වතුර බොර කිරීම
දේශපාලනයේදි වතුර බොර කිරීම උපායශීලී දේශපාලන ලොක්කන්ගේ ක්‍රමයක්ලු. වතුර බොර කළාම මාළුන්ටත් පීනන්න පාර පේන්නෙ නැතිලු... ඒ වගේ වැඩක් අපේ දේශපාලන අංසෙත් වෙන්න යනවය කියලා ඉහළම තැන්වලින් රහස් කතාබහක් අහන්න ලැබුණා.
මේක ඉස්සරහට වෙන්න යනවය කියන දෙයක් කියලයි මේ කතාවට සම්බන්ධ වුණු ඉහළම පෙළේ පුද්ගලයන් තුන්දෙනෙක් කතා වුණේ. ඒ තුන්දෙනා ආණ්ඩුවෙ ඉහළම කන්තෝරුවක සේවය කරන බලවත්ම උදවිය.
එයාල කියන විදියට වෙන්න යන්නෙ මේකයිලු...
මුලින්ම අපේ ඡන්ද කාලසටහන අනුව එන්න තියෙන්නෙ රටේ ජනපති ඡන්දෙ... ඒ සඳහා දින නියමවෙලා නාමයෝජනා ගත්තම සම්පූර්ණ ඡන්ද සටන ඒ පැත්තට තල්ලු වෙනවා...
ඒ කාරණාවෙදි ආණ්ඩුවෙ බලවත්ම පක්ෂය ආණ්ඩුවෙන් ඡන්දෙට එනවය කියන ලොකුම අපේක්ෂකයට සහාය නොදී ව්‍යාපාරික භවතකුට තමන්ගෙ සහාය දෙන්නලු යන්නෙ...
මෙන්න මේ හින්දලු එකපාරට දේශපාලන ජලාශය බොර කරලා.. ලොකු ජරමරයකට පාර කපන්න සැලසුම් කළේ. ඒ අනුව ජනපති සටනට නාමයෝජනා ගත්ත සැණින් දියවන්නා කවුන්සිලේ විසුරුවන්න තිරය පිටුපස සැලසුමක් තිබෙන බවටයි අර තුන්දෙනාගෙ සය කන් මන්ත්‍රණේදි හෙළිදරව් වුණේ...
ඒ අනුව මේ අවුරුද්දෙ ඡන්ද දෙකක් ෂුවර්ලු.