ඉදිරි තරග දෙකක් දිනන්නම ඕනෑ
ප‍්‍රසාද ලකුණු සටහනේ ඉහළ ඉන්න කණ්ඩායම්වලට එරෙහිව ඉදිරියේ ක‍්‍රීඩා කරන්න තියෙන්නෙ. අපි ඒ අභියෝගයට සූදානම් වෙන්න ඕනේ. ඉදිරි තරග පහෙන් දෙකක්වත් ජයග‍්‍රහණය කරලා පළමු හතරෙ රැඳී සිටීම තමයි බලාපොරොත්තුව
අවසන් පූර්ව තරගයට පැමිණීමට නම් අපි අනිවාර්යෙන්ම තරග ජය ලැබිය යුතුයි. අපිට දැනට ප‍්‍රසාද ලකුණු හතරක් තියෙනවා. ප‍්‍රසාද ලකුණු සටහනේ ඉදිරියේ රැඳෙන්න නම් අනිවාර්යෙන්ම ඉදිරි තරග දෙකක්වත් ජය ගන්න ඕනේ” යැයි ශ්රී ලංකා පිලේ නායක දිමුත් කරුණාරත්න බ්‍රිස්ටල්හිදී දෙවැනි තරගයත් වර්ෂාවට දියවී යෑමෙන් පසුව පැවසීය.
දොළොස්වැනි ලෝක කුසලාන එක්දින ක‍්‍රිකට් තරගාවලියේ ශ්රී ලංකා පිල සහභාගි වන පස්වැනි තරගය ප‍්‍රබල ඕස්ට්‍රේලියානු පිලට එරෙහිව ලන්ඩන් ඕවල් ක‍්‍රීඩාංගණයේදී ඊයේ (15) පැවැත්වීමට නියමිතව තිබුණි. ඇෆ්ගනිස්තානයට එරෙහිව පසුගිය 4 වැනිදා පැවැති තරගයෙන් පසුව ශ්රී ලංකා පිල දින 11ක් පුහුණුවීම්වලට පමණක් සීමාවී සිටීම දැඩි පාඩුවකි.
දිමුත් කරුණාරත්න පවසන පරිදිම ශ්රී ලංකාවට අවසන් පූර්ව වටයට පැමිණීමට නම් ප‍්‍රබල කණ්ඩායම්වලට එරෙහිව ජයග‍්‍රහණ ලැබීම අනිවාර්ය වී තිබේ. ඒ අනුව මෙම ඕස්ට්‍රේලියානු තරගය එයට ආරම්භයක් ගැනීමට හොඳ අවස්ථාවකි. ඕස්ට්‍රේලියාවට එරෙහිව ජය ලැබීමට නම් හොඳ සැලැස්මකට අනුව ක‍්‍රීඩා කළ යුතුය. ඕස්ට්‍රේලියානු පිල පන්දුවට පහරදීම සහ පන්දු යැවීම යන අංශ දෙකෙන්ම ප‍්‍රබල කණ්ඩායමකි. ඒ හේතුවෙන් ශ්රී ලංකාව සැළසුම් සහගතව ක‍්‍රීඩා කිරීම අනිවාර්ය වී තිබේ.
ශ්රී ලංකාව වේගපන්දු යවන්නන් පස්දෙනකුගෙන් ක‍්‍රීඩා කළහොත් එය සාර්ථක වීමට ඇති ඉඩකඩ සීමිතය. ඕස්ට්‍රේලියානු පිතිකරුවන් තරමක දුර්වලතාවක් ප‍්‍රදර්ශනය කරන දඟපන්දු යවන්නන් යොදා ගැනීමට වඩාත් ගුණදායක වේ යැයි සිතිය හැකිය.
පාකිස්තානයට එරෙහිව තරගයේ සිට වේගපන්දු යවන්නකු වෙනුවට ජීවන් මෙන්ඩිස් කැඳවීමට සූදානමින් සිටිය ද තරග දෙකම අතහැර දැමීමට සිදුවීමෙන් අවස්ථාව මඟ හැරුණි. ජීවන්ට එම තරග දෙකේදී පන්දු යැවීමේ අවස්ථාව ලැබුණේ නම් එය ඉදිරි තරගවලට හොඳ ආයෝජනයක් වනවාට සැක නැත.
ලසිත් මාලිංග සිය නැන්දණියගේ අවමංගල්‍යයට සහභාගි වීම සඳහා පසුගිය අඟහරුවාදා රාත‍්‍රී නැවත ශ්රී ලංකාවට පැමිණි අතර ඔහු ඕස්ට්‍රේලියාවට එරෙහිව තරගයට සහභාගි වීම අවිනිශ්චිත තත්ත්වයක පැවතුණි. මාලිංග එම තරගයට සහභාගි නොවුණහොත් එයද දැඩි පාඩුවකි.
ශ්රී ලංකාව මෙතෙක් ජය ලැබූ එකම තරගය වන ඇෆ්ගනිස්තානයට එරෙහිව දක්‍ෂ පන්දු යැවීමක නිරත වූ නුවන් ප‍්‍රදීප්, බංග්ලාදේශ තරගයට පෙර පුහුණුවීම්වලදී තුවාල ලැබීම හේතුවෙන් ඕස්ට්‍රේලියාවට එරෙහිව තරගයට සහභාගි වීමට නොහැක. ඒ හේතුවෙන් සුරංග ලක්මාල්ට තවදුරටත් කණ්ඩායමේ රැඳී සිටීමේ අවස්ථාව උදාවේ. බ්‍රිස්ටල්හිදී පසුගිය අඟහරුවාදා බංග්ලාදේශයට එරෙහිව සහභාගි වීමට නියමිතව තිබූ සිවුවැනි තරගය වර්ෂාව හේතුවෙන් අතහැර දැමීම සිදුවීම ශ්රී ලංකාවට දැඩි පාඩුවක් බව බොහෝ දෙනාගේ පිළිගැනීමයි.
ශ්රී ලංකා පිලට එම තරගය ජය ලැබීමේ හැකියාව තිබූ බවට බොහෝ දෙනා විශ්වාස කළහ. ශ්රී ලංකා පිල එම තරගයෙන් ජය ලැබුවේ නම් ප‍්‍රසාද ලකුණු සංඛ්‍යාව 5 ක් බවට පත්ව ප‍්‍රසාද ලකුණු සටහනේ දෙවැනි ස්ථානයට පැමිණීමේ අවස්ථාව තිබුණි. ඕස්ට්‍රේලියාව සහ පාකිස්තානය අතර පසුගිය බදාදා පැවැති තරගයට පෙර ශ්රී ලංකා පිල ප‍්‍රසාද ලකුණු 4 ක් ලබා ප‍්‍රසාද ලකුණු සටහනේ පස්වැනි ස්ථානයේ පසුවිය. තරග දෙකක් වර්ෂාවට හසුව ප‍්‍රසාද ලකුණ බැගින් දෙකක් ලැබුණු එකම කණ්ඩායම බවට ශ්රී ලංකාව ඒ වනවිට පත්ව සිටියේය.
පාකිස්තානයට එරෙහිව පසුගිය සතියේ පැවැති තරගය වර්ෂාව හේතුවෙන් අතහැර දැමීමෙන් දෙපිලට ප‍්‍රසාද ලකුණ බැගින් හිමිවූ අතර ඒත් සමඟම ශ්රී ලංකාව ප‍්‍රසාද ලකුණු සටහනේ තෙවැනි ස්ථානයට පත්විය. එම තරගයෙන් ලැබූ ප‍්‍රසාද ලකුණ වැස්ස වලාහක දෙවියන්ගෙන් ලැබුණු ආශීර්වාදයක් යැයි සිතා එය ඉදිරියට ගෙන යෑමට දිමුත් කරුණාරත්න ප‍්‍රමුඛ ශ්රී ලංකා පිල වගබලාගත යුතුව තිබේ.
ශ්රී ලංකා පිල ඕස්ට්‍රේලියාව පරාජය කළහොත් ඉදිරි තරග හතරට වඩාත් ඉහළ මානසික තත්ත්වයකින් ක‍්‍රීඩා කිරීමේ දොරටු විවෘත වේ. එය එසේ වුවහොත් ශ්රී ලංකා පිතිකරැවන්ට ඉතිරි තරග හතරේදී නිදහසේ පන්දුවට පහරදීමේ අවස්ථාව උදාවේ. අර්ජුණ රණතුංගගේ නායකත්වයෙන් 1996 වසරේ ඕස්ට්‍රේලියාව පරාජය කරමින් ලෝක ශූරයන් වූ ශ්රී ලංකාවේ බාල ක‍්‍රිකට් පරම්පරාවට ලෝක කුසලාන තරගාවලියක පළමු වටයේදී ඕස්ටේ‍්‍රලියාව පරාජය කිරීම හැකියාව තිබිය යුතුය.
I යොහාන් භාසුර, ලන්ඩන් නුවර සිට