මෙවරත් කඳුළින් නිමා වූ ලෝක කුසලාන දැල්පන්දු සිහිනය
එංගලන්තයේ ලිවර්පූර්හිදී පසුගිය ඉරිදා අවසන් වූ ලෝක කුසලාන දැල්පන්දු ශූරතාවලියේදී ශ්‍රී ලංකා පිල 15 වැනිදා ස්ථානයට පත්වීමෙන් එම කණ්ඩායම වෙනුවෙන් ක‍්‍රීඩා අමාත්‍යංශය වැයකළ රුපියල් ලක්‍ෂ 250 කට අධික මුදල ගඟට කැපූ ඉනි මෙන් පාවී ගියේය. තරගාවලියක පරාජයෙන් පසුව පහසුකම් නොලැබුණේ යැයි පුරුද්දට මෙන් නහයෙන් අඬන දැල්පන්දු පරිපාලනයට සහ ක‍්‍රීඩිකාවන්ට එවැනි දොස් නැඟීමකට ඉඩක් නැති බව ක‍්‍රීඩා අමාත්‍ය හරීන් ප‍්‍රනාන්දු මහතා පසුගියදා කොළඹදී පැවති ජනාධිපති ක‍්‍රීඩා සම්මාන උළෙල අමතමින් පවසා තිබුණි.
ක‍්‍රීඩා අමාත්‍යංශයේ උසස් නිලධාරියකු ‘දේශය’ට පැවසුවේ මෙම තරගාවලිය වෙනුවෙන් තම අමාත්‍යංශය රුපියල් ලක්‍ෂ 250 කට අධික මුදලක් වැයකර ඇති බවයි. මෙවර ලෝක කුසලාන දැල්පන්දු ශූරතාවලියට සහභාගි වූ රටවල් 16 න් ශ්‍රී ලංකාව 15 වැනි තැනට පත්විය. එහිදී ශ්‍රී ලංකාවට පරාජය කළ හැකි වූයේ ආසියානු කලාපය නියෝජනය කරමින් සහභාගි වූ සිංගප්පූරුව පමණි.
ශ්‍රී ලංකා පිල දෙවරක් සිංගප්පූරැව පරාජය කළේ යැයි වහසි බස් දොඩවන්නේනම් එය හාස්‍යය දනවන තත්ත්වයකි. ශ්‍රී ලංකා පිල මෙම තරගාවලියේදී සිංගප්පූරැව පරාජය කිරීම අරුමයක් නොවේ. ආසියානු දැල්පන්දු ශූරීයන් වන ශ්‍රී ලංකාව එම තරගාවලියේදී සිංගප්පූරුව පරාජය කරමින් ලෝක කුසලාන වරම් හිමිකර ගත්තේය.
මෙම තරගාවලියට පිටත්ව යනවිට ශ්‍රී ලංකා පිල 10 වැනි ස්ථානයට පැමිණීමේ ඉලක්කයක් තබාගෙන ගිය බවත් තරග කීපයක් පරාජය වනවිට එය 13 වැනිදා ස්ථානය දක්වා පහතට වැටුණු බවත් දැනගන්නට තිබේ. ලෝක කුසලාන තරගාවලියට සහභාගි වූ චතුරංගනී ජයසූරියගේ නායකත්වයෙන් යුත් ශ්‍රී ලංකා කණ්ඩායම තිලකා ජිනදාස මහත්මිය යටතේ වසරක වැඩි කාලයක සිට බොහෝ පහසුකම් ඇතිව පුහුණුවීම් ලැබීය.
මෙම කණ්ඩායමට ලෝක කුසලාන තරගාවලිය ඉලක්ක කරමින් තරග අත්දැකීම් අවශ්‍ය බවට පුහුණුකාරිණිය පවසන්නට වීමෙන් පසුගිය අප්‍රේල් මස ශ්‍රී ලංකාවේදී කෙන්යාව සහ මැලේසියාව සහභාගි වූ තුන්කොන් දැල්පන්දු තරගාවලියක්ද පැවැත්වීය. ඉන් නොනැවතුණු ක‍්‍රීඩා බලධාරීන් ශ්‍රී ලංකා සංචිතයට බොට්ස්වානාහිදී ටෙස්ට් තරගාවලියකට ද සහභාගි වීමේ අවස්ථාව ලබාදුන්නේය.
එංගලන්තයේ සීත කාලගුණ තත්ත්වයට හුරුවීමට තරගාවලිය ආරම්භ වීමට සති දෙකකටවත් පෙර එංගලන්තයට යෑමට අවශ්‍ය බව කණ්ඩායම කළ ඉල්ලීම අනුව දින 10 කට පමණ පෙර ශ්‍රී ලංකා පිල ලන්ඩන් නුවරට පැමිණ පුහුණුවීම් ආරම්භ කළේය. මෙම කණ්ඩායම ආසියානු දැල්පන්දු ශූරීන් වීම වෙනුවෙන් නිවාස අමාශ්‍යංශයෙන් සියලු ක‍්‍රීඩිකාවන්ට මොරටුව ප‍්‍රදේශයේ තට්ටු නිවාස සංකීර්ණයකින් නිවස බැගින්ද ප‍්‍රදානය කෙරිණි.
දීප්ති අල්විස් මහත්මියගෙන් ශ්‍රී ලංකා පිලේ පුහුණුකාර ධූරය තිලකා ජිනදාස මහත්මියට මාරුවීමෙන් පසුව පැහැදිලි දියුණුවක් දැකිය හැකියැයි විශ්වාස කළ ද එවැනි වෙනසක් දැකිය නොහැක. ඕස්ට්‍රේලියාවේ සිඞ්නි නුවරදී 2015 වසරේ පැවැති ලෝක කුසලාන තරගාවලියේදී ශ්‍රී ලංකාව දීප්ති අල්විස් මහත්මියගේ පුහුණුකාරිත්වය යටතේ 16 වැනි ස්ථානයට පත්විය. එහිදී දීප්ති අල්විස් සිය දියණියට නායකත්වය ලබාදෙමින් ලෝක වාර්තාවක් පිහිටුවීමට උත්සහ කළා මිස අන්කිසිවක් නොවුණ බව බොහෝ දෙනෙක් පැවසූහ. මෙවර එය එක ස්ථානයක් පමණක් ඉදිරියට යමින් 15 වැනි ස්ථානයට පත්වීම දියුණුවක් යැයි පැවසිය නොහැක.
තර්ජනී ශිවලිංගම් නොවන්නට මෙවරද ශ්‍රී ලංකාවට 16 වැනි ස්ථානය වෙන්වනවාට සැක නැත. එහිදී තර්ජිනී ලකුණු 348 ක් සම්පූර්ණ කරමින් තරගාවලියේ දක්‍ෂතම පන්දු විදින්නිය බවට පත්වූවාය. මෙම තත්ත්වය යටතේ ශ්‍රී ලංකාවේ දැල්පන්දු ක‍්‍රීඩාව අගාධයෙන් ගොඩගැනීමට පෙරළියක් කළ යුතුය. එය කරන්නේ කව්ද කෙසේද යන ගැටලුව මේ වනවිට මතුවී තිබේ.
♦ යොහාන් භාසුර
