අපූරු බෙහෙතක්

ආණ්ඩුවෙ ඇමැති සයිස් පොරක් රටේ ලොකුම කන්තෝරුවක මහ තනතුරක් දරන මහත්තයකුට ළඟදි දවසක සැරට දෙහි කැපුවා...

එකපාරටම මොකක් හින්දා උන්නැහේ මෙහෙම කළාද කියලා කවුරැවත් දන්නෙ නැහැ...

ඒත් රටේ ඉහළම තනතුරක් දරන ලොකුම ලොකු මහත්තයකුගෙ සමීපතමයකුට මේ විදියෙ විවේචනයක් එල්ල කළාම නිලධාරි මහත්තුරැ කකුල පස්සට තියෙනවා... ඒත් මේ නිලධාරිතුමා තමන්ට මොකුත් සිද්ධ වුණේ නැති ගණනට දැනට උන්නැහේට භාරදීලා තියෙන කොරෝනා වැඩසටහනේ කටයුතු කරගෙන ගියා...

කොහොම නමුත් කලකට පෙර එක්තරා සේනාවකට අණ දුන්නු මේ නිලධාරිවරයා ගැන කරපු විවේචනේ දැනගත්ත රටේ ලොකුම තනතුරක් දරන කෙනෙක් ඒ ප්‍රකාශය ගැන මුකුත් පියවරක් ගන්නෙ නැතුව අමුතු වැඩක් කරන්න තීන්දුවක් ගත්තලු...

ඒ අනුව මේ විවේචනයට ලක්වූ මහත්තයට ළඟදීම රටේ බරසාර වගකීමක් භාර දෙන්නලු යන්නෙ... බලන් හිටියොත් දැනගන්න පුළුවන් ඒ මොකද්ද කියලා...