එයා ගිහිල්ලලු
රටේ ඉහළම මන්දිරේක හිටපු සමන් මලක් වගේ හැඩකාර සුන්දර නෝන කෙනෙක් එකපාරටම අතුරුදන් වෙලා කියල තතු දත් අය කියනව... මේ තරුණ නෝන විවාහවෙලා හිටියෙ මේ පාර පළමුවරට දියවන්නා කවුන්සිලේට ආපු තරුණ මන්ත්‍රී සයිස් මහත්තයෙක් කියලත් ආරංචියි...
රටේ වැදගත්ම දේශපාලන ගුණය වර්ධනය කරන පවුලක තරුණයෙක් වන මෙයාල මෙතෙක් පදිංචිව හිටියෙ කොළඹ තියෙන මලක නමකින් හැඳින්වෙන සුප්‍රකට මන්දිරේකලු...
ඉතින් මේ තරුණ මන්ත්‍රී සයිස් මහත්තයාගේ පියා දැනටත් රටේ ලොකුම තනතුරක් දරන වැදගත් කෙනෙක් බව කියැවෙනව... කොහොම නමුත් දැඩි ආරක්ෂාවක් තියෙන සුපිරි මන්දිරේ හිටිය මේ තරුණ නෝන මහත්තය එකපාරටම අතුරුදන් වුණාට සමීපතම අය එයාට වුණේ මොකක්ද කියල සොයල බැලුව...
අන්තිමේදී දැනගන්න ලැබුණ සීතල කැනඩාවෙ සුන්දර තැනක එයා ඉන්නවය කියල... එතැන එයාගෙ තනි නොතනියට රටේ එක්තරා ආරක්ෂක අංශයක සේවය කළ තරුණ මහත්මයකුත් ඉන්න බවයි තතු දත් අය වැඩිදුරටත් කියන්නෙ...
ඉතින් පුදුමෙට කාරණය වෙලා තියෙන්නෙ මේ සිද්ධිය වෙලා දැන් සතියක් දෙකක් ගියත් කවුරුත් මුකුත්ම සිද්ධ නොවුණ ගානට තමුන්ගෙ වැඩක් බලාගෙන ඉන්න එකලු...