එයා වගේද මම

ගම්පහ පොහොට්ටුව ඇතුළේ දිය රෙද්දෙන් බෙල්ල කපන වැඩක් දැන් යනවලු. මේක පොහොට්ටුවේ ලොකු ලොක්කොත් දන්නේ නැතුව අන්දලා ගහන ගේමක්ලු. ගම්පහ දිස්ත්‍රික් නායකයා වෙන්නේ පරම්පරාවෙන් දේශපාලනය කරපු මහ කෙනෙක්. ඉතින් මෙයා මේ දවස්වල ඉන්නේ ජනාධිපති අපේක්ෂක තෝරන ගේම් එකේ. එයා වැඩියෙන්ම කැමැති දැන් ඉන්න ලොකු තැනටලු.

කොහොම වුණත් මෙයාගේ කතාව රාජපක්ෂ විරෝධයක් හැටියට හදලා එක එක ගතු කියන කෙනෙක් දැන් අතටම අහුවෙලාලු. පස්වලට ගොඩක් ආදරේ කරන මෙයා ටිකක් චණ්ඩි පහේ පොරක්. මෙයා මේ ළඟදි පොහොට්ටුවේ බලය පෙන්නන වැඩක් ආසනේ ලෑස්ති කරලා. ඒකට පොහොට්ටුවේ ලොකු තැනගේ ලොකු පුතත් ඇවිල්ලා. ආසනයේ සෙනඟ දැකලා පුදුම වුණාලු. ඒ ඇත්තටම එයා කරලා තියෙන්නේ දිස්ත්‍රික්කයේම සෙනඟ අද්දලා. මොකද මෑන්ට ගමේ අය වැඩිය කැමැති නැති නිසා. ඒත් මේක ආපු කෙනා දන්නේ නෑලු. මේ නිසාම කිසිම මන්ත්‍රී කෙනෙක්ට ආරාධනා කළෙත් නෑලු. කොහොම වුණත් වැඩේ ඉවරවෙලා යද්දි මෙයා ආපු කෙනාට පෙන්නුවලු ඊළඟ දිස්ත්‍රික් නායකයට සුදුසු එයා කියලා. ඒ විතරක් නෙමේ දැනට ඉන්න කෙනා ගැනත් නොයෙක් දේ කිව්වලු. පුදුමේ කියන්නේ කිව්ව ඔක්කොම ඒ සැණින් දිස්ත්‍රික් ලොක්කගේ කනට ගිහින්ලු තියෙන්නේ.