තෙල් බෙදීම නවතමු මේ ඇඳිරිනීති කාලයයි
සති 08කට පමණ ආසන්න කාලයක් වසා දැමුණු තත්ත්වයෙන් තිබූ රට පසුගිය 11 වැනිදා සිට යළි සක්‍රීය වීම ඇරැඹුණි. ඇඳිරි නීතිය දිගින් දිගටම පැනවීම හේතුවෙන් රට එසේ අකර්මණ්‍යව පැවති අතර ඇඳිරි නීතිය පවතින විටම රට සාමාන්‍ය තත්ත්වයට රැගෙන ඒමේ රජයේ වැඩපිළිවෙළ හේතුවෙන් පසුගිය 11 වැනිදා සිට රටම වෙනස් විය. විශේෂයෙන් මාස දෙකකට ආසන්න කාලයක් පාළුවට ගොස් තිබූ කොළඹ සහ අවට යළි ජනාකීර්ණ විය. මංමාවත් යානවාහන වලින් පිරී ගියේය. තරමක මාර්ග තදබදයකට මුහුණදීමටද ජනතාවට සිදුවී තිබිණි.
කුමන අඩුපාඩුකම් මැද වුවද ඇරඹුණු රට යළි සක්‍රීය කිරීමේ රජයේ වැඩපිළිවෙළට මහජනතාවගේද සහාය නොඅඩුව ලැබුණ බව පසුගිය දින කිහිපය තුළදීම පැහැදිලි විය. එහෙත් මහජනතාවගේ සහාය පමණ ඉක්මවා ගිය බවක්ද ඇතැම් ස්ථානවලදී දැකගත හැකි විය. කාර්යාලවලට, වැඩබිම්වලට පැමිණීමට සහ අත්‍යාවශ්‍යම කටයුතු සඳහා පමණක් නිවෙස්වලින් බැහැරව යන ලෙසට සිදුකෙරුණු දැනුම් දීම බොහෝ දෙනකුට දිනක් දෙකක් ගතවන විටම අමතකව ගිය බවක්ද පෙනෙන්නට තිබිණි. එහිදී රජය මගින් අදාළ වැඩපිළිවෙළ සම්බන්ධයෙන් නිකුත් කරන ලද ඇතැම් නිවේදනවල පැවැති අපැහැදිලි තත්ත්වයද ඊට බලපා තිබූ බවද දැකගත හැකි විය. ඇඳිරි නීතිය පවතිද්දී යා යුතු නොයා යුතු ගමන් බිමන් පිළිබඳ සහ විවෘත කළ යුතු සහ විවෘත නොකළ යුතු වෙළෙඳ ව්‍යාපාර කුමන වර්ගයේ ඒවාද යන්නද එතරම් පැහැදිලිව ප්‍රකාශ වී නොතිබිණි. එවැනි වැරදි වහාම නිවැරදි කර ගැනීම බලධාරීන්ගේ වගකීමක් බවද පෙන්වා දිය යුතුය.
පොලිස් නීති කොට්ඨාසය භාර නියෝජ්‍ය පොලිස්පති නීතිඥ අජිත් රෝහණ මහතා පසුගියදා මාධ්‍යවලට ප්‍රකාශ කර තිබුණේ ඇඳිරි නීතිය ක්‍රියාත්මක වන ප්‍රදේශවල ජනතාවගේ හැසිරීම සතුටුදායක නැති බවය. ඇඳිරි නීතිය ක්‍රියාත්මක වන ප්‍රදේශවල කටයුතු කරන ආකාරය ගැන තමන් ජනතාව දැනුම්වත් කළ නමුත් තමන් සිතූතරම් ජනතාවගේ හැසිරීම සතුටුදායක නොවූ බවත් ඇතැම් ස්ථානවලදී ජනතාව නිරෝධායන නීතියට ගරුකරන ආකාරයක් දක්නට නොලැබුණු බවත් අජිත් රෝහණ මහතා ප්‍රකාශ කර තිබිණි. ඇතැමුන් දුරස්ථභාවය පිළිබඳ සිදුකර තිබූ දැනුම්වත් කිරීම්වලට පවා සැලකිල්ලක් දැක්වීම අමතක කර තිබීමද කනගාටුවට හේතුවකි.
