සර් අපිව අස්කරනවද?
පසුගිය දවසක දියවන්නාවෙ අවන්හලේදි පොහොට්ටු මහලේකම් තැනට ගාලු දිසාවෙ පොහොට්ටු මන්ත්‍රී සගයෙක් හමුවුණා... ඒ මන්ත්‍රී සගය පත්වුණේ පොහොට්ටුවෙන් වුණාට දැන් එතැන නැහැ... උන්නැහේ දැන් කිට්ටු ටැලිෆෝන් පක්ෂයට බවයි කියැවෙන්නෙ...
කොහොම හරි පොහොට්ටු මහලේකම් තැන හමුවුණු මේ මන්ත්‍රී සගය පක්ෂ මාරු කළ මන්ත්‍රීන්ට දුන් නඩු තීන්දුව අනුව තමන් පොහොට්ටුවෙන් දොට්ට දාන්න යනවද කියල කෙළින්ම මහලේකම්ගෙන් ඇහුවලු... එතකොට ලේකම් තැන කිව්වෙ ඒ තීන්දුව මගේ එකක් නෙවෙයි පක්ෂයෙ තීන්දුවක්... පක්ෂ නායකයො ගන්න තීන්දු ක්‍රියාත්මක කිරීම පමණයි තමන් කරන්නෙ කියල.
මේ කතාව මෙහෙම යන අතරෙ පොහොට්ටුවෙ නායක මහින්ද තුමා ඒ පැත්තට ආවෙ අහම්බෙන් වගේ... එතකොට ගාලු මන්ත්‍රී සගය ඉස්සරහට ගිහිල්ල කිව්ව... ''බලන්න සර්... සර්ල මාව අස් කරන්න පක්ෂ ලේකම්ට බලය දුන්නද? මෙයා මට එහෙම කියනව..'' කියල පොහොට්ටු ලේකම් තැන දිහාට ඇඟිල්ල දික් කළා.
ඒ කතාව අහපු මහින්ද උන්නැහේ මහ හඬින් හිනාවෙලා උත්තර දුන්නෙ මෙහෙමයි... ''පක්ෂ මාරු කරන ඕනම කෙනෙක් අස් කරන්න විනය පියවර ගන්න අපි මහලේකම්ට බලය දුන්න... ඒ අනුව එයාට දැන් ඕන දෙයක් කරන්න පුළුවන්...''
එහෙම කිව්ව මහින්ද උන්නැහේ යන්න ගියා. ගාලු දිසා මන්ත්‍රී සගයත් හෙමින්ම පල්ලම් බැස්සා.