණු 40ක පරාජයක් ලැබීය. මෙහිදී ශ්‍රී ලංකා පිලට ඉනිමක පරාජයෙන් ගැලවීමට ලකුණු 172 ක ඉලක්කයක් බාරවූ අතර තරගයේ දෙවැනි දිනය අවසන් වනවිට දෙවැනි ඉනිමේදී කඩුල්ලක් දැවී ලකුණු 17 ක් ලබා සිටියේය. තෙවැනි දිනයේ දෙවැනි ඕවරයේදී නායක දිනේෂ් චන්දිමාල් ලකුණු නොලබා දැවී ගියේය. එම අවස්ථාව ඉනිම පරාජයෙන් ගැලවීම සඳහා හෝ තීරණයක් ගැනීමට හොඳම අවස්ථාව බවට පත්විය.
බ්‍රිස්බේන් විකට් එකේ ඔහොම ගහලා මැච් දිනන්න බෑ. බෝලෙට දැනෙන්න ගහන්න ඕනේ. තට්ටු ඇල්ලුවොත් අවුට් වෙලා යන එක තමයි වෙන්නේ යැයි ජාතික කණ්ඩායම නියෝජනය කළ ප‍්‍රබල ක‍්‍රීඩකයෙක් පැවසීය. එම හිටපු ක‍්‍රීඩකයාගේ ප‍්‍රකාශය යථාර්ථයක් බවට පත්කරමින් ශ්‍රී ලංකා පිලේ දෙවැනි ඉනිම ලකුණු 132 කට සීමාවිය. ශ්‍රී ලංකා පිල කඩුලු පිට කඩුලු වැටුණද ආරක්‍ෂා වීමේ පිළිවෙතින් ඈත් නොවීය. බ්‍රිස්බේන් තණතීරුව පිළිබඳව දැනුමැත්තන් පවසන්නේ එහිදී වේගයෙන් පන්දුවට පහරදීම විකල්පය බවයි.
මෙම තත්ත්වය පිළිබඳව හොඳ අවබෝධයකින් සිටි තේරීම් කමිටුව අංක හය ස්ථානයේ පන්දුවට පහර දීමට ප‍්‍රවේගකාරී පිතිකරු කුසල් පෙරේරා යොදා ගැනීමට යෝජනා කළද එය කණ්ඩායමේ වෙනත් නිලධාරියකු ප‍්‍රතික්ෂේප කළ බව වාර්තා වේ. කුසල් පෙරේරාගේ ස්ථානයට රොෂේන් සිල්වා ක‍්‍රීඩා කළ අතර අංක හය ස්ථානයේ ධනංජය සිල්වා පන්දුවට පහර දුන්නේය. රොෂේන් සිල්වා විශේෂයෙන් ශ්‍රී ලංකාවේදී කඩුල්ලේදී රැඳී සිටිමින් දිගු ඉනිම කරා යන පිතිකරුවෙකි. එය එසේ වුවද ඕස්ට්‍රේලියාවට එම ක‍්‍රමවේදය නොගැලපෙන බව තේරීම් කමිටුවේ අදහසයි.
ශ්‍රී ලංකාව මෙම තරගාවලියේදීද සුපුරුදු ‘ආබාධ’ ගැටලුවට මුහුණ දී තිබේ. පළමු ටෙස්ට් තරගය අවසන් වනවාත් සමඟ වේගපන්දු යවන්නන් වන ළහිරු කුමාර සහ දුෂ්මන්ත චමීර ආබාධයන්ට ලක්වූහ. ශ්‍රී ලංකා පිලේ ප‍්‍රධානතම වේගපන්දු යවන්නකු වන නුවන් ප‍්‍රදීප් තරගාවලිය ආරම්භ වීමට පෙරම ආබාධයකට ලක්වූ අතර ඒ වෙනුවට විශ්ව ප‍්‍රනාන්දු පිටත්ව ගියේය. ආබාධයන්ට ලක්වූ සෙසු දෙපළ වෙනුවට යොවුන් වේගපන්දු යවනන්කු වන චාමික කරුණාරත්න සංචිතයට එකතු විය.
ලක්‍ෂ ගණනින් වැටුප් ලබන සුදු ජාතික භෞත චිකිත්සකයන් සහ අභ්‍යාසකයන් සිටියදී අඛණ්ඩව මේ ආකාරයට ක‍්‍රීඩකයන් ආබාධයන්ට ලක්වීම සත්‍ය වශයෙන්ම ගැටලුවකි. ශ්‍රී ලංකා ක‍්‍රිකට් බලධාරීන් මේ සඳහා හැකි ඉක්මනින් පිළියම් යෙදිය යුතුය.
I සටහන: යොහාන් භාසුර