කෙසේ වුවද සෑහෙන කාලයක් ගෙදරටම කොටු වී මානසික බන්ධනයකට යටත්ව සිටි ලක්ෂ සංඛ්‍යාත පිරිසකට එකවර දොරගුළු විවෘත වීමේදී මේ ආකාරයේ අතපසුවීම් බලාපොරොත්තු විය යුතුය. එහෙත් අවශ්‍යදේටත් අනවශ්‍ය දේටත් මගට බැසීමට මෙය අවස්ථාවක් කර ගැනීමේ ප්‍රතිඵලය ඉතාම භයානක විය හැකි බව මේ සියලුදෙනාම විසින් දැන සිටීම අවශ්‍යය. රට සැමදා වසා තබාගෙන කොරෝනාව මර්දනය කිරීමට යාම තේරුමක් නැත. අවසානයක් දැකිය නොහැකි එවැනි තත්ත්වයක් හැකි ඉක්මණින් අවසන් කිරීම රජයට ලොකු අභියෝගයක් විය. එහෙත් සෞඛ්‍ය ක්ෂේත්‍රයේ සහ ත්‍රිවිධ හමුදාවේත් පොලීසියෙත් බුද්ධි සේවා අංශවලත් කැපවීම සහ කාර්යක්ෂම වැඩපිළිවෙළ හරහා රට යම් පමණකට විවෘත කරමින් ඉදිරි පියවර තැබීමට හැකියාවක් ලැබීම මේ අවස්ථාවේ හැටියට ලොකු ජයග්‍රහණයකි.
එලෙස අමාරුවෙන් ලබාගත් නිදහස වල්බූරු නිදහසක් බවට මහජනතාව විසින් පත්කර ගතහොත් යළිත් අමාරුවේ වැටෙන්නේ මුළු රටම බව කුමන මොහොතකවත් අමතක කළ යුතු නැත. අනවශ්‍ය දේවලට පවා පාරට බැස හමුවෙන සියලුදෙනාට “තෙල් බෙදන” ජනතාව මේ බව හොඳින්ම වටහා ගතයුතුය. යළිත් කොරෝනා රුල්ලක් ඇතිවුවහොත් තව කොපමණ කාලයක් ගෙවල්වලටම කොටු වී සිටීමට සිදුවනු ඇතිදැයි කාටවත් අනාවැකි පළකළ නොහැකිය.
රට යම් පමණකට විවෘත වුවද ලබන ඉරිදාද රටපුරාම ඇඳිරි නිතිය ක්‍රියාත්මකව පවතිනු ඇතැයි රජය මගින් නිවේදනය කර තිබේ. සෙසු දිස්ත්‍රික්කවල රාත්‍රී 8.00 සිට අලුයම 5.00 දක්වා දිනපතාම ඇදිරි නීතිය තවමත් ක්‍රියාත්මකය. කොළඹ සහ ගම්පහ දිස්ත්‍රික්කවල දිගටම ඇඳිරි නීතිය බලපැවැත්වෙයි. එහෙත් කොළඹ සහ ගම්පහ මහාමාර්ගවලට බසින කිසිම කෙනකුට මේ තමන් සිටින්නේ ඇඳිරි නීතිය ක්‍රියාත්මකව පවතින අවස්ථාවක බවට මොහොතකටවත් සිතෙන්නේ නැත. පාරේ වාහන එපමණට තිබේ. වසා ඇති වෙළෙඳ ව්‍යාපාරික ස්ථාන ඇත්තේ ඉතා සුළු ප්‍රමාණයකි. පදික වේදිකා වෙළෙඳාම් පවා ඇරැඹී තිබේ. අත්‍යවශ්‍ය සේවා සපයන වෙළෙඳසල්, ෆාමසි, සුපර් මාකට් පමණක් නොව අත්‍යවශ්‍ය ගණයට නොවැටෙන ෆෝන් ෂොප් පවා විවෘතය. ඒවාටද මහජනතාව එක්රොක් වී සිටිති. නමුත් මේ සියලු ආකාරයේ ලිහිල් බව විඳිය යුත්තේ සෞඛ්‍ය බලධාරීන් විසින් ලබා දී ඇති උපදෙස් අකුරටම පිළිපදිමින් බව අමතක නොකරන තරමට වැඩේ ගොඩ දා ගත හැකිය. එසේ නොවුණොත් යළිත් අතට පයට ඉබ්බා දමාගෙන සිටීමට සිදුවනු ඇත. රැවුලත් කැඳත් දෙකම බේරා ගැනීමේ වගකීම ඇත්තේ මහජනතාවගේම අතේ බව මතක් කරදීම අපේ යුතුකමය.