පිතිකරුවන්ට මොකද වුණේ?
ශ්රී ලංකා ටෙස්ට් ක‍්‍රිකට් පිල පසුගිය සඳුදා එංගලන්ත පිල හමුවේ තරග තුනකින් සමන්විත ටෙස්ට් තරගාවලිය 3x0 ක පරාජයක් ලැබීය. මෙය ශ්රී ලංකා ක‍්‍රිකට් ඉතිහාසයේ 3x0 ක ටෙස්ට් තරගාවලි පරාජයක් ලැබූ තෙවැනි අවස්ථාව වේ. ශ්රී ලංකාව මෙම වසරේ ලැබූ පළමු ටෙස්ට් තරගාවලිය පරාජය මෙය වීම කැපී පෙනේ. එය පරාජයක් කියනවාට වඩා මාර පරාජයක් කිවහොත් නිවැරදිය.
ශ්රී ලංකාව පසුගිය වසර තුනක පමණ කාලය තුළ එක්දින සහ විස්සයි20 තරගවලදී පසුබෑමට ලක්ව සිටියද ටෙස්ට් තරගවලදී යම් තරමකට හිස ඔසවා සිටියේය. ශ්රී ලංකාව මෙම වසරේ පෙබරවාරි මස බංග්ලාදේශයේදී ටෙස්ට් තරගාවලිය 1x0 කින් ජය ලැබීය. ඉන්පසුව බටහිර ඉන්දීය කොදෙව්හිදී ජූනි මස පැවැති තරගාවලිය 1x1 ක් ලෙස සමව අවසන් කළේය. දකුණු අප‍්‍රිකානු පිලට එරෙහිව ශ්රී ලංකාවේදී පැවැති තරගාවලියේ තරග දෙකම ජය ලැබීමට ශ්රී ලංකා පිල සමත් විය.
මෙම පරාජයේ වගකීම බාරගන්නේ නම් ශ්රී ලංකා පිලේ පිතිකරුවන් එහි වැඩි කොටසක් බාරගත යුතුය. සමස්තයක් වශයෙන් ගත්කළ පිතිකරුවන්ගේ දුර්වලතා මෙම පරාජයන් තුනට එක සේ හේතුවිය. මෙහිදී ශ්රී ලංකා පිලේ පිතිකරුවන් එංගලන්ත දඟපන්දු යවන්නන් හමුවේ තමන්ට හුරුපුරුදු තණතීරුවල අසාර්ථක වීම කැපී පෙනුණි. එංගලන්තය දඟපන්දු යවන්නන් යොදා ගනිමින් ‘පූර්ණ සුද්දය’ ලබාදුන්නේය.
තරග තුනේදී බිඳ වැටුණු ශ්රී ලංකා පිලේ කඩුලු 60න් එංගලන්ත දඟපන්දු යවන්නන් වන ජැක් ලීච් (18), මුයින් අලී (18) සහ අදීල් රෂීඩ් (12) කඩුලු 48 ක් දවා ගැනීම විශේෂත්වයකි. එංගලන්ත දඟපන්දු යවන්නන්ගේ සාර්ථකත්වයෙන් පෙනී යන්නේ ශ්රී ලංකා ටෙස්ට් පිලේ පිතිකරණය ‘කබලෙන් ලිපට’ වැටී ඇති බවයි. ශ්රී ලංකාව දඟපන්දු යවන්නන්ට සාර්ථකව මුහුණ දෙන පිතිකරුවන් සිටින රටක් ලෙස ප‍්‍රසිද්ධියක් උසුලා සිටියද දැන් එම ගෞරවය මැකී යන තත්ත්වයකට පත්ව තිබේ. මෙම තරගාවලියේ ඉනිම හයකදී එකම ශ්රී ලංකා පිතිකරුවකුට හෝ ශතකයක් රැස්කිරීමට නොහැකි විය. ඒ අතරතුර එංගලන්ත පිතිකරුවන් සිවුදෙනෙක් ශතක රැස්කළහ.
ශ්රී ලංකා පිතිකරුවන් ටෙස්ට් තරගයක හිස පහත්කර දිගු ඉනිමක් ගොඩනැගීමට තරම් පුහුණුවක් ලබා නොමැතිද යන සැකය මතුවේ. ප‍්‍රධාන පුහුණුකරු චන්දික හතුරුසිංහ මහතා යටතේ පිතිකරු පුහුණුකරු ලෙස ශ්රී ලංකාවෙන් බිහිවූ පිතිකරු තාක්‍ෂණයෙන් හෙබි පිතිකරුවකු ලෙස සැලකෙන තිලාන් සමරවීර මහතා කටයුතු කරයි. මෙම පිතිකරුවන්ට ඔවුන්ගෙන් ලැබෙන උපදෙස් මොනවාද යන්න පිළිබඳව ශ්රී ලංකා ක‍්‍රිකට් ආයතනය සොයා බැලිය යුතුය.
පල්ලෙකැලේ ටෙස්ට් තරගය ලකුණු 57 කින් ද, එස්.එස්.සී. ටෙස්ට් තරගය ලකුණු 42 කින් ද, පරාජය වීමෙන් ඉලක්කය ආසන්නයට පැමිණ අතහරින තත්ත්වයක් ප‍්‍රදර්ශනය කරයි. මෙම තරගාවලියේදී දිමුත් කරුණාරත්න අර්ධ ශතක තුනක් සමගින් ලකුණු 256 ක් රැස්කරමින් ශ්රී ලංකාවේ වැඩි ලකුණුලාභියා බවට පත්ව සිටියි. ඇන්ජලෝ මැතිව්ස් අර්ධ ශතක තුනක් සමගින් ලකුණු 233 ක් රැස් කළේය.
මෙම තරගාවලියේදී වඩාත් කථාබහට ලක්වූ ශ්රී ලංකා පිතිකරු කුසල් මෙන්ඩිස් අවසන් ඉනිමේදී ලකුණු 86 ක් ලබා දුවද්දී දැවී ගියේය. ඔහු තවදුරටත් කඩුල්ලේ රැඳී සිටියේ නම් තරගයේ ප‍්‍රතිඵලයද වෙනස්වීමට ඉඩ තිබුණි. කුසල් මෙන්ඩිස් ඉනිම 11 කට පසුව රැස්කළ මෙම අර්ධ ශතකය ඔහුට ඉදිරි සංචාර කීපයකට උපකාරී වීමට ඉඩ නැතුවා නොවේ.
ශ්රී ලංකා ක‍්‍රිකට් කළමනාකාරිත්වය එංගලන්ත පිතිකරුවන් අමාරුවේ දැමීමට දඟ කැවෙන තණතීරු ලබාදුන්නද ඉන් මට්ටු වූයේ ශ්රී ලංකාවමය. එංගලන්ත දඟපන්දු යවන්නෝ කඩුලු දවාගනිමින් වාසිය අත්කරගත්හ. පිට දඟපන්දු යවන ඩිල්රුවන් පෙරේරා තරග තුනේදී කඩුලු 22ක් දවාගත්තද ශ්රී ලංකා පිතිකරුවන්ගෙන් එයට වටිනාමක් නොලැබුණි.
ශ්රී ලංකා පිල මෙම පරාජයේ උණුසුම තිබියදීම ලබන මස මුලදී නවසීලන්තයේදී ටෙස්ට් තරග දෙකකට සහභාගි වීම සඳහා පිටත්ව යෑමට නියමිතය. එහිදී මෙයට වඩා හාත්පසින්ම වෙනස් අභියෝගයක් යොමුවනු ඇත.
සටහන: යොහාන් භාසුර