යන්න අවසරද
පුංචි දාස උන්නැහේට අනුග්‍රහය පිණිස එයාගෙ හිතවතුන් පිරිසක් විසින් පසුගියදාක කොළඹ නිවසක සාදයක් පැවැත්තුවා... ඒක තිබුණෙ සේනාවක සිංහයෙක් වගේ ඉන්න රාජ්‍ය ඇමැති සයිස් මහත්තයෙක්ගෙ නෑදෑ ගෙදරකලු.
පුංචි දාස හිතවාදීන් සියල්ලන්ටම වගේ මේකට ආරාධනා කරලා තිබුණා.... එයින් සමහරු සටනෙ හිටියට මේවට ගිහිල්ලා ඕන නැති ලෙඩ වැටෙයි කියලා හිතාගෙන හොරෙන් හොරෙන් ගිහිල්ල අලි පාටියෙ ලොකු තැන මුණගැහිල උන්නැහේගෙන් අවසර අරගෙන තමයි සාදයට ගියේ....
මෙහෙම ලොකු මහත්තයගෙන් අවසර ගන්න සාදය දා හැන්දෑවෙ කොළඹ මැද ඉඳගෙන දේශපාලනේ කරන කටකාර මන්ත්‍රී සයිස් පොරක් ගියා.... ගිහිල්ල ලොකු තැන ඉදිරියේ එකත්පස්ව සිටිමින් මෙහෙම කිව්වා...
සර් අද හැන්දෑවෙ අහවලාලා පොඩි සාදයක් සූදානම් කරල තියෙනවා... ඒකට මටත් ආරාධනා තියෙන නිසා මමත් යන්නද කියල අහන්නයි ආවෙ... ඒ කතාව අහපු අලි පාටියෙ ලොකු මහත්තයා අවවාදාත්මක ස්වරයෙන් මෙහෙම කිව්වා....
එන්න කිව්ව නම් යනවා යනවා... ගිහිල්ලා කාලා බීලා එනවා... හැබැයි එතෙන්දි ඔය එක එක්කෙනා දෙන කොළවලට එහෙම අත්සන් කරන්නෙ නැහැ... ඔය තමුන්ලා එක්ක ඉන්න අනිත් අයටත් ඒක මතක ඇතිව කියනවා මම කිව්වයි කියලා... හරිද ඡන්දෙට දාන්න ඕන කෙනා මම තීන්දු කරලා ඉවරයි....
ලොකු මහත්තයගෙ ඒ කතාව අහගත්ත කොළඹ මැද මන්තිරි තැන හොඳමයි සර් කියලා ටාර්ගාලා මාරුවුණා.
