තිරිමාන්නගෙන් වැඩක් වෙයිද?
ඉන්දියාව හමුවේ ඓතිහාසික පරාජයක් ලැබූ ඕස්ට්‍රේලියානු ක‍්‍රිකට් පිලට එරෙහිව පසුගිය බ‍්‍රහස්පතින්දා බ්‍රිස්බේන්හිදී ආරම්භ වූ ‘වෝන් - මුරලිදරන්’ කුසලාන ටෙස්ට් ක‍්‍රිකට් තරගාවලියේ පළමු ටෙස්ට් තරගයේ පළමු දිනයේ පස්වරුව වනවිට අමාරුවේ වැටී සිටියේය. ඕස්ට්‍රේලියානු වේගපන්දු යවන්නෝ ශ්රී ලංකා ඉනිම ලකුණු 144 කට සීමා කරමින් හොඳ ආරම්භයක් ලබාගත්හ. ඕස්ට්‍රේලියානු පිල පළමු දිනය අවසන් වනවිට කඩුලු දෙකක් දැවී ලකුණු 72 ක් රුස්කර සිටියේය.
එහිදී ශ්රී ලංකා පිලේ ආරම්භක පිතිකරු ස්ථානයට හිටපු උප නායකයකු වන ළහිරු තිරිමාන්න කැඳවා තිබුණි. අංක තුන ස්ථානයේ පන්දුවට පහර දුන් ධනංජය ද සිල්වා අංක හය ස්ථානයට ඇද දමා නායක දිනේෂ් චන්දිමාල්ට අංක තුන ස්ථානය ලබාදී තිබුණි. ළහිරු තිරිමාන්න නැවත කණ්ඩායමට කැඳවා තිබීම කැපී පෙනේ. තිරිමාන්න යනු මීට වසර දෙකකට පමණ පෙර සංචිතයෙන් එළවා ගැනීමට නොහැකි වන සේ බලයක් නිර්මාණය කරගෙන සිටි ක‍්‍රීඩකයෙකි. වසරකට අධික කාලයකට පසුව ටෙස්ට් තරගයකට සහභාගි වූ 29 හැවිරිදි තිරිමාන්න මෙම තරගයේදී ද ලකුණු 12 කට දැවී ගියේය. එහිදී ඔහු ඕස්ට්‍රේලියානු වේගපන්දු යවන්නන් හමුවේ දැඩි අසීරුවෙන් පන්දුවට පහර දුන් ආකාරය දැකගත හැකිවිය. වර්තමාන තේරීම් කමිටුවට ඇතුළත්ව සිටින බොහෝ දෙනකු කාලය සිට තිරිමාන්න රෝගයකින් පෙලුනු අතර මෙම තරගයේදී එම රෝගය සුවකර ගත්තේය.
කඩුලු රකින ක‍්‍රීඩක නිරෝෂන් දික්වැල්ල අංක හත ස්ථානයේ පන්දුවට පහර දෙමින් රැස්කළ ලකුණු 64 නොවන්නට ශ්රී ලංකා පිල දැඩි අසරණ තත්ත්වයකට පත්වේ. ශ්රී ලංකා පිල මෙහිදී සුරංග ලක්මාල්, ළහිරු කුමාර සහ දුෂ්මන්ත චමීර යන වේගපන්දු යවන්නන් සිවුදෙනා සහ පිට දඟපන්දු යවන ඩිල්රුවන් පෙරේරා සමඟ තරගයට පිවිසියේය. ඕස්ටේ‍්‍රලියානු පිල ඉන්දියාව හමුවේ ලැබූ පරාජය තුනී කරගැනීමට මෙය අවස්ථාවක් කරගන්නවාට සැක නැත.
මෙම තරගය දිවා රාත‍්‍රී තරගයක් වීම නිසා දෙපිලටම අභියෝගයකි. එසේ වුවද ඕස්ට්‍රේලියාවට පරිසර සාධක සහාය වැඩිවීමෙන් ශ්රී ලංකා ක‍්‍රීඩකයන්ට තරගය වඩාත් අභියෝගයක් වනු ඇත. මෙය ශ්රී ලංකා පිල සහභාගි වන තෙවැනි දිවා රාත‍්‍රී ටෙස්ට් තරගය වන අතර එම තරග දෙකම ශ්රී ලංකාව ජය ලබා තිබේ. ඕස්ටේ‍්‍රලියාවද සහභාගි වී ඇති දිවා රාත‍්‍රී ටෙස්ට් තරග හතරම ජය ලබා තිබේ.
දිනේෂ් චන්දිමාල් තරගය ආරම්භ වීමට පෙර පවසා ඇත්තේ ඕස්ටේ‍්‍රලියාවේදී ටෙස්ට් තරගයක් ජය ලැබීමේ සිහින සිතේ තබාගෙන මෙම තරගයට පිවිසෙන බවයි. චන්දිමාල්ගේ සිහින සැබෑවීමට නම් ඕස්ටේ‍්‍රලියානු පළමු ඉනිම ලකුණු 200 කට පමණ සීමාකරගත යුතුය. ඕස්ටේ‍්‍රලියානු පිල පළමු ඉනිමේදී ලකුණු 250 ක පමණ වාසියක් ලබාගතහොත් මෙම තරගය සිවුදින තරගයක් බවට පත්වීම වැළැක්විය නොහැක.
ශ්රී ලංකාව මේ දක්වා ඕස්ට්‍රේලියාවේදී ටෙස්ට් තරග 13 කට සහභාගි වී ඇති අතර ඉන් තරග 11ක් පරාජයට පත්ව ඇති අතර තරග දෙකක් විසඳුමකින් තොරව අවසන් වී තිබේ. මෙහිදී නායක ටිම් පේන්ගේ සහායට උප නායකයන් දෙදෙනකු නම් කිරීමට ඕස්ටේ‍්‍රලියානු ක‍්‍රිකට් තේරීම් කමිටුව පියවර ගෙන තිබුණි. මෙම ටෙස්ට් තරග දෙකේදී පැට් කමින්ස් සහ ටේරවිස් හෙඩ් උප නායකයන් ලෙස කටයුතු කරති.
I සටහන: යොහාන් භාසුර