ලකුණේ අවුල
අලුත් දිශාවක් හොයාගෙන ආපු සීනු වගේ කටවල් තියෙන පාටි එක මේ පාර මැම්බර් සටනින් පහළටම වැටිලා. ගොඩක් අය අලුතින් පාර හොයාගෙන මේකට එකතු වුණාට දිනන්න හම්බවුණේ සීනු වගේ කටවල් තියෙන නායක සහෝදරයටයි මාධ්‍ය සහෝදරයටයි විතරයි. තව ලැයිස්තු චාන්ස් එකකුත් ඇවිල්ලා.
කොහොම වුණත් මේ අලුත් දිශාව හොයන්න හදලා තියෙන්නේ වැඩියෙන් සීනු කට්ටිය ඇතුළට ගන්න ඕන නිසා කියලයි ආරංචිය. ඒත් වැඩේ වුණේ නෑ. මේ ප්‍රශ්නය නිසා ඇතුළේ දැන් ටිකක් කචල්ලු. පරණම සීනු සහෝදරයෝ කියන්නේ මේක වුණේ ඒ සීනුව අත්ඇරිය නිසා කියලා. ඒ නිසා ඔය දිශාවල් පැත්තකින් තියලා සීනුවේ සද්දෙට යමු කියලලු එයාලගේ දෝස්මුරේ. ඒ අලුත් දිශාව හොයාගෙන ආපු අය නම් කියන්නේ හරි ගමන යන්නම දිශාව හොයාගන්න මාලිමාවක් ඕන කියලලු.
කොහොම වුණත් මේ හැප්පිල්ල දැන් ටිකක් දුරදිග ගිහින්ලු තියෙන්නේ. දැන් අර අලුතින් පාර හොයාගෙන ආපු අයත් කියනවලු එයාලට සීනුවේ සහෝදරයෝ ඡන්දය නොදෙන්න වැඩ කළා කියලා. ඒවා දැන් සමාජ මාධ්‍යවලත් යනවා. විශේෂයෙන් පහුගිය ඡන්ද කාලෙම උස්සලා තියන්න ගියේ සීනුවෙ අයව කියලා මේ අය තැන් තැන්වල කියන්න අරන්ලු. මේක දැන් නායක සහෝදරයා පැත්තට කටුව කැරකීගෙන එන නිසා මාලිමාව නැතිවෙයි කියලයි කියන්නේ.